Solution pou six reproche ki souvent ena
LA Bible pa pretann ki mariage li facile. L’apotre Paul ti inspiré par Bondié pou ecrire ki bann couple marié pou faire face ar “bann difficulté dan zot la vie toulé-jour.” (1 Corinthiens 7:28, Bible en français courant) Mais enn couple marié kapav faire beaucoup kitsoz pou diminué zot bann probleme ek augmente la joie ki sakenn kapav donne so camarade. Anou examine six reproche ki bann mari ek bann femme souvent faire, ek anou guetté couma kan zot applik bann principe la Bible sa kapav aide zot.
1er
REPROCHE:
“Mo conjoint ek moi nou pé eloigné ar nou camarade.”
PRINCIPE BIBLIK:
“Verifié bien bann kitsoz ki pli important.”—PHILIPPIENS 1:10.
Ou mariage li enn parmi bann kitsoz ki pli important dan ou la vie. Li merite ki ou donne li priorité. Alors, verifié ki c’est pa a cause fason ki ou organise ou bann activité ki ena sa probleme-la. Pa laisse ou la vie toulé-jour faire ou ek ou conjoint vive enn la vie separé. Bien sur, li possible ki travail ek lezot situation ki ou pa kapav evité empeche ou, pendant enn certain temps, pou passe le temps ensam avek ou conjoint. Mais ou kapav ek ou bizin fixé enn limite ar bann kitsoz ki ou kapav controlé—couma par exemple, quantité le temps ki ou passé dan ou bann passe-temps ou-soit avek ou bann camarade.
Mais, ena certain conjoint ki kitfois passe beaucoup le temps dan zot travail ou-soit dan zot passe-temps zis pou ki zot pa bizin passe le temps avek zot conjoint. C’est pa ki sa bann dimoune-la zot “pé eloigné” ar zot conjoint. Mais, zot pé sauvé devant zot bann probleme. Si ou, ou-soit ou conjoint rente dan sa categorie dimoune-la, zot bizin guetté pou ki raison zot agir coumsa ek reglé sa. C’est selman kan ou ek ou conjoint passe le temps ensam ki zot pou kapav vinn proche sakenn envers zot camarade ek “vinn enn sel la chair” dan enn fason complet.—Genèse 2:24.
Couma certain finn applik sa conseil-la: Andrewa ek Tanji, enn couple ki reste en Australie, finn marié depuis dix an. Andrew dire: “Mo finn aprann ki passe trop beaucoup le temps dan travail ek avek bann camarade sa kapav vinn enn danger pou enn mariage. Alors, moi ek mo madame nou fixé bann moment pou kozé ek pou partage nou bann sentiment sakenn avek nou camarade.”
Dave ek Jane, ki reste dan l’Amérique ek ki finn marié depuis 22 an, passe zot premier trente minute chaque soir pou raconte zot la journée ek partage zot bann pensée. Jane dire: “Sa li tellement important ki nou pa laisse nanyin empeche nou passe sa moment-la ensam.”
2eme
REPROCHE:
“Mo nepli gagne seki mo’lé dan mo mariage.”
PRINCIPE BIBLIK:
“Sakenn bizin contigne rod, pa so prop l’avantage, mais l’avantage so camarade.”—1 CORINTHIENS 10:24.
Enn dimoune ki surtout interessé avek bann l’avantage ki li, li kapav gagné dan enn mariage jamais pou vrai-mem heureux, mem si li ré-marié plusieurs fois. Enn mariage pou reussi kan chaque conjoint fixé so l’attention plus lor seki li kapav donné ki lor seki li kapav recevoir. Jésus ti expliké kifer kan li ti dire: “Ena plus bonheur kan donné ki kan recevoir.”—Actes 20:35.
Couma certain finn applik sa conseil-la: Maria ek Martin, ki reste dan Mexique, finn marié depuis 39 an. Mais zot la vie mariage pa ti toujours facile. Zot rappel surtout enn moment difficile ki zot inn bizin faire face. Maria rappel: “Pendant enn grand discussion mo ti dire enn kitsoz ki pa ti montré okenn respé pou Martin. Li ti bien en colere. Mo ti essaye explik li ki mo pa ti pé vrai-mem pense seki mo’nn dire, mais ki mo ti zis senti-moi blessé. Mais li pa ti ou’lé ecouté.” Martin dire: “Pendant sa discussion-la, mo ti commence pensé ki nou nepli pou kapav vive ensam, ki mo bizin arrete faire zeffort pou ki mo mariage marché.”
