Laisse “la loi l’amour fidele” protege zot la langue
“Li’nn ouvert so la bouche avek sagesse, ek la loi l’amour fidele lor so la langue.”—PROV. 31:26.
1, 2. (a) Ki qualité bann adorateur Jéhovah encouragé pou developpé? (b) Ki nou pou examiné dan sa lartik-la?
DAN enn message bien puissant ki le roi Lemouël ti gagné ar so mama, ti ena enn qualité important ki enn bon femme marié bizin ena. So mama ti dire li: “Li’nn ouvert so la bouche avek sagesse, ek la loi l’amour fidele lor so la langue.” (Prov. 31:1, 10, 26) L’amour fidele c’est enn qualité ki desirable; enn femme ki sage ek aussi tou bann dimoune ki envie faire Jéhovah plaisir bizin ena sa qualité-la lor zot la langue. (Lire Proverbes 19:22.) Fodé ki dimoune trouvé ki tou bann vrai adorateur Jéhovah manifesté l’amour fidele kan zot kozé.
2 Ki sa vedir l’amour fidele? Envers kisannla nou bizin manifesté sa qualité-la? Ki pou aide nou pou mette “la loi l’amour fidele” lor nou la langue? Kan nou faire sa, ki l’effet sa pou ena lor fason ki nou kozé avek bann membre nou famille ek nou bann frere ek soeur dan congregation?
Ki sa vedir l’amour fidele?
3, 4. (a) Ki sa vedir l’amour fidele? (b) Couma l’amour fidele li different ar la bonté ki bann dimoune ena en general?
3 L’expression l’amour fidele c’est enn traduction mot hébreux hèsèdh. C’est enn mot ki ena enn signification bien large, alors li pa facile pou traduire li avek enn sel mot. Nou finn traduire li par l’amour, misericorde, fidelité, ek bonté. C’est enn qualité ki nou contigne manifesté volontairement ar enn dimoune, dan enn but precis. Nou montré sa kan nou faire kitsoz pou aide li ek par bann parole gentil.
4 L’amour fidele li different ar la bonté. Nou kapav ena enn bonté ki bann dimoune ena en general ek manifesté sa, mem envers bann etranger. Bann habitant l’île Malte ti montré sa qualité bonté-la envers l’apotre Paul ek 275 lezot dimoune ki ti faire naufrage avek li—bann dimoune ki zot pa ti koné avant. (Actes 27:37–28:2) Mais l’amour fidele li, li ena enn rapport avek enn l’attachement fidele ki existé entre bann dimoune ki deja ena bann bon relation entre zot.a C’est sa qualité-la ki bann Qénite ti montré envers “tou bann Israélite kan zot ti pé sorti dan l’Égypte.”—1 Sam. 15:6.
Meditation ek la priere zot bien important
5. Ki pou aide nou pou controle nou la langue?
5 Li pa facile pou manifesté l’amour fidele kan nou kozé. Kan disciple Jacques ti koz lor la langue, li ti ecrire: “Okenn dimoune pa kapav dompte li, li enn kitsoz ki mauvais, ki dereglé, ki rempli ar enn poison mortel.” (Jacq. 3:8) Ki kapav aide nou pou controle sa membre nou lekor ki tellement difficile pou controlé-la? Bann parole ki Jésus ti dire ar bann chef religieux dan so lepok aide nou pou comprend. Li ti dire: “Seki nou ena en abondance dan nou leker, sa-mem ki nou la bouche dire.” (Mat. 12:34) Si nou envie ki l’amour fidele protege nou la langue, nou bizin developpe sa qualité-la dan nou leker—dan seki nou été au fond nou-mem. Anou guetté couma meditation ek la priere kapav aide nou pou faire sa.
6. Kifer nou bizin medite avek reconnaissance lor l’amour fidele ki Jéhovah inn manifesté?
6 La Bible dire nou ki Jéhovah ‘ena l’amour fidele en abondance.’ (Ex. 34:6) Enn psalmiste ti chanté: “O Jéhovah, to l’amour fidele inn rempli la terre.” (Ps. 119:64) Dan la Bible, ena plusieurs recit ki montré couma Jéhovah ti montré l’amour fidele envers so bann adorateur. Si nou prend le temps pou medite avek reconnaissance lor fason ki Jéhovah ti agir, sa kapav pousse nou pou nou envie developpe sa qualité ki Bondié manifesté-la.—Lire Psaume 77:12.
