Garde mem l’etat d’esprit ki Christ

“Ena mem l’etat d’esprit entre zot, pareil couma Christ Jésus ti ena.”—ROM. 15:5.

1. Kifer nou bizin faire zeffort pou ena mem l’etat d’esprit ki Christ?

JÉSUS ti dire “Vinn vers moi . . . aprann ar moi, parski mo ena enn caractere doux ek enn leker humble, ek zot pou gagne reconfort pou zot nâme.” (Mat. 11:28, 29) Sa l’invitation encourageant-la montré bien l’etat d’esprit rempli ar l’amour ki Jésus ti ena. Pena okenn dimoune ki kapav donne nou enn pli bon l’exemple pou suive, ki Jésus. Mem si li ti Garson Bondié ek li ti ena enn grand pouvoir ek l’autorité, Jésus ti konn mette-li dan place lezot ek li ti manifesté tendresse surtout envers bann dimoune ki ti pé souffert.

2. Ki kitsoz lor l’etat d’esprit Jésus nou pou examiné?

² Dan sa lartik-la ek dan deux lezot lartik ki nou pou etudié apré, nou pou guetté couma nou kapav developpe ek garde mem l’etat d’esprit ki Jésus, ek manifesté “pensée Christ” dan nou la vie. (1 Cor. 2:16) Nou pou examine surtout cinq kitsoz: douceur ek l’humilité Jésus, so bonté, so l’obeissance envers Bondié, so courage, ek so l’amour ki fidele.

Imite douceur ki Christ ti manifesté

3. (a) Cite enn leson lor l’humilité ki Jésus ti enseigne so bann disciple. (b) Couma Jésus ti reagir kan so bann disciple ti montré zot faiblesse?

³ Jésus, Garson parfait Bondié, ti vinn lor la terre volontairement pou servi parmi bann dimoune imparfait ek ki faire peché. Certain parmi zot plitar ti pou touye li. Pourtant, Jésus ti toujours garde so la joie ek li ti konn controle li. (1 Pierre 2:21-23) Si nou “fixé nou lizié” lor l’exemple Jésus, sa kapav aide nou pou imite li kan defaut ek l’imperfection lezot agace nou. (Héb. 12:2) Jésus ti invite so bann disciple pou ‘mette-zot enba so joug avek li’ ek lerla pou aprann ar li. (Mat. 11:29, note.) Ki zot ti pou kapav aprann? Enn kitsoz ki zot ti pou aprann c’est ki Jésus ti ena enn caractere doux, ek li ti ena patience avek so bann disciple malgré zot bann defaut. La nuit avant li mort, Jésus ti lave zot lipié, ek kan li ti faire sa li ti enseigne enn leson lor ‘l’humilité’ ki jamais zot pa ti pou blié. (Lire Jean 13:14-17.) Plitar, kan Pierre, Jacques, ek Jean ti dormi ek zot pa “contigne veillé,” avek bonté Jésus ti dire zot, zot faiblesse. Li ti demandé: “Simon, to pé dormi?” Apré li ti dire: “Contigne veillé ek prié, pou ki zot pa tombe dan tentation. Oui, l’esprit li fort, mais la chair li faible.”—Marc 14:32-38.

4, 5. Couma l’exemple Jésus kapav aide nou pou bien reagir ar defaut lezot?

⁴ Couma nou reagir kan enn frere ou-soit enn soeur manifesté enn l’esprit competition, kan li offensé facilement, ou-soit kan li tardé pou obeir bann conseil ki bann ancien ou-soit ki “l’esclave fidele et avisé” donné? (Mat. 24:45-47) Kitfois nou trouve sa normal ki dan le monde Satan bann dimoune manifesté bann defaut. Mais kan nou bann frere manifesté sa bann defaut-la, nou kapav trouve sa difficile pou pardonne zot. Si defaut lezot agace nou facilement, nou bizin demann nou-mem: ‘Couma mo kapav imite pli bien “pensée Christ”?’ Essaye rappel ki Jésus pa ti en colere avek so bann disciple, mem si zot ti montré enn certain faiblesse lor plan spirituel.

