Ki sa impliké konn nom Bondié

ESKI ou nom ena enn signification precis? Dan certain pays, li enn coutume pou donne enn zenfant enn nom ki ena enn signification. Sa nom ki finn choisir-la kapav ena enn lien avek croyance ek principe so bann parent ou-soit li kapav montré seki sa bann parent-la attann ek souhaité pou l’avenir zot zenfant.

Sa coutume pou donne enn nom ki ena enn signification-la, li pa nouveau. Dan lepok biblik, souvent bann parent ti choisir pou donne zot zenfant enn nom a cause signification ki sa nom-la ti ena. Bann nom ti kapav faire bann dimoune koné ki enn dimoune ti pou faire dan so la vie. Par exemple, kan Jéhovah ti dire David concernant role ki so garson, Salomon, ti pou rempli dan l’avenir, Li ti dire: “Parski so nom pou Salomon [ki vedir “la Paix”]; mo pou donne Israël la paix ek trankilité pendant so bann jour.”—1 Chroniques 22:9.

Parfois Jéhovah ti donne enn dimoune ki ti pou rempli enn nouveau role, enn nouveau nom. Par exemple, Li ti appel Abraham so femme, ki ti sterile, Sara. Sa nom-la vedir “Princesse.” Kifer? Jéhovah ti expliké: “Mo pou beni li ek aussi par li mo pou donne toi enn garson; oui mo pou beni li ek li pou vinn bann nation; a travers li pou gagne bann le roi bann peuple.” (Genèse 17:16) Li clair ki, kan nou comprend kifer Sara ti gagne enn nouveau nom, sa aide nou comprend nouveau role ki li ti pou rempli.

Ki nou kapav dire lor sa nom ki pli important ki tou nom-la—Jéhovah? Ki so signification? Kan Moïse ti demann Bondié ki So nom, Jéhovah ti reponn: “Mo pou vinn seki mo pou vini.” (Exode 3:14) Traduction Rotherham (en anglais) traduire sa verset-la coumsa: “Mo pou vinn seki mo envie vini.” Nom Jéhovah montré ki Li enn Bondié ki kapav prend n’importe ki role. Anou prend enn l’exemple simple: chaque jour, enn mama kitfois bizin amenn plusieurs role—li bizin vinn enn nurse, enn cuisinier, enn professeur—dapré besoin so bann zenfant. Li pareil pou Jéhovah, mais dan enn niveau beaucoup pli elevé. Pou realise so projet pou bann dimoune, Li kapav vinn seki Li envie, ek prend n’importe ki role Li envie. Alors, konn Jéhovah par so nom vedir, montré respé ek reconnaissance pou bann different role ki Li ena.

Malheureusement, bann ki pa konn Bondié par so nom pa reussi trouve beauté personnalité Bondié. Mais selman, kan ou etudié la Bible ou kapav comprend ek reconette l’importance bann different role ki Jéhovah rempli, zis pou cite certain so bann role couma par exemple, enn Conseillé ki sage, enn Sauveur puissant, ek enn Papa ki genereux. Nom Jéhovah, li rempli ar signification ek sa bann signification-la pousse nou pou ena enn grand respé pou sa nom-la.

Mais selman, pou konn Bondié par so nom, li pa toujours facile. Prochain lartik pou montré kifer.

[Zimage page 4]