7, 8. (a) Couma Jéhovah ti montré so l’amour fidele envers Lot ek so famille? (b) Ki David ti ressenti kan Bondié ti manifesté l’amour fidele envers li personnellement?
7 Par exemple, reflechi lor fason ki Jéhovah ti delivré Lot, neveu Abraham, ek so famille, kan Li ti detruire Sodome, la ville kot zot ti pé resté. Alors ki sa destruction-la ti pé kosté, bann ange ki ti vinn kot Lot ti suppliye li pou prend so famille ek quitte la ville bien vite. La Bible dire: “Couma li ti pé tardé, lerla, a cause compassion ki Jéhovah ti ena pou li, bann [ange] ti attrape so la main, la main so femme, ek la main so deux tifi, ek zot ti faire li sorti ek ti mette li en dehors la ville.” Eski nou leker pa touché kan nou medite lor sa delivrance-la, ek eski sa pa pousse nou pou reconette ki c’est enn fason ki Bondié inn montré so l’amour fidele?—Gen. 19:16, 19.
8 Anou prend aussi l’exemple le roi David, ki ti vive en Israël dan le passé. Li ti chanté: “[Jéhovah] ki pardonne tou to faute, [Li] gueri tou to bann maladie.” Surement David ti bien reconnaissant ki Jéhovah ti pardonne li pou peché ki li ti faire avek Bath-Shéba! Li ti loué Jéhovah kan li ti dire: “Pareil couma le ciel pli haute ki la terre, pareil aussi so l’amour fidele pli grand envers bann ki ena la crainte pou Li.” (Ps. 103:3, 11) Kan nou medite lor la ek lor lezot recit ki ena dan la Bible, sa rempli nou leker ar reconnaissance pou l’amour fidele Jéhovah, ek sa pousse nou pou loué Li ek pou remercié Li. Plus nou ena reconnaissance dan nou leker, plus sa pou pousse-nou pou imite vrai Bondié.—Éph. 5:1.
9. Ki bon raison bann adorateur Jéhovah ena pou manifesté l’amour fidele dan zot la vie toulé-jour?
9 Bann l’exemple biblik montré ki Jéhovah manifesté l’amour fidele envers bann ki deja ena bann bon relation avek Li. Ki nou kapav dire lor bann ki pena sa qualité relation-la avek vrai Bondié? Eski Jéhovah Li dur ou-soit Li mauvais envers zot? Non. Luc 6:35 dire: “[Bondié] bon envers bann ki pena reconnaissance ek ki mauvais.” “Li faire so soleil levé lor mauvais dimoune ek lor bon dimoune, ek Li faire la pluie tombé lor dimoune juste ek injuste.” (Mat. 5:45) Avant ki nou ti konn la verité ek nou ti mette li en pratik dan nou la vie, nou ti pé profite bonté ki Bondié manifesté envers bann dimoune en general. Mais, en tant ki so bann adorateur, Bondié manifesté so l’amour fidele, ki dure pou touletan, envers nou personnellement. (Lire Isaïe 54:10.) Nou kapav vrai-mem bien reconnaissant pou sa! C’est enn bon raison pou manifesté l’amour fidele dan nou parole ek dan bann lezot domaine nou la vie!
10. Kifer la priere li bien important pou ki l’amour fidele forme partie dan nou personnalité?
10 Pou nou kapav developpe l’amour fidele, la priere bien important. L’amour ek la bonté—ki associé avek l’amour fidele— zot bann qualité ki forme partie dan fruit l’esprit saint Jéhovah. (Gal. 5:22) Nou kapav developpe l’amour fidele dan nou leker kan nou laisse l’esprit saint Jéhovah influence nou. Fason pli direct pou gagne l’esprit saint Jéhovah c’est kan nou demann sa Jéhovah dan la priere. (Luc 11:13) Li bon ki nou prié Bondié plusieurs fois pou donne nou so l’esprit saint ek ki nou accepté so direction dan nou la vie. Oui, si nou envie manifesté l’amour fidele dan nou fason kozé, li important ki nou medité ek nou prié.