⁵ Prend l’exemple l’apotre Pierre. Kan Jésus ti invite Pierre pou sorti dan bateau, pou marché ek vinn joinde Li lor de l’eau, Pierre ti reussi marche lor de l’eau pou enn ti moment. Mais apré, kan Pierre ti guette sa tempete-la, li ti commence coulé. Eski Jésus ti en colere ar li ek ti dire li: “Bien bon pou toi! Tire leson asterla”? Non! “Desuite Jésus ti envoye so la main, ti attrape li ek ti dire li: ‘Toi ki ena enn tigit la foi, kifer to’nn ena bann doute?’ ” (Mat. 14:28-31) Si nou bizin faire face ar enn frere ki parette mank la foi, eski pareil couma Jésus, nou kapav coumadir envoye nou la main pou aide li gagne plus la foi? C’est vrai-mem enn leson ki nou trouve bien kan Jésus ti montré so caractere doux envers Pierre.

6. Ki Jésus ti enseigne so bann zapotre lor zot desir pou gagne grandeur?

⁶ Pierre ti aussi parmi bann zapotre ki ti contigne discuté pou koné kisannla pli grand parmi zot. Jacques ek Jean ti envie assize dan coté droite ek dan coté gauche Jésus dan so Royaume. Kan Pierre ek lezot zapotre ti tann sa, zot ti bien en colere. Jésus ti koné ki surement zot ti’nn developpe sa l’esprit competition-la a cause culture kot zot ti’nn grandi. Li ti appel zot ek li ti dire zot: “Zot koné ki bann dirigeant commande lor bannla couma bann chef ek ki bann grand montré pouvoir lor zot. Pa coumsa ki sa passé parmi zot; mais n’importe kisannla ki envie vinn grand parmi zot, bizin vinn zot serviteur, ek n’importe kisannla ki envie vinn premier parmi zot, bizin vinn zot esclave.” Apré sa, Jésus ti cite so prop l’exemple: “Fils de l’homme inn vini, pa pou faire lezot servi li, mais pou li servi lezot ek pou donne so la vie couma enn ranson en echange pou beaucoup.”—Mat. 20:20-28.

7. Couma sakenn parmi nou kapav faire so part pou ki ena l’unité dan congregation?

⁷ Kan nou reflechi lor l’etat d’esprit bien humble ki Jésus ti ena, sa kapav aide nou pou “agir couma enn kikenn ki pli tipti” parmi nou bann frere. (Luc 9:46-48) Kan nou faire sa, sa favorise l’unité. Pareil couma enn papa ki ena enn grand famille, Jéhovah envie ki so bann zenfant “reste ensam dan l’unité,” ki zot d’accord entre zot. (Ps. 133:1) Jésus ti prié so Papa ek ti demann Li ki tou bann vrai chretien uni entre zot, pou ki “le monde koné ki c’est toi ki finn envoye moi ek ki to’nn content zot pareil couma to’nn content moi.” (Jean 17:23) Sa vedir ki nou l’unité permette lezot pou trouvé ki nou bann vrai chretien. Pou nou kapav ena sa qualité l’unité-la, nou bizin considere l’imperfection lezot pareil couma Christ. Jésus ti pardonné, ek li ti enseigné ki c’est zis kan nou pardonné ki Bondié pou pardonne nou.—Lire Matthieu 6:14, 15.

