Famille chretien—‘Reste lor zot garde’
“Anou reste lor nou garde ek garde nou bon sens.”—1 THESS. 5:6.
1, 2. Si enn famille envie reste lor so garde lor plan spirituel, ki li bizin faire?
KAN Paul ti ecrire bann chretien dan la ville Thessalonique, li ti koz lor “grand jour Jéhovah ki faire peur,” ek li ti dire: “Bann frere, zot pa dan noirté, pou ki sa jour-la vinn enn coup lor zot couma bann voleur, parski zot tou zot bann garson la lumiere ek bann garson li-jour. Nou pa pou la nuit ni pou noirté.” Paul ti ajouté: “Alors fodé pa ki nou dormi couma lezot pé faire, mais anou reste lor nou garde ek garde nou bon sens.”—Yoël 2:31; 1 Thess. 5:4-6.
2 Conseil ki Paul ti donne bann Thessalonicien li surtout bien approprié pou bann chretien ki pé vive dan “lepok la fin.” (Dan. 12:4) A mesure ki la fin mauvais le monde Satan pé kosté, Satan bien decidé pou detourne pli beaucoup vrai adorateur ki li kapav, pou ki zot pa servi Bondié. Alors, nou pou sage si nou prend serieux conseil ki Paul ti donné pou reste lor nou garde lor plan spirituel. Si enn famille chretien envie reste lor so garde, li bien important ki chaque membre prend responsabilité ki Jéhovah inn donne li, couma inn expliké dan la Bible. Alors, ki role eski bann mari, bann femme ek bann jeune ena pou aide zot famille ‘reste lor zot garde’?
Mari—imite “l’excellent berger”
3. Dapré 1 Timothée 5:8, ki responsabilité enn mari ena en tant ki chef so famille?
3 La Bible dire: “Chef enn femme c’est zom.” (1 Cor. 11:3) Ki responsabilité enn mari ena en tant ki chef so famille? La Bible dire: “Si enn kikenn pa donne so famille seki li bizin, ek surtout bann membre so prop famille, li’nn renié la foi ek li pire ki enn dimoune ki pena la foi.” (1 Tim. 5:8) Oui, enn mari bizin donne so famille seki li bizin lor plan materiel. Mais, pou li kapav aide bann membre so famille reste lor zot garde lor plan spirituel, li bizin faire plus ki zis gagne l’argent pou donne zot seki zot bizin. Li bizin fortifié zot lor plan spirituel, aide zot tou pou ki zot relation avek Bondié vinn pli solide. (Prov. 24:3, 4) Couma li kapav faire sa?
4. Ki kapav aide enn mari pou reussi batir so famille lor plan spirituel?
4 “Enn mari li chef so femme pareil couma Christ aussi li chef congregation.” Sa vedir ki enn zom marié bizin examine ek imite fason ki Jésus ti montré so l’autorité en tant ki chef congregation. (Éph. 5:23) Anou guetté couma Jésus ti decrire relation ki li ti ena avek so bann disciple. (Lire Jean 10:14, 15.) Si enn mari envie batir so famille lor plan spirituel, ki kitsoz principal pou permette li reussi faire sa? C’est kan li etudié seki Jésus ti dire ek ti faire en tant ki “l’excellent berger,” ek “suive bien so trace.”—1 Pierre 2:21.
5. Ki connaissance l’excellent Berger ena lor congregation?
5 Relation ki ena entre enn berger ek so bann mouton basé lor connaissance ek confiance. Enn berger konn tou concernant so bann mouton, ek bann mouton-la konn zot berger ek ena confiance en li. Zot reconette ek zot obeir so la voix. Jésus ti dire: “Mo konn mo bann brebis ek mo bann brebis konn moi.” Li konn bien tou seki passé dan congregation. Mot grec ki’nn traduire par “konn” dan sa verset-la vedir “enn connaissance personnel, bien profond.” Oui, l’excellent Berger konn so bann brebis personnellement. Li konn besoin ki sakenn ena, zot point fort ek zot point faible. Pena nanyin concernant so bann brebis ki li pa koné. Ek bann brebis-la konn bien zot berger ek ena confiance dan so direction.