Manifesté l’amour fidele entre conjoint
11. (a) Couma nou koné ki Jéhovah attann ki bann mari manifesté l’amour fidele envers zot femme? (b) Dan ki fason l’amour fidele kapav aide enn mari pou protege so la langue?
11 L’apotre Paul ti donne sa conseil-la bann mari: “Contigne content zot femme, pareil couma Christ aussi finn content la congregation ek finn donne so la vie pou sauve li.” (Éph. 5:25) Paul ti rappel zot aussi seki Jéhovah ti dire Adam ek Ève. Li ti ecrire: “Enn zom pou quitte so papa ek so mama ek li pou attaché avek so madame, ek toulé-deux pou vinn enn sel la chair.” (Éph. 5:31) Li clair ki Jéhovah attann ki bann mari reste fidele envers zot femme ek manifesté toujours l’amour fidele envers zot. Enn mari ki laisse l’amour fidele dirige so la langue pa pou raconte bann defaut so femme en publik, ni li pou abaisse li. Li content pou loué so femme. (Prov. 31:28) Si pou certaine raison ena bann probleme entre zot, l’amour fidele pou empeche li abaisse so femme par so fason kozé.
12. Couma fason ki enn femme kozé kapav montré ki l’amour fidele guide so la langue?
12 L’amour fidele bizin aussi guide la langue enn femme. Fodé pa ki li laisse l’esprit sa le monde-la influence so bann parole. Parski li ena enn “profond respé pou so mari,” alors, li koz en bien lor li en publik ek li faire lezot ena encore plus respé ki kitfois zot deja ena pou so mari. (Éph. 5:33) Li pa pou envie diminué respé ki so bann zenfant ena pou zot papa, a cause sa, li evite montré ki li pa d’accord avek so mari, ni li pou mette en doute so l’opinion devant zot. Li reglé sa bann kitsoz-la en privé. La Bible dire: “Enn femme ki vrai-mem sage inn construire so lakaz.” (Prov. 14:1) So lakaz c’est enn place agreable ek kot bon pou resté pou tou so famille.
13. Kot sa surtout bizin ena l’amour fidele, ek couma nou kapav laisse sa qualité-la guide nou?
13 Mem kan zot tousel dan zot lakaz, bann conjoint bizin contigne servi zot la langue dan enn fason ki montré ki zot respecté sakenn so camarade. Paul ti ecrire: “Rejette loin ar zot, tou sa bann kitsoz-la: la rage, colere, mechanceté, bann parole pou insulté lezot ek bann parole grossier ki sorti dan zot la bouche.” Li ti ajouté: “Habille zot ar enn grand compassion, bonté, l’humilité, douceur, ek patience. . . . Habille zot ar l’amour, parski li enn kitsoz parfait ki soude nou tou ensam.” (Col. 3:8, 12-14) Kan bann zenfant habitué tann zot parent koz avek amour ek bonté dan lakaz, zot pa pou vinn zis bann zenfant ki bien elevé, mais aussi zot pou plus disposé pou imite zot parent dan fason ki zot kozé.
14. Dan ki fason bann chef famille kapav servi zot la langue pou soutenir bann ki enba zot responsabilité?
14 Enn psalmiste ti ecrire lor Jéhovah: “To l’amour fidele, ah Jéhovah, ti contigne soutenir moi.” (Ps. 94:18) Enn fason extraordinaire ki Jéhovah soutenir so bann serviteur c’est kan Li donne zot conseil ek direction. (Ps. 119:105) Couma bann chef famille kapav tire profit ar l’exemple nou Papa ki dan le ciel ek servi zot la langue pou soutenir bann ki enba zot responsabilité? Zot kapav faire sa kan zot donne direction ek l’encouragement necessaire. Soirée ki reservé pou l’etude en famille c’est vrai-mem enn bon l’occasion pou decouvert bann tresor spirituel dan la Bible!—Prov. 24:4.
Manifesté l’amour fidele envers lezot chretien
15. Couma bann ancien ek lezot chretien mur lor plan spirituel kapav servi zot la langue pou protege lezot dan congregation?
