“Ziska kan . . . mo pou bizin criyé au secours?”

“Mo zis envie ki douleur-la arreté!” Jayne ti ploré kan li ti dire sa bann parole-la. Li ti ena cancer ek sa ti pé fané partout dan so lekor. Seki so famille ek so bann camarade ti zis envie faire c’est tire so maladie ek so souffrance! Zot ti prié Bondié pou aide li. Eski Li ti pou ecoute zot la priere? Eski Li ti interessé ar zot?

BONDIÉ konn situation tou bann dimoune. So Parole, la Bible, dire: “Creation entier pé contigne plaigné ensam ek souffert ensam.” (Romains 8:22) Bondié koné ki ena par centaine million dimoune ki, pareil couma Jayne, souffert toulé-jour soit lor plan physik, emotionnel, ou-soit mental. Bondié trouve sa 800 million dimoune ki chaque soir al dormi sans mangé-la. Li trouve aussi bann lezot million ki souffert a cause violence dan la famille ek tou sa bann parent ki tracassé pou l’avenir ek bien-etre zot zenfant-la. Eski ou finn deja demann ou-mem si Bondié pou faire kitsoz pou reglé sa bann probleme-la? Bien sur Li pou faire kitsoz, parski si nou, nou envie aide bann dimoune ki nou content, eski Bondié Li, Li pa pou envie aide bann humain, so creation?

Si ou finn deja pose ou-mem sa bann question-la, rassure ou ki ou pa tousel. Finn gagne plus ki 2,600 an, Habaqouq, enn zom fidele, ti ena mem sentiment ki beaucoup dimoune ena zordi, ek li ti demann Bondié: “Ziska kan, o Jéhovah, mo pou bizin criyé au secours sans ki to tendé? Ziska kan mo pou demann toi l’aide kont la violence sans ki to amenn delivrance? Kifer to faire moi trouve seki mauvais ek to contigne guette malheur? Kifer devant moi ena bann dimoune ki prend tou di-bien zot camarade ek ki faire la violence? Kifer ena bann bagarre, ek kifer ena touletan discussion?” (Habaqouq 1:2, 3) Habaqouq, enn prophete hébreu, ti trouve violence ek bann agression cruel ki ti arrivé dan so lepok. Azordi, toulé-jour dan bann journal nou tann sa bann qualité kitsoz-la, ek sa bouleverse bann bon dimoune.

Eski Bondié ti prend compte seki ti pé tracasse Habaqouq? Oui. Li ti ecoute bann question sincere ki Habaqouq ti posé, apré Li ti reconforte ek encourage sa zom ki ti decouragé-la. Jéhovah ti fortifié la foi Habaqouq kan Li ti faire li enn promesse ki Li pou mette fin ar souffrance. Message l’esperance ki Bondié donné kapav reconforte ou aussi, pareil couma li ti faire pou Jayne ek so famille. Bann lartik ki suive pou reponn sa bann question-la: Couma nou kapav sur ki Bondié vrai-mem interessé ar nou? Ki Bondié pou faire pou arrete souffrance, ek kan Li pou faire sa?