8. Ki nou kapav aprann ar l’exemple bann ki servi Bondié depuis longtemps?

⁸ Nou kapav aussi aprann beaucoup kan nou imite la foi bann ki finn passe beaucoup le temps pou imite Christ. Pareil couma Jésus, souvent sa bann serviteur Bondié-la montré ki zot comprend l’imperfection lezot. Zot finn aprann ki kan zot montré compassion pareil couma Christ, sa pa zis aide zot pou “sarié faiblesse bann ki faible,” mais aussi sa favorise l’unité. En plus, sa encourage zot tou dan congregation pou ena mem l’etat d’esprit ki Christ. Zot envie ki zot bann frere aussi manifesté sa mem l’etat d’esprit-la ek gagne mem resultat, pareil couma l’apotre Paul ti envie pou bann chretien dan Rome. Li ti dire: “Ki Bondié ki donne l’endurance ek consolation, faire zot ena mem l’etat d’esprit entre zot, pareil couma Christ Jésus ti ena, pou ki zot tou ensam avek enn sel la bouche zot glorifié Bondié ek Papa nou Seigneur Jésus Christ.” (Rom. 15:1, 5, 6) Oui, kan nou uni dan nou l’adoration, sa glorifié Jéhovah.

9. Kifer nou bizin l’esprit saint pou imite l’exemple Jésus?

⁹ Jésus ti montré ki ena enn rapport entre “enn leker humble” ek la douceur, enn qualité ki forme partie dan fruit l’esprit saint Bondié. Alors, en mem temps ki nou etudié l’exemple Jésus, nou bizin l’esprit saint Jéhovah pou ki nou kapav imite sa l’exemple-la couma bizin. Nou bizin prié pou gagne l’esprit saint Bondié ek faire zeffort pou developpe so fruit—“l’amour, la joie, la paix, patience, bienveillance, bonté, la foi, douceur, maitrise de soi.” (Gal. 5:22, 23) Alors, kan nou suive l’exemple l’humilité ek douceur ki Jésus inn laissé, nou pou faire plaisir Jéhovah, nou Papa ki dan le ciel.

Jésus ti traite lezot avek bonté

10. Couma Jésus ti manifesté la bonté?

¹⁰ La bonté aussi forme partie dan fruit l’esprit saint Bondié. Touletan Jésus ti traite lezot avek bonté. Tou seki ti rod Jésus avek sincerité, ti trouvé ki li ti “recevoir zot avek bonté.” (Lire Luc 9:11.) Ki nou kapav aprann ar bonté ki Jésus ti manifesté? Enn dimoune ki bon li amical, li gentil, li comprend lezot, ek li ena bann bon maniere. Jésus ti coumsa. Li ti ena pitié pou bann dimoune “parski zot ti gagne maltraité ek zot ti senti-zot perdi pareil couma bann mouton ki pena berger.”—Mat. 9:35, 36.

11, 12. (a) Raconte enn l’occasion kot Jésus ti montré compassion. (b) Ki ou kapav aprann ar sa l’exemple-la?

¹¹ Jésus pa ti zis ena pitié ek compassion pou bann dimoune, mais li ti aussi faire kitsoz pou aide zot. Anou prend enn l’exemple. Pendant 12 longue l’année, enn madame ti souffert a cause enn l’hemorragie. Li ti koné ki dapré la Loi mosaïk, so l’etat ti faire-li impur ek n’importe kisannla ki ti touche li ti pou impur aussi. (Lév. 15:25-27) Malgré sa, reputation ki Jésus ti ena ek fason ki li ti traite bann dimoune, surement ti convaink sa madame-la ki Jésus ti pou kapav ek ti pou envie gueri li. Li ti contigne dire: “Si mo touche zis so linge, mo pou gueri.” Li ti prend courage, li ti al touche linge Jésus ek desuite li ti senti ki li ti’nn gueri.

¹² Jésus ti rann-li compte ki enn kikenn ti’nn touche li, ek li ti guette autour li pou koné kisannla sa. Sa madame-la surement ti peur ki Jésus en colere ar li parski li ti’nn desobeir la Loi. A cause sa li ti tombe devant Jésus, li ti pé tremblé ek ti dire li la verité. Eski Jésus ti en colere avek sa pauvre madame ki ti pé souffert-la? Non! Li ti rassure li ek ti dire li: “Mo tifi, to la foi finn gueri toi. Al en paix.” (Marc 5:25-34) Surement sa madame-la ti bien content pou tann sa bann parole rempli ar bonté-la!

