Pena doute: domination Satan pa pou reussi
“Mais sa pa pou marche bien ditou pou enn mauvais dimoune.”—ECCL. 8:13.
1. Kifer sa encourage nou pou koné ki bientot pou ena enn jugement kont bann mauvais?
PA ZORDI pa demain, bann mauvais dimoune pou bizin passe par enn jugement. Zot pou bizin rann compte pou seki zot inn faire. (Prov. 5:22; Eccl. 8:12, 13) C’est enn nouvelle bien encourageant, surtout pou bann ki content la justice ek ki finn victime bann l’injustice ek bann mauvais traitement ar bann mauvais dimoune. Parmi bann mauvais ki Bondié pou jugé, ena enn kikenn ki pli pire ki tou: Satan le Diable, papa tou mechanceté.—Jean 8:44.
2. Kifer ti bizin le temps pou reglé question ki ti’nn soulevé en Éden?
2 En Éden, Satan, ki ti rempli ar l’orgueil, ti pousse bann dimoune pou rejette fason ki Jéhovah dirigé. Avek ki resultat? Nou bann premier parent ti prend position pou Satan kan zot ti rebellé kont l’autorité Jéhovah ek zot ti vinn bann dimoune ki ti faire peché devant Li. (Rom. 5:12-14) Li vrai, Jéhovah ti koné kot-sa zot conduite rebelle ti pou amenn zot, enn consequence ki zot pa ti pou kapav evité. Selman, tou bann creature intelligent ti pou bizin trouve bien sa consequence-la. Alors, ti pou bizin le temps pou reglé sa question ki ti’nn soulevé-la ek prouvé ki sa bann rebelle-la ti ena full tort.
3. Ki nou position envers bann gouvernement humain?
3 Parski bann dimoune ti rejette l’autorité Jéhovah, zot ti’nn bizin etabli zot prop forme gouvernement. Dan enn lettre ki li ti ecrire bann chretien dan Rome, l’apotre Paul ti koz lor sa bann gouvernement-la couma bann “l’autorité superieur.” Dan lepok Paul, bann l’autorité superieur ti represente surtout gouvernement Rome ki ti pé dirigé par l’empereur Néron, ki ti gouverné depuis l’an 54-68 n.l. Paul ti dire ki sa bann l’autorité superieur-la “occupe sakenn so position dan place kot Bondié finn mette li.” (Lire Romains 13:1, 2.) Eski Paul ti pé rod dire ki maniere ki bann dimoune ti pé gouverné ti superieur ar maniere ki Bondié gouverné? Non. Au contraire, li ti pé zis dire ki tant ki Jéhovah permette bann dimoune gouverné, bann chretien bizin respecté sa “l’arrangement Bondié[-la]” ek accepté sa bann dirigeant-la.
Enn chemin ki’nn amenn vers malheur
4. Expliké kifer domination bann dimoune pena okenn chance pou reussi.
4 Kan-mem sa, domination humain ki influencé par Satan pa pou reussi, ek sa c’est enn kitsoz ki sur. Kifer li pa pou reussi? Premierement, parski li pa basé lor sagesse Jéhovah. Zis Jéhovah ki ena enn sagesse parfait. Alors, nou kapav compte zis lor Li tousel pou dire nou seki enn bon gouvernement été. (Jér. 8:9; Rom. 16:27) Bann dimoune zot, zot essaye plusieurs methode, si sa pa marché zot essaye enn lot, souvent c’est coumsa ki zot aprann. Mais Jéhovah Li, Li pa coumsa. Li koné ki pli bon fason pou agir. N’importe ki gouvernement ki pa suive so direction pena okenn chance pou reussi. Pou sa raison-la—sans mentionne bann mauvais mobile ki ti impliké—depuis commencement mem, maniere ki Satan ti gouverné par l’intermediaire bann dimoune, pa ti pou kapav reussi.
5, 6. Ki kitsoz surement finn amenn Satan pou oppose-li ar Jéhovah?