6. Couma bann mari kapav imite l’excellent Berger?
6 Pou assume so responsabilité en tant ki chef pareil couma Christ, enn mari bizin aprann pou considere li-mem couma enn berger ek bann ki enba so responsabilité, couma bann brebis. Li bizin faire tou seki li kapav pou konn bien so famille. Eski enn mari kapav vrai-mem ena enn connaissance coumsa? Oui, a condition ki li ena enn bon communication avek tou bann membre so famille, ecoute seki tracasse zot, prend la tête dan bann activité ki concerne la famille, ek faire attention pou prend bann bon decision ki concerne par exemple l’etude familial, assisté reunion, predication, detente ek divertissement. Enn mari chretien ki prend la tête dan so famille, bizin pa zis ena enn connaissance lor Parole Bondié, mais aussi li bizin konn bien bann membre so famille. Lerla, pou ena plus chance ki zot pou ena confiance dan so l’autorité ek li pou ena satisfaction pou trouve zot reste uni dan vrai l’adoration.
7, 8. Couma enn mari kapav imite l’excellent Berger kan li montré l’affection envers bann ki enba so responsabilité?
7 Enn bon berger ena aussi l’affection pou so bann brebis. Kan nou etudié bann l’Evangile ki raconte la vie ek ministere Jésus, nou leker bien touché par l’affection ki Jésus ti ena pou so bann disciple. Li ti mem ‘donne so nâme pou bann brebis.’ Bann mari bizin imite Jésus kan zot montré l’affection pou bann ki enba zot responsabilité. Au lieu ki li brite ek li faire dominere avek so femme, enn mari ki envie gagne faveur Bondié pou contigne content so femme “pareil couma Christ aussi finn content la congregation.” (Éph. 5:25) Li bizin koz bien ar so femme ek montré ki li ena consideration pou li, parski li merite l’honneur.—1 Pierre 3:7.
8 Kan enn chef famille forme so bann jeune zenfant, li bizin applik bann principe biblik avek fermeté. Selman, li bizin aussi montré l’affection envers so bann zenfant. Kan li pou bizin discipline zot, li pou faire sa avek amour. Certain jeune kitfois prend plus le temps ki lezot pou comprend seki zot bizin faire. Dan sa cas-la, enn papa bizin ena plus patience ar zot. Kan bann mari touletan suive l’exemple Jésus, zot crée dan zot lakaz enn l’atmosphere kot sakenn senti-li en securité. Zot famille konn mem securité spirituel ki enn psalmiste ti chanté.—Lire Psaume 23:1-6.
9. Pareil couma Noé, ki responsabilité bann mari chretien ena, ek ki pou aide zot pou assume sa responsabilité-la?
9 Enn lot bon l’exemple pou bann chef famille, c’est Noé. Li ti vive dan lepok la fin so le monde. Mais Jéhovah ti “sap Noé . . . ensam avek sept lezot, kan li ti amenn enn deluge lor enn le monde ki pa ti ena okenn respé pou Bondié.” (2 Pierre 2:5) Noé ti ena responsabilité pou aide so famille gagne la vie sauve pendant deluge. Zordi, dan lepok la fin, bann chef famille chretien dan mem situation. (Mat. 24:37) Alors, li vrai-mem bien important ki zot etudié l’exemple “l’excellent berger” ek zot faire zeffort pou imite li!
Femme—‘batir zot famille’
10. Ki sa vedir pou enn femme ki li soumette ar so mari?
10 L’apotre Paul ti ecrire: “Fodé ki bann femme soumette ar zot mari pareil couma zot soumette ar le Seigneur.” (Éph. 5:22) Sa pa vedir ki bann femme ena enn position ki pa digne. Avant ki li ti crée Ève, premier femme, vrai Bondié ti dire: “Li pa bon ki zom reste tousel. Mo pou faire enn l’aide pou li, enn kikenn ki al bien ar li.” (Gen. 2:18) Role ki enn femme ena couma enn “l’aide” ek enn “kikenn ki al bien ar” so mari, setadir ki soutenir so mari pendant ki mari-la pé assume so bann responsabilité dan la famille, c’est enn role ki merite l’honneur.
11. Couma enn femme ki donne enn bon l’exemple ‘batir so famille’?
11 Enn femme ki donne enn bon l’exemple, travail pou bien-etre so famille. (Lire Proverbes 14:1.) Li pa couma enn femme