13. (a) Couma l’attitude Jésus ti different avek l’attitude bann Pharisien? (b) Couma Jésus ti traite bann zenfant?

¹³ Bann Pharisien ti ena enn leker dur, mais Christ pa ti couma zot; jamais li ti servi so l’autorité pou ajoute fardeau lor lezot. (Mat. 23:4) Au contraire, li ti enseigne bann dimoune bann principe Jéhovah avek bonté ek patience. Jésus ti ena l’affection pou so bann disciple, li ti touletan manifesté l’amour ek bonté envers zot. Li ti enn vrai camarade. (Prov. 17:17; Jean 15:11-15) Mem bann zenfant ti senti-zot a l’aise avek Jésus, ek li aussi li ti a l’aise avek zot. Jésus jamais ti trop occupé pou passe le temps avek bann ti zenfant. Enn fois, so bann disciple—ki ti encore pense lor zot-mem, lor l’importance ki zot ena, pareil couma bann chef religieux autour zot—ti essaye empeche bann dimoune amenn zot ti zenfant pou ki Jésus touche zot. Jésus pa ti content ki so bann disciple faire sa. Li ti dire zot: “Laisse bann ti zenfant vinn vers moi; pa rod empeche zot, parski royaume Bondié li pou bann dimoune ki pareil couma zot.” Apré sa, li ti servi bann zenfant pou enseigne so bann disciple enn leson important, li ti dire: “Vrai-mem mo dire zot: N’importe kisannla ki pa accepté royaume Bondié pareil couma enn ti zenfant, pa pou rente ditou ladan.”—Marc 10:13-15.

14. Ki bienfait bann zenfant gagné kan lezot interessé ar zot?

¹⁴ Maziné pou enn ti moment ki sentiment sa bann zenfant-la ti’nn kapav ressenti plusieurs l’année apré, kan en tant ki bann zom ek bann femme, zot ti rappel ki Jésus Christ ‘ti prend zot dan so lé-bras ek ti beni zot.’ (Marc 10:16) Bann zenfant zordi aussi pou garde enn bon souvenir lor l’interet sincere ki bann ancien ek lezot montré envers zot. Ek seki pli important, kan depuis tipti bann zenfant gagne sa qualité l’attention-la dan congregation, zot trouvé par zot-mem ki l’esprit Jéhovah lor so bann serviteur.

Montré bonté dan enn le monde mauvais

15. Kifer fodé pa nou etonné ki pena la bonté zordi?

¹⁵ Zordi, beaucoup dimoune pensé ki zot pena le temps pou montré bonté envers lezot. Alors, toulé-jour, dan lekol, dan travail, kan zot pé voyagé, ek dan zot ministere, bann serviteur Jéhovah bizin faire face ar l’esprit sa le monde-la. Kitfois kan bann dimoune pa manifesté la bonté, sa decourage nou, mais fodé pa ki sa etonne nou. Jéhovah ti inspire Paul pou averti nou ki a cause la vie dan lepok “dernier jour” kot nou pé vive, bann chretien pou joinde bann dimoune ki “content zot-mem, . . . [ki] pa pou ena okenn affection naturel.”—2 Tim. 3:1-3.