15 Le roi David ti faire sa la priere-la: “Laisse to l’amour fidele ek to la verité protege moi touletan.” (Ps. 40:11) Couma bann ancien ek lezot chretien mur lor plan spirituel dan congregation kapav imite Jéhovah dan sa domaine-la? Kan nou servi nou la langue pou dirige l’attention lor bann renseignement ki ena dan la Bible, c’est vrai-mem enn fason pou agir avek l’amour fidele.—Prov. 17:17.
16, 17. Cite certain fason ki nou kapav montré ki l’amour fidele guide nou parole.
16 Ki nou bizin faire si nou trouve enn chretien pé prend enn chemin ki pa en accord avek bann principe biblik? Eski l’amour fidele pa pou pousse-nou pou servi nou la langue pou essaye corrige li? (Ps. 141:5) Ki nou pou faire si arrivé ki nou finn au courant enn peché grave ki enn lot chretien finn faire? L’amour fidele pou pousse-nou pou encourage li pou “appel bann ancien dan congregation” pou ki bannla kapav “prié pou li ek mette de l’huile lor li au nom Jéhovah.” (Jacq. 5:14) Si li pa al guette bann ancien, c’est nou ki bizin al dire sa bann ancien, sinon nou pa pou manifesté l’amour fidele. Kitfois certain chretien kapav senti-zot decouragé, zot tousel, zot pé souffert parski zot ena sentiment ki zot pa vaut nanyin, ou-soit zot bouleversé par bann deception ki zot inn gagné dan zot la vie. Enn bon fason pou montré ki nou ena l’amour fidele lor nou la langue c’est kan nou “koz dan enn fason ki pou encourage bann ki deprimé.”—1 Thess. 5:14.
17 Couma nou bizin reagir kan bann l’ennemi Bondié fann bann rumeur lor so bann serviteur? Au lieu ki nou doute fidelité nou bann frere, nou bizin rejette sa bann kozé-la, sans reponn. Ou-soit, si nou kapav raisonne avek sa dimoune ki pé faire sa l’accusation-la, demann li si sa l’accusation-la bien fondé. Si bann l’ennemi peuple Bondié rod koné kot nou bann frere été pou faire zot di-tort, nou pa pou donne zot okenn renseignement a cause nou l’amour fidele pou nou bann frere.—Prov. 18:24.
Enn zom ki ena “l’amour fidele pou trouve la vie”
18, 19. Kifer nou bizin toujours ena l’amour fidele lor nou la langue kan nou koz avek lezot chretien?
18 Li bizin clair ki nou ena l’amour fidele dan tou fason ki nou agir avek bann lezot adorateur Jéhovah. Mem si nou dan bann situation difficile, fodé ki ena toujours l’amour fidele lor nou la langue. Kan l’amour fidele bann Israélite ti vinn “couma la rosée ki disparette boner,” Jéhovah pa ti content. (Hosh. 6:4, 6) Mais Jéhovah Li apprecié kan nou manifesté l’amour fidele regulierement. Anou guetté couma Li beni bann dimoune ki rod toujours manifesté sa qualité-la.
19 Proverbes 21:21 dire: “Seki pé rod la justice ek l’amour fidele pou trouve la vie, la justice ek la gloire.” Parmi bann benediction ki sa dimoune-la pou gagné, c’est la vie—pa enn la vie courte, mais enn la vie sans fin. Jéhovah aide li pou “bien saisi vrai la vie.” (1 Tim. 6:12, 19) Alors, anou faire tou seki nou kapav pou ‘pratik l’amour fidele sakenn envers nou camarade.’—Zek. 7:9.
[Note]
a Pou plus renseignement couma l’amour fidele li different ar fidelité, ar l’amour ek ar la bonté, guette La Tour de Garde 1er juin 2002, page 9-10, 15-16, en créole.
Eski ou kapav expliké?
• Couma ou pou expliké ki sa vedir l’amour fidele?
• Ki pou aide nou pou ena l’amour fidele lor nou la langue?
• Couma bann chretien marié kapav montré ki zot ena l’amour fidele kan zot kozé?
• Dan fason ki nou agir avek nou bann frere, couma nou montré ki nou ena l’amour fidele lor nou la langue?
[Zimage page 25]
David ti loué l’amour fidele Jéhovah
[Zimage page 26]
Eski regulierement ou ena enn soirée pou ou l’etude familial?