Martin ti envie ki so madame respecté li. Maria ti envie ki so mari comprend li. Ni Martin ni Maria pa ti pé gagne seki zot ti pé attann.
Couma zot finn kapav reglé zot probleme? Martin dire: “Mo’nn attann moi calmé ek nou toulé-deux ti decide pou applik bann conseil sage ki ena dan la Bible, pou ena respé ek bonté. Avek le temps nou finn aprann ki n’importe ki quantité fois nou gagne probleme, nou kapav surmonte zot si nou demann Bondié so l’aide dan la priere ek si nou applik bann conseil ki ena dan la Bible.”—Isaïe 48:17, 18; Éphésiens 4:31, 32.
3eme
REPROCHE:
“Mo conjoint pa assume so responsabilité.”
PRINCIPE BIBLIK:
“Sakenn pou rann compte pou li-mem devant Bondié.”—ROMAINS 14:12.
Pena doute ki enn mariage pa pou marche bien si zis enn sel conjoint pé faire tou seki li kapav pou faire mariage-la reussi. Mais sa situation-la pou vinn pli pire si toulé-deux conjoint pa faire zot part ek sakenn mette tort lor so camarade.
Si touletan ou pé pense lor seki ou conjoint ti bizin pé faire, jamais ou pou heureux. Sa pou arrivé surtout si ou servi defaut ou conjoint couma enn excuse pou pa assume ou prop responsabilité. Parkont, si ou faire zeffort pou vinn enn bon mari ou-soit enn bon femme, ou la vie mariage pou amelioré. (1 Pierre 3:1-3) Seki pli important, ou montré Bondié ki ou honore mariage, enn disposition ki Li’nn mette en place, ek ou bann action pou faire Li enn grand plaisir.—1 Pierre 2:19.
Couma certain finn applik sa conseil-la: Kim ek so mari, reste dan Corée ek zot finn marié depuis 38 an. Kim dire: “Parfois mo mari agacé ar moi ek arrete koz ar moi, ek mo pa mem koné kifer. Sa donne moi l’impression ki li nepli content moi couma avant. Parfois mo demann mo-mem: ‘Kifer li envie ki mo comprend li alors ki li, li pa essaye comprend moi?’”
Kim ti kapav fixé so l’attention lor sa l’injustice-la ek lor seki so mari pa pé faire. Mais li finn prefere agir dan enn lot fason. Kim dire: “Au lieu ki mo ti reste en colere, mo ti trouvé ki li pli bon ki mo faire premier pas pou essaye faire la paix. A la fin, nou toulé-deux ti kapav calmé-nou ek kozé en paix.”—Jacques 3:18.
4eme
REPROCHE:
“Mo madame pa soumette.”
PRINCIPE BIBLIK:
“Chef tou bann zom c’est Christ.”—1 CORINTHIENS 11:3.
Enn mari ki ena sentiment ki so madame pa pé soumette, li bizin d’abord guetté si li, li disposé pou soumette ar so Chef, Jésus Christ. Enn mari kapav montré so soumission kan li suive l’exemple Jésus.
L’apotre Paul ti ecrire: “Mari, contigne content zot femme, pareil couma Christ aussi finn content la congregation ek finn donne so la vie pou sauve li.” (Éphésiens 5:25) Jésus pa ti “commann lor” so bann disciple couma enn chef. (Marc 10:42-44) Li ti donne so bann disciple bann conseil bien clair ek ti corrige zot kan bizin. Mais jamais li ti dur ar zot. Li ti bon avek zot ek li ti comprend ki zot ena bann limite. (Matthieu 11:29, 30; Marc 6:30, 31; 14:37, 38) Li ti touletan mette zot l’interet avant so prop l’interet.—Matthieu 20:25-28.
Enn mari bizin pose li-mem sa question-la: ‘Eski fason ki mo considere l’autorité ek fason ki mo considere bann madame en general zot plus influencé par bann coutume local ki par bann conseil ek bann l’exemple ki ena dan la Bible?’ Par exemple, ki ou pou pensé lor enn madame ki pa d’accord avek l’opinion so mari ek dire li sa dan enn fason ferme mais avek respé? La Bible decrire Sara, femme Abraham, couma l’exemple enn femme ki ti soumette. (1 Pierre 3:1, 6) Mais kan ti necessaire, li ti dire seki li ti pensé, par exemple kan Abraham pa ti trouve certain danger ki ti pé menace so famille.—Genèse 16:5; 21:9-12.
