Eski li possible pou ena satisfaction?

“Satisfaction faire bann dimoune misere, riche; [mais] bann dimoune riche ki pa satisfait, [zot] misere.”—Benjamin Franklin.

PAREIL couma sa proverbe-la dire, beaucoup finn aprann ki pa kapav acheté satisfaction pareil couma enn marchandise. Pena doute ki pou ena enn sentiment satisfaction au fond nou-mem, sa parette difficile dan enn le monde ki encourage enn desir pou gagne plus di-bien, pou accompli bann pli grand kitsoz, ou-soit pou amenn mem la vie ki lezot! Eski enn parmi bann kitsoz ki mentionné apré, finn influence-ou?

• Bann dimoune ki faire reclame bombarde ou avek sa message-la: ou pou gagne satisfaction si ou acheté encore enn dernier kitsoz.

• Competition dan travail ou-soit dan lekol encourage ou pou juge ou valeur kan ou compare-ou avek seki lezot kapav faire.

• Bann dimoune pena reconnaissance pou seki ou faire pou zot.

• Bann camarade faire ou envié seki zot ena.

• Ou pa gagne reponse pou bann question important lor la vie.

Kan ou faire face avek sa bann defi-la, eski li vrai-mem possible pou ou ena satisfaction? L’apotre Paul ti faire reference ar “secret pou satisfait [ar seki li ena].” Parfois, li ti vive avek beaucoup kitsoz ek lezot fois, avek tigit kitsoz. So bann camarade ti admire li, mais lezot ti bouffonne li. Pourtant, li ti dire ki li ti’nn “aprann pou ena satisfaction dan n’importe ki situation.”—C’est nou ki souligné; Philippiens 4:11, 12, New International Version.

Satisfaction li enn secret pou bann dimoune ki jamais inn faire kitsoz pou gagne li. Mais pareil couma Paul ti dire, nou kapav aprann pou ena satisfaction. Asterla, nou invite ou pou examine cinq secret ki trouve dan Parole Bondié, la Bible, ki pou permette ou ena satisfaction.