Ki tou dimoune trouve bien to bann progré
“Reflechi lor sa bann kitsoz-la; concentré-toi bien ladan, pou ki tou dimoune trouve bien to bann progré.”—1 TIM. 4:15.
1, 2. Ki nou koné lor la vie Timothée kan li ti jeune, ek lor changement ki finn arrivé dan so la vie kan li ti ena apepré 20 an?
TIMOTHÉE ti grandi dan region Galatie, ki trouve dan l’endroit ki zordi appel Turquie. La-bas, ti ena plusieurs congregation ki ti’nn formé dan bann dizaine l’année apré la mort Jésus. Enn certain moment, Timothée ki ti encore jeune, so mama, ek so grand-mere ti vinn bann chretien ek zot ti bien actif dan enn parmi sa bann congregation-la. (2 Tim. 1:5; 3:14, 15) Surement Timothée ti bien profite so la vie en tant ki enn jeune chretien au milieu sa bann dimoune ki li ti konn bien-la. Mais enn sel coup, so la vie ti changé.
2 Tou ti commencé kan l’apotre Paul ti visite sa region-la enn deuxieme fois. Lerla, kitfois Timothée ti ena apepré 20 an. Pendant visite Paul, kitfois dan la ville Lystres, li ti’nn noté ki “bann frere” dan bann congregation alentour “ti rann enn bon temoignage lor” Timothée. (Actes 16:2) Surement Timothée ti’nn montré ki li ti enn chretien bien mur pou so l’age. Apré sa, enba direction l’esprit saint, Paul ek college ancien dan l’endroit ti pose zot la main lor Timothée, setadir zot ti mette li a part pou enn travail special dan congregation.—1 Tim. 4:14; 2 Tim. 1:6.
3. Ki privilege special Timothée ti gagné?
3 Timothée ti gagne enn l’invitation special—pou vinn compagnon voyage l’apotre Paul! (Actes 16:3) Nou maziné ki quantité surement Timothée ti etonné ek ti bien excité! Pendant bann l’année ki ti pou vini, li ti pou voyage avek Paul ek parfois avek lezot frere, li ti pou accompli different mission ki bann zapotre ek bann ancien ti pou confié li. Paul ek Timothée ti voyagé pou visite bann congregation ek sa ti bien fortifié bann frere lor plan spirituel. (Lire Actes 16:4, 5.) Alors, Timothée ti’nn vinn enn kikenn ki beaucoup chretien ti bien koné a cause so bann progré lor plan spirituel. Environ dix an apré ki Paul ti’nn travail avek Timothée, li ti ecrire bann Philippien: “A part [Timothée], mo pena personne ki ena enn l’attitude couma li, li ena, ek ki vrai-mem prend compte bann kitsoz ki concerne zot. . . . Zot konn preuve ki li ti donné lor li-mem, setadir pareil couma enn zenfant avek so papa, li ti travail avek moi couma enn esclave pou faire la bonne nouvelle progressé.”—Phil. 2:20-22.
4. (a) Ki grand responsabilité Timothée ti gagné? (b) Ki bann question nou kapav posé lor seki Paul ti dire Timothée dan 1 Timothée 4:15?
4 Dan lepok ki Paul ti ecrire bann Philippien, li ti donne Timothée enn grand responsabilité—etabli bann ancien ek bann assistant ministeriel. (1 Tim. 3:1; 5:22) Li clair ki Timothée ti’nn vinn enn ancien ki lezot ti kapav faire confiance. Pourtant, dan mem lettre ki Paul ti ecrire Timothée, li ti conseil li pou faire en sorte ki ‘tou dimoune trouve bien so bann progré.’ (1 Tim. 4:15) Eski Timothée pa ti’nn deja faire tou dimoune trouve so progré dan enn fason extraordinaire? Alors, ki Paul ti pé rod dire par sa bann parole-la, ek couma nou kapav profite sa conseil-la?
Bann qualité spirituel ki zot tou kapav trouvé
5, 6. Couma pureté spirituel congregation Éphèse ti menacé, ek couma Timothée ti pou kapav protege congregation?