5 En general enn dimoune ki ena bon sens pa pou rod faire enn projet ki li koné pa pou reussi. Si li faire la tête dur ek li persisté dan sa projet-la, pou arrive enn moment li pou obligé reconette so erreur. L’Histoire finn montré plusieurs fois ki pa vaut la peine nou oppose-nou ar nou Createur ki tout-puissant. (Lire Proverbes 21:30.) Mais Satan li, li ti aveuglé par l’orgueil ek li ti tourne so lé-dos ar Jéhovah. Alors, la tête baissé, li ti prend enn chemin ki ti pou amenn zis vers malheur.
6 Dapré la Bible, ti ena enn le roi babylonien ki plitar ti reflete mem l’attitude rempli ar l’orgueil, pareil couma Satan. Dan enn fason vantard sa le roi-la ti dire: “Mo pou monte dan le ciel. Mo pou eleve mo trone pli la-haut ki bann zetoile Bondié, ek mo pou assize lor montagne kot faire reunion, dan bann partie pli loin dan le nord. Mo pou monte pli la-haut ki hauteur bann nuage; mo pou faire moi vinn pareil couma le Très-Haut.” (Is. 14:13-15) Projet sa dirigeant ki pa ti ena okenn bon sens-la, pa ti reussi, ek puissance Babylone finn fini dan deshonneur. Dan mem fason, Satan ek so le monde bientot pou konn enn defaite total.
Kifer Bondié inn permette sa?
7, 8. Kan Jéhovah finn permette le mal pendant enn certain temps, ki bann bienfait sa inn amené?
7 Certain kapav demann zot-mem kifer Jéhovah pa ti empeche bann dimoune pou al dan coté Satan ek pou etabli enn lot forme gouvernement ki sans okenn doute pa ti pou reussi. En tant ki Bondié Tout-Puissant, Li ti bien kapav empeche sa. (Ex. 6:3) Pourtant, Li pa’nn faire sa. Dan so sagesse, Li ti jugé ki si Li laisse bann dimoune rebellé pou inpé le temps sans ki Li faire nanyin, a la fin sa ti pou amenn bann bienfait. Finalement, zot tou ti pou trouvé ki Jéhovah regne avek justice ek amour, ek bann dimoune fidele ti pou gagne bann bienfait grace a so decision.
8 Si bann dimoune ti rejette bann proposition Satan ek ti refuse rod zot l’independance par rapport ar l’autorité Bondié, l’humanité ti pou kapav evite sa quantité malheur-la! Mais kan-mem, decision ki Jéhovah ti prend pou laisse bann dimoune domine-zot par zot-mem pendant enn temps, finn amenn bann bienfait. Bann dimoune sincere finn kapav trouvé ki li sage pou ecoute Bondié ek pou faire Li confiance. Pendant bann siecle, bann dimoune finn essaye plusieurs qualité gouvernement, mais nanyin pa ti bon. Sa finn fortifié bann adorateur Jéhovah ek finn assure-zot ki maniere ki Jéhovah gouverné pli bon. Li vrai ki mauvais domination Satan finn amenn beaucoup malheur pou l’humanité, parmi ena bann dimoune ki adore Jéhovah avek fidelité. Mais kan-mem, kan Bondié inn permette le mal pou enn certain temps, sa finn amenn aussi bann bienfait pou sa bann serviteur fidele-la.
Enn rebellion ki finn aidé pou glorifié Jéhovah
9, 10. Expliké couma domination Satan finn glorifié Jéhovah.
9 Kan Jéhovah finn laisse Satan influence bann dimoune ek finn laisse zot dirige zot par zot-mem, sa pa finn montré ki So maniere dirigé pa bon. Au contraire! L’Histoire finn montré ki seki Jérémie ti dire par inspiration li vrai, ki bann dimoune pena capacité pou dirige zot par zot-mem. (Lire Jérémie 10:23.) En plus, rebellion Satan finn donne Jéhovah l’occasion pou montré pli bien So bann qualité. Couma?
10 Domination Satan finn produire beaucoup malheur, ek sa mette encore plus en valeur bann qualité parfait ki Jéhovah ena. Dan sa fason-la, Li finn gagne la gloire devant lizié tou bann ki content Li. Oui, sa kapav parette drole, mais maniere ki Satan dirigé finn en realité aidé pou glorifié Jéhovah. Sa finn montré couma Jéhovah finn reglé dan enn fason extraordinaire probleme ki ti soulevé concernant so droit pou dirigé. Pou explik sa l’idée-la, anou examine pou enn ti moment, certain qualité Jéhovah ek guetté couma mauvais domination Satan finn pousse Jéhovah pou montré sa bann qualité-la dan bann lezot fason.