16. Couma nou kapav encourage mem bonté ki Christ, dan congregation?

¹⁶ Parkont dan congregation bann vrai chretien, ena enn bon l’atmosphere ki encourage nou ek ki bien different avek seki ena dan sa mauvais le monde-la. Si sakenn parmi nou imite Jésus, nou pou kapav faire nou part pou ki ena sa bon l’atmosphere-la. Couma nou kapav faire sa? D’abord, beaucoup dan congregation bizin nou l’aide ek nou l’encouragement parski zot ena bann probleme la santé ou-soit zot konn bann situation bien difficile. Dan “bann dernier jour,” kitfois sa bann probleme-la pé augmenté, mais zot pa nouveau. Dan premier siecle, bann chretien ti gagne mem probleme zot aussi. Alors, bann action ki nou faire pou aide nou bann frere, zot encore toujours important asterla pareil couma sa ti été pou bann chretien longtemps. Par exemple, Paul ti conseil bann chretien pou “koz dan enn fason ki pou encourage bann ki deprimé, [pou] soutenir bann ki faible, [pou] ena patience avek tou dimoune.” (1 Thess. 5:14) Sa implik ki nou manifesté mem bonté ki Christ.

17, 18. Cite certain fason couma nou kapav imite bonté ki Jésus ti ena.

¹⁷ Bann chretien ena responsabilité pou ‘accueillir zot bann frere avek bonté,’ pou traite zot pareil couma Jésus ti pou traite zot, pou montré enn l’interet sincere envers bann ki kitfois zot koné depuis bien longtemps, ek envers bann ki kitfois jamais zot finn joinde avant. (3 Jean 5-8) Pareil couma Jésus ti faire premier pas pou montré compassion envers lezot, nou aussi nou bizin faire pareil, nou bizin touletan encourageant pou lezot.—Is. 32:2; Mat. 11:28-30.

¹⁸ Sakenn parmi nou kapav montré la bonté kan nou faire kitsoz pou montré lezot ki nou prend zot compte ek ki nou comprend zot probleme. Rod bann fason ek trouve bann l’occasion pou faire sa. Paul ti dire: “Dan l’amour fraternel, ena enn grand l’affection sakenn pou so camarade. Zot bizin toujours premier pou honore sakenn so camarade.” (Rom. 12:10) Sa vedir ki nou bizin suive l’exemple Christ, traite lezot avek tendresse ek bonté, aprann pou montré enn “l’amour ki pa hypocrite.” (2 Cor. 6:6) C’est sa l’amour-la ki Christ ti ena, ek Paul ti decrire sa coumsa: “L’amour ena patience ek li bon. L’amour li pa jaloux, li pa faire vantard, li pa gonflé ar l’orgueil.” (1 Cor. 13:4) Au lieu ki nou garde rancune envers nou bann frere ek soeur, anou suive sa conseil-la: “Vinn bon sakenn envers so prochain, ena enn grand compassion, sakenn bizin pardonne so prochain avek tou so leker pareil couma Bondié aussi finn pardonne zot avek tou so leker par Christ.”—Éph. 4:32.

19. Ki bon resultat nou gagné kan nou montré mem bonté ki Christ?

¹⁹ Kan nou faire zeffort pou developpe ek pou montré mem bonté ki Christ ek nou faire sa touletan ek dan chaque situation, sa faire nou gagne bann grand benediction. L’esprit Jéhovah pou kapav agir sans okenn obstacle dan congregation, ek sa pou encourage zot tou pou developpe fruit sa l’esprit-la. En plus, kan nou suive modele ki Jésus inn laissé ek nou aide lezot pou faire pareil, la joie ek l’unité ki nou ena pou adore Jéhovah pou faire Li plaisir. Alors, anou touletan faire zeffort pou imite douceur ek bonté Jésus dan fason ki nou traite lezot.

Eski ou kapav expliké?

• Couma Jésus ti montré ki li ti ena “enn caractere doux ek enn leker humble”?

• Couma Jésus ti manifesté la bonté?

• Cite certain fason couma nou montré mem douceur ek bonté ki Christ dan sa le monde imparfait-la.

[Zimage lor page 11]

Kan la foi enn frere vinn faible, pareil couma Pierre, eski nou envoye nou la main pou aide li?

[Zimage lor page 13]

Ki nou kapav faire pou ki congregation vinn enn place kot ena la bonté?