Li clair ki Abraham pa ti traite Sara dan enn fason ki ti faire li peur pou kozé. Li pa ti enn dimoune dominere. Li pareil aussi pou enn mari ki suive bann conseil la Bible. Li pa pou empeche so madame exprime-li. Li pa pou demann so madame pou soumette ar tou so bann caprice. Li pou gagne respé so madame kan li servi so l’autorité avek compassion.
Couma certain finn applik sa conseil-la: James, ki reste en Angleterre ek ki marié depuis huit an, dire: “Mo pé aprann pou pa prend bann decision important sans ki mo demann mo madame so l’opinion. Mo faire zeffort pou pa pense zis mo tousel. Au contraire, mo faire zeffort pou donne priorité seki li bizin.”
George reste en Amérique ek sa faire 59 an ki li’nn marié. Li dire: “Mo faire zeffort pou pa traite mo madame couma enn kikenn ki inferieur ar moi, mais couma enn partenaire ki intelligent ek ki ena bann capacité.”—Proverbes 31:10.
5eme
REPROCHE:
“Mo mari pa prend l’initiative.”
PRINCIPE BIBLIK:
“Enn femme ki vrai-mem sage inn construire so lakaz, mais enn femme ki bete crase li ar so prop la main.”—PROVERBES 14:1.
Si ou mari hesité pou prend bann decision ou-soit pou prend la tête pou dirige lakaz, ena au moins trois kitsoz different ki ou kapav faire. (1) Ou kapav a chaque fois attire l’attention lor so bann defaut ou-soit (2) ou kapav rod prend so place couma chef la famille ou-soit (3) ou kapav felicite li sincerement pou chaque zeffort ki li faire. Si ou choisir enn entre sa deux premier choix-la, ou pou crase ou lakaz avek ou prop la main. Si ou choisir troisieme-la, ou pou aidé pou batir ou mariage ou-soit faire li vinn pli solide.
Pou beaucoup missié, respé ena plus l’importance ki l’amour. Alors, si ou faire ou mari senti ki ou respecté li—faire li senti ki bann zeffort ki li faire pou prend la tête dan la famille zot efficace ek ki ou apprecié sa bann zeffort-la—tigit-tigit li pou assume so role pli bien. Bien sur, parfois pou arrivé ki ou pa pou d’accord avek ou mari lor certain sujet. Zot toulé-deux bizin koz lor sa bann sujet-la. (Proverbes 18:13) Mais bann mot ki ou pou choisir ek ton la voix ki ou pou servi, soit pou detruire ou mariage soit pou faire li vinn pli solide. (Proverbes 21:9; 27:15) Si ou exprime-ou avek respé, kitfois li pou pli facile pou ou gagne seki ou pé attann—enn mari ki pa pou hesité pou prend l’initiative.
Couma certain finn applik sa conseil-la: Michele, ki reste dan l’Amérique ek ki marié depuis 30 an, dire: “Parski mo mama ti elevé moi ek mo bann soeur sans soutien enn mari, li ti enn femme ki ti ena beaucoup l’assurance ek ki ti independant. Mo ena tendance pou imite li dan so fason agir. Alors, touletan mo bizin faire zeffort pou montré soumission ki bizin. Par exemple, mo finn aprann pou demann mo mari so l’opinion au lieu ki mo zis prend enn decision par mo-mem.”
Rachel, ki reste en Australie ek ki’nn marié avek Mark depuis 21 an, ti aussi influencé par l’environnement kot li’nn grandi. Li rappel: “Mo mama jamais ti soumette ar mo papa. Li ti normal ki ena bann grand discussion ek ki sakenn ti mank respé envers so camarade. Dan bann premier l’année mo mariage, mo ti imite mo mama. Mais a mesure ki bann l’année inn passé, mo finn aprann l’importance pou applik bann conseil la Bible ki encourage nou pou montré respé. Asterla, Mark ek moi nou pli heureux dan nou mariage.”
6eme
REPROCHE:
“Mo nepli kapav supporte bann mauvais l’habitude mo conjoint.”
PRINCIPE BIBLIK:
“Contigne supporte sakenn so camarade, ek si kikenn ena enn kitsoz kont enn lot, li bizin pardonne li avek tou so leker.”—COLOSSIENS 3:13.