11. Couma Jéhovah finn manifesté so l’amour?
11 L’amour. La Bible dire nou ki “Bondié Li l’amour.” (1 Jean 4:8) Creation bann dimoune ti enn fason ki Bondié ti montré so l’amour. En plus, Bondié finn faire nou dan enn fason extraordinaire ek sa c’est enn preuve ki Bondié ena l’amour pou nou. Jéhovah ti aussi donne bann dimoune enn joli l’endroit pou zot vive, kot ti ena tou seki ti necessaire pou zot heureux. (Gen. 1:29-31; 2:8, 9; Ps. 139:14-16) Mais kan mechanceté ti commencé, Jéhovah ti montré so l’amour dan bann lezot fason. Couma? L’apotre Jean ti cite bann parole Jésus: “Bondié finn tellement content le monde ki Li finn donne so sel Garson ki Li finn crée direct, pou ki tou seki ena la foi en li pa detruire, mais gagne la vie pou touletan.” (Jean 3:16) Bondié inn envoye so sel Garson lor la terre pou sauve bann dimoune imparfait, eski Li ti pou kapav montré so l’amour dan enn fason pli extraordinaire ki sa? (Jean 15:13) Sa grand preuve lor l’amour Bondié-la donne aussi bann dimoune enn modele ki zot kapav suive. Zot kapav reflete l’amour ek l’esprit sacrifice ki Bondié inn manifesté, dan zot la vie toulé-jour, pareil couma Jésus.—Jean 17:25, 26.
12. Couma puissance Bondié inn manifesté?
12 Puissance. Zis “Bondié, Tout-Puissant,” ki ena pouvoir pou crée la vie. (Rév. 11:17; Ps. 36:9) Kan enn dimoune né, dan enn certain sens, li couma enn page blanc. Kan li mort, coumadir li’nn rempli sa page-la avek bann decision, bann action ek bann l’experience ki’nn forme so personnalité. Jéhovah kapav garde tou sa bann renseignement-la dan so memoire. Kan ler pou arrivé, Jéhovah kapav redonne sa dimoune-la la vie, ek redonne li tou seki faire so personnalité. (Jean 5:28, 29) Sa vedir ki, mem si la mort pa ti dan projet Bondié au commencement, sa finn permette Jéhovah pou montré ki Li mem ena pouvoir pou ressuscite bann dimoune mort. Oui vrai-mem, Jéhovah Li enn “Bondié, Tout-Puissant.”
13. Couma sacrifice Jésus ti montré ki la justice Jéhovah li parfait?
13 Justice. Jéhovah pa koz menti; Li pa agir dan enn fason injuste aussi. (Deut. 32:4; Tite 1:2) Li agir toujours en accord avek so bann principe ki ena enn niveau bien haute, ki vrai ek juste, mem si parfois sa pa dan so l’avantage. (Rom. 8:32) Surement Li ti bien souffert kan Li ti trouve so Garson ki Li bien content, mort lor enn poteau souffrance couma enn kikenn ki ti blaspheme Bondié avek infidelité! Pourtant, parski Jéhovah ena l’amour pou bann dimoune imparfait, Li ti disposé pou supporte sa l’epreuve terrible-la pou Li respecté so bann principe ki parfait ek juste. (Lire Romains 5:18-21.) Enn le monde ki rempli ar l’injustice finn donne Jéhovah l’occasion pou montré ki Li enn Modele parfait en seki concerne la justice.
14, 15. Couma Jéhovah finn manifesté so grand sagesse ek so patience?