5 Anou examine contexte 1 Timothée 4:15. (Lire 1 Timothée 4:11-16.) Avant li ti ecrire sa bann parole-la, Paul ti al Macédoine mais li ti demann Timothée pou reste Éphèse. Kifer? Certain dan sa la ville-la ti pé commence crée bann division dan congregation par bann fausse l’enseignement ki zot ti pé fané. Timothée ti bizin protege pureté spirituel congregation. Couma li ti pou faire sa? En partie, par enn bon l’exemple ki lezot ti pou kapav imité.
6 Paul ti ecrire Timothée: “Vinn enn l’exemple pou bann fidele, dan to bann parole, dan to conduite, dan l’amour, dan la foi ek dan pureté.” Paul ti ajouté: “Reflechi lor sa bann kitsoz-la; concentré-toi bien ladan, pou ki tou dimoune trouve bien to bann progré.” (1 Tim. 4:12, 15) Sa progré-la ti ena enn rapport avek bann qualité spirituel Timothée, pa avek enn position kot li ti pou ena enn certain l’autorité. C’est sa qualité progré-la ki tou chretien bizin envie ki lezot trouvé.
7. Ki zot tou dan congregation bizin faire?
7 Zordi, pareil couma dan lepok Timothée, ena different responsabilité dan congregation. Certain servi couma bann ancien ou-soit bann assistant ministeriel. Ena lezot ki pionnier. Ena lezot encore ki servi en tant ki surveillant itinerant, ki servi dan Béthel, ou-soit ki missionnaire. Bann ancien participe dan different programme l’enseignement, couma par exemple dan bann l’assemblée. Selman, tou chretien—zom, femme ek jeune—ena possibilité pou montré ki zot pé progressé lor plan spirituel. (Mat. 5:16) En realité, pareil couma Timothée, mem bann chretien ki ena bann privilege special dan congregation bizin faire en sorte ki tou dimoune trouvé ki zot ena bann qualité spirituel.
Vinn enn l’exemple en parole
8. Ki l’effet nou parole ena lor nou l’adoration?
8 Enn domaine kot Timothée ti bizin donne enn bon l’exemple c’est dan so parole. Couma nou kapav montré ki nou finn faire bann progré dan sa domaine-la? Nou bann parole faire koné ki qualité dimoune nou été. Jésus ti faire sa remark-la: “Seki nou ena en abondance dan nou leker, sa-mem ki nou la bouche dire.” (Mat. 12:34) Jacques, demi-frere Jésus, li aussi li ti reconette ki nou parole kapav ena enn l’effet lor nou l’adoration. Li ti ecrire: “Si enn kikenn pensé ki li pé bien servi Bondié, ek pourtant li pa controle so la langue, mais li contigne trompe so prop leker, l’adoration sa dimoune-la dan vide.”—Jacq. 1:26.
9. Cite bann fason couma nou kapav donne enn bon l’exemple en seki concerne nou bann parole.
9 Nou parole kapav montré lezot dan congregation ki quantité nou finn progressé lor plan spirituel. A cause sa, au lieu ki bann chretien ki mur lor plan spirituel dire bann kitsoz choquant, ki negatif, critik, ou-soit blessant, zot faire zeffort pou fortifié, reconforte, console ek encourage lezot. (Prov. 12:18; Éph. 4:29; 1 Tim. 6:3-5, 20) Nou kapav aussi montré nou l’attachement pou Bondié kan nou pré pou koz lor nou bann croyance avek lezot ek pou defann bann principe biblik. (Rom. 1:15, 16) Pena doute ki bann dimoune sincere pou observe fason ki nou servi nou la langue ek kitfois zot kapav suive nou l’exemple.—Phil. 4:8, 9.
Nou donne enn bon l’exemple par nou conduite ek nou pureté
10. Kifer enn la foi ki pa hypocrite li bien important pou nou progré spirituel?
10 Pou ki enn chretien li enn bon l’exemple pou lezot, li bizin faire plus ki zis dire bann parole encourageant. Si li dire bann bon kitsoz sans ki li faire bann bon kitsoz, li pou enn hypocrite. Paul ti bien koné couma bann Pharisien ti hypocrite ek ki degat sa ti faire. Zot pa ti sincere ek zot ti faire semblant ek plus ki enn fois, Paul ti mette Timothée en garde kont sa mauvais l’attitude-la. (1 Tim. 1:5; 4:1, 2) Mais Timothée pa ti enn hypocrite. Dan deuxieme lettre ki Paul ti ecrire Timothée, li ti dire: “Mo rappel la foi ki to ena, ki pa hypocrite.” (2 Tim. 1:5) Mais kan-mem, Timothée ti bizin montré lezot ki li ti enn vrai chretien. Li ti bizin donne enn bon l’exemple par so conduite.
11. Ki Paul ti ecrire Timothée lor la richesse?
11 Dan so deux lettre ki li ti ecrire Timothée, Paul ti donne li bann conseil dan plusieurs domaine en rapport avek so conduite. Par exemple, Timothée ti bizin evite galope derriere la richesse. Paul ti ecrire: “L’amour pou l’argent li enn racine tou sorte qualité mauvais kitsoz, ek parski zot finn galope derriere sa l’amour-la, certain finn perdi la foi ek zot finn pique zot-mem partout ar beaucoup douleur.” (1 Tim. 6:10) L’amour pou la richesse c’est enn signe ki nou spiritualité faible. Parkont, bann chretien ki satisfait ar enn la vie simple, ki contente-zot pou “ena mangé ek linge,” montré ki zot inn progressé lor plan spirituel.—1 Tim. 6:6-8; Phil. 4:11-13.
12. Couma nou kapav montré ki nou finn progressé dan nou la vie personnel?
12 Paul ti dire Timothée ki quantité li ti important ki bann femme chretien “habille bien, avek modestie ek bon sens.” (1 Tim. 2:9) Bann soeur donne enn bon l’exemple kan zot modeste ek ena bon sens dan choix ki zot faire en seki concerne zot l’habillement ek zot coiffure ek aussi dan lezot domaine zot la vie personnel. (1 Tim. 3:11) Sa principe-la applik ar bann frere aussi. Paul ti conseil bann ancien pou zot “equilibré dan [zot] bann l’habitude, ena bon sens, ordonné.” (1 Tim. 3:2) Kan nou manifesté sa bann qualité-la dan nou la vie toulé-jour, tou dimoune pou trouvé ki nou finn progressé.
13. Pareil couma Timothée, couma nou kapav vinn bann l’exemple en seki concerne la pureté?
13 Timothée ti bizin aussi donne enn bon l’exemple en rapport avek la pureté. Kan li ti servi sa mot-la, Paul ti pé faire reference ar enn domaine bien precis: moralité sexuel. Timothée ti bizin ena enn conduite ki personne pa ti kapav faire okenn reproche surtout dan so l’attitude envers bann femme. Li ti bizin traite “bann femme agé couma bann mama, bann jeune femme couma bann soeur, avek enn l’esprit pur.” (1 Tim. 4:12; 5:2) Mem si enn dimoune commette l’immoralité sexuel en cachiette ek pensé ki sa pou reste enn secret, Bondié Li, Li konn sa ek avek le temps lezot dimoune aussi pou konn sa. Mais li vrai aussi ki kan enn chretien faire bann bon kitsoz, sa aussi pa kapav cachiette. (1 Tim. 5:24, 25) Zot tou dan congregation ena possibilité pou montré ki zot inn progressé dan zot conduite ek en seki concerne la pureté.
L’amour ek la foi zot important
14. Couma la Bible montré l’importance pou ena l’amour entre nou?
14 Enn l’aspect principal vrai religion chretien, c’est l’amour. Jésus ti dire so bann disciple: “Par sa tou dimoune pou koné ki zot mo bann disciple, si zot ena l’amour entre zot.” (Jean 13:35) Couma nou manifesté sa qualité l’amour-la? Parole Bondié encourage nou pou “supporte sakenn nou camarade dan l’amour,” pou “vinn bon sakenn envers so prochain, ena enn grand compassion, sakenn bizin pardonne so prochain avek tou so leker,” ek pou montré l’hospitalité. (Éph. 4:2, 32; Héb. 13:1, 2) L’apotre Paul ti ecrire: “Dan l’amour fraternel, ena enn grand l’affection sakenn pou so camarade.”—Rom. 12:10.