Kan ou ti commence frequenté, ou ti tellement concentré lor bann qualité ou futur conjoint ki ou ti a peine remark so bann defaut. Eski asterla aussi ou kapav faire pareil? Pena doute ki ou conjoint donne ou bann bon raison pou faire li bann reproche. Mais selman demann ou-mem: ‘Lor ki kitsoz li pli bon ki mo concentré—lor bann qualité ou-soit lor bann defaut mo conjoint?’
Jésus ti servi enn l’exemple bien puissant pou montré l’importance pou passe lor bann defaut ki nou trouvé dan lezot dimoune. Li ti demandé: “Kifer to guette la paille ki dan lizié to frere, mais to pa prend compte poteau ki to ena dan to prop lizié?” (Matthieu 7:3) Enn la paille ti kapav enn ti boute l’herbe. Parkont, enn poteau li enn longue di-bois bien lourd ki ti servi pou tini toit enn lakaz. Ki leson Jésus ti pé enseigné? “Tire poteau ki dan to prop lizié avant, lerla to pou trouve bien couma pou tire la paille ki dan lizié to frere.”—Matthieu 7:5.
Jésus ti commence sa l’exemple-la avek enn l’avertissement serieux. Li ti dire: “Arrete jugé pou ki pa juge zot; parski c’est avek jugement ki zot jugé ki pou juge zot.” (Matthieu 7:1, 2) Si ou envie ki Bondié passe lor ou bann defaut—bann poteau ki dan ou lizié—li dan ou l’interet pou passe lor defaut ou conjoint.—Matthieu 6:14, 15.
Couma certain finn applik sa conseil-la: Jenny, ki reste en Angleterre ek ki’nn marié avek Simon depuis neuf an, dire: “Mo finn remarké ki, seki plus agace moi avek mo missié, c’est ki li ena tendance pou pa organise-li a l’avance, mais pou faire bann kitsoz dan dernier minute. Seki drole ladan, c’est kan nou ti pé frequenté, mo ti content kan li ti prend bann decision sans trop calculé. Mais asterla, mo reconette ki moi aussi mo ena bann defaut, par exemple mo ena tendance pou dire lezot seki zot bizin faire. Simon ek moi pé aprann passe lor bann ti defaut nou camarade.”
Curt, ki’nn marié avek Michele, ki nou’nn mentionné avant, dire: “Si ou fixé ou l’attention lor bann defaut ou conjoint, tigit-tigit sa bann defaut-la pou parette pli gros. Mo prefere fixé mo l’attention lor bann qualité Michele—seki’nn permette moi tombe amoureux avek li au commencement.”
Secret ki pou permette nou reussi
Sa deux-trois l’exemple-la montré ki nou pa kapav evite bann difficulté dan mariage, mais selman nou kapav surmonte zot. Ki secret pou permette nou reussi? Developpe l’amour pou Bondié ek ena desir pou applik bann conseil ki ena dan so Parole, la Bible.
Alex ek Itohan, ki reste dan Nigeria ek ki finn marié depuis plus ki 20 an, finn aprann sa secret-la. Alex dire: “Mo finn trouvé ki n’importe ki difficulté ki enn couple gagné dan so mariage zot kapav reglé sa si sa couple-la mette en pratik bann principe biblik.” So madame dire: “Nou finn aprann l’importance pou prié ensam regulierement ek pou applik bann conseil la Bible ki encourage nou pou ena enn l’amour sincere ek pou montré patience sakenn envers so camarade. Asterla nou ena moins probleme ki nou ti ena kan nou ti fek marié.”
Eski ou envie konn plus couma ou famille kapav tire profit ar bann conseil pratik ki ena dan Parole Bondié? Si oui, demann bann Témoins de Jéhovah pou examine avek ou chapitre 14 dan livre Ki la Bible enseigné vrai-mem?b
[Notes]
a Certain nom finn changé.
b Publié par bann Témoins de Jéhovah.
[Zimage page 4]
Eski nou reserve le temps pou nou camarade?
[Zimage page 5]
Eski mo essaye donne plus ki seki mo gagné?
[Zimage page 6]
Eski mo faire premier pas pou reglé bann discussion?
[Zimage page 7]
Eski mo prend compte l’opinion mo madame avant mo prend enn decision?
[Zimage page 9]
Eski mo fixé mo l’attention lor bann qualité mo conjoint?