14 Sagesse. Zis apré ki Adam ek Ève ti faire peché, Jéhovah ti faire koné couma Li ti pou tire tou bann degat ki zot rebellion ti’nn faire. (Gen. 3:15) Li ti prend bann action desuite, ek tigit par tigit Li ti faire so bann serviteur konn bann detail concernant projet ki Li ti ena pou bann dimoune; fason ki Li ti faire tousala ti mette en valeur so grand sagesse. (Rom. 11:33) Nanyin pa kapav empeche Bondié reussi reglé n’importe ki probleme ki arrivé. Dan enn le monde ki rempli ar l’immoralité, la guerre, bann dimoune ki pena okenn bon sens, ki desobeir, ki pena pitié, ki faire preference ek ki hypocrite, Jéhovah finn ena beaucoup l’occasion pou montré so bann creature seki vrai sagesse été. Disciple Jacques ti dire: “Sagesse ki sorti la-haut li avant tou pur, apré li pacifik, li raisonnable, li disposé pou obeir, li rempli ar misericorde ek bann bon fruit, li pa faire preference, li pa hypocrite.”—Jacq. 3:17.
15 Patience. Si Jéhovah pa ti bizin faire face avek l’imperfection bann dimoune, zot peché ek zot bann erreur, kitfois bann dimoune pa ti pou trouve Li montré so patience sa quantité-la. Jéhovah inn disposé pou supporte faiblesse bann dimoune pendant plusieurs millier l’année, sa montré ki Li ena sa qualité extraordinaire-la dan enn fason parfait. Nou bien reconnaissant envers Li pou sa. L’apotre Pierre ti bien dire ki nou bizin “considere patience nou Seigneur couma enn delivrance.”—2 Pierre 3:9, 15.
16. Kifer nou ressenti enn grand la joie kan Jéhovah disposé pou pardonne nou?
16 Pré pou pardonné. Nou tou nou faire peché ek souvent nou tou nou faire erreur. (Jacq. 3:2; 1 Jean 1:8, 9) Ki quantité nou bizin bien reconnaissant envers Jéhovah parski so pardon “bien grand”! (Is. 55:7) Mazinn enn lot kitsoz aussi: nou finn né couma bann dimoune imparfait ki faire peché, alors nou kapav ressenti enn grand la joie kan Bondié pardonne nou bann peché. (Ps. 51:5, 9, 17) Kan personnellement nou gagne sa pardon Jéhovah-la, sa augmente nou l’amour pou Li ek encourage nou pou imite so l’exemple dan nou relation avek lezot.—Lire Colossiens 3:13.
Kifer le monde li malade
17, 18. Kifer nou kapav dire ki fason ki Satan gouverné pa finn reussi?
17 Systeme mondial Satan en entier—enn produit so fason gouverné—pa finn reussi ditou malgré plusieurs siecle domination. En 1991, la gazette The European ti faire sa remark-la: “Eski le monde li malade? Oui, mais . . . pa a cause Bondié—c’est so bann habitant ki responsable so maladie.” Sa bann parole-la zot bien vrai! Nou bann premier parent, ki ti laisse-zot influencé par Satan, ti choisir pou dirige zot par zot-mem au lieu ki zot ti laisse Jéhovah dirige zot. Dan sa fason-la, zot ti choisir enn fason gouverné ki pa ti ena okenn chance pou reussi. Bann souffrance ek bann malheur ki dimoune pé gagné zordi, prouvé ki domination bann dimoune li affecté par enn maladie terrible.
18 Fason ki Satan gouverné mette l’accent lor l’egoïsme. Selman, l’egoïsme jamais pou kapav pli fort ki l’amour, ek fason ki Jéhovah gouverné li basé lor l’amour. Fason ki Satan gouverné pa finn reussi amenn stabilité, bonheur ek securité. Alors, nou trouvé ki fason ki Jéhovah gouverné pou justifié! Eski nou ena bann preuve pou sa? Oui, c’est seki nou pou trouvé dan prochain lartik.
Ki nou finn aprann lor domination, kan nou lire . . .
• Proverbes 21:30?
• Jérémie 10:23?
[Bann zimage lor page 25]
Domination Satan jamais pa finn amenn bann bienfait pou l’humanité
[Remerciement photo]
Photo U.S. Army
Photo OMS par P. Almasy
[Zimage lor page 26]
Jéhovah ena pouvoir mem pou ressuscite bann mort
[Zimage lor page 27]
Jéhovah finn manifesté so l’amour ek so justice kan Li’nn donne so Garson en sacrifice