15. Kifer l’amour bien important pou nou tou, surtout pou bann ancien?
15 Si Timothée ti’nn montré-li brite ou-soit mauvais avek lezot chretien, seki li ti pou’nn kapav faire en tant ki enn enseignant ek enn ancien pa ti pou servi nanyin. (Lire 1 Corinthiens 13:1-3.) De lot coté, pena doute ki l’affection sincere ki Timothée ti manifesté envers so bann frere, ensam avek so l’hospitalité ek bann bon travail ki li ti faire pou zot, ti montré ki li ti’nn progressé lor plan spirituel. Alors, li ti approprié ki, dan lettre ki li ti ecrire Timothée, l’apotre Paul ti dire li ki c’est surtout en rapport avek l’amour ki li ti bizin donne enn bon l’exemple.
16. Kifer Timothée ti bizin manifesté enn la foi solide?
16 Pendant ki Timothée ti pé reste Éphèse, so la foi ti passe par enn test. Certain ti pé enseigne bann doctrine ki pa ti en accord avek la verité. Ena lezot ki ti pé fann “bann fausse zistoire” ou-soit bann recherche ki zot ti pé faire ek ki pa ti favorise ditou spiritualité congregation. (Lire 1 Timothée 1:3, 4.) Paul ti dire ki sa bann dimoune-la zot “rempli ar l’orgueil, [zot] pa comprend nanyin, mais [zot] fatigue [zot] l’esprit avek bann discussion ek bann debat lor bann mot.” (1 Tim. 6:3, 4) Eski Timothée ti kapav prend risk pou examine sa bann l’enseignement dangereux ki ti pé fané dan congregation-la? Non, parski Paul ti encourage Timothée pou “combatte sa joli combat pou la foi-la” ek pou detourne-li “ar bann discours ki pena okenn sens ek ki sali seki saint, ek ar bann contradiction ki forme partie dan seki zot appel soi-disant ‘connaissance.’ ” (1 Tim. 6:12, 20, 21) Pena okenn doute ki Timothée ti suive conseil rempli ar sagesse ki Paul ti donne li.—1 Cor. 10:12.
17. Couma nou la foi kapav testé zordi?
17 Li interessant pou remarké ki Paul ti dire Timothée ki dan “lepok ki pou vini, certain pou abandonne la foi; zot pou ecoute bann parole inspiré ki embete dimoune ek l’enseignement bann demon.” (1 Tim. 4:1) Nou tou dan congregation, mem bann frere ki ena responsabilité, bizin imite Timothée ek manifesté enn la foi solide. Kan nou bien ferme ek nou rejette desuite l’apostasie, nou kapav montré ki nou finn progressé ek vinn enn bon l’exemple en seki concerne la foi.
Faire zeffort pou montré ki ou finn progressé
18, 19. (a) Couma ou kapav montré zot tou ki ou finn progressé? (b) Ki nou pou examiné dan prochain lartik?
18 Li clair ki progré spirituel enn vrai chretien pena okenn rapport avek so l’apparence physik, so capacité naturel ou-soit so position. So bann progré pa necessairement depann lor quantité l’année ki li’nn servi dan congregation. Au contraire, nou montré ki nou finn vrai-mem progressé lor plan spirituel kan, dan nou pensée, nou parole ek nou conduite, nou obeir Jéhovah. (Rom. 16:19) Nou bizin obeir l’ordre ki nou’nn gagné pou content nou bann frere ek soeur ek pou developpe enn la foi solide. Oui, anou medite lor seki Paul ti dire Timothée ek concentré-nou bien ladan pou ki tou dimoune kapav trouvé ki nou finn progressé.
19 Enn lot qualité ki montré ki nou finn progressé ek ki nou mur lor plan spirituel c’est la joie ki forme partie dan fruit l’esprit saint Bondié. (Gal. 5:22, 23) Prochain lartik pou montré couma nou kapav developpe la joie ek garde sa qualité-la dan bann difficulté.
Couma ou pou reponn?
• Ki lezot kapav aprann lor nou par nou parole?
• Couma nou montré ki nou finn progressé dan nou conduite ek en seki concerne nou pureté?
• Kifer bann chretien bizin donne enn bon l’exemple en rapport avek l’amour ek la foi?
[Zimage page 11]
Kan Timothée ti jeune li ti montré ki li ti enn chretien bien mur pou so l’age
[Zimage page 13]
Eski lezot trouve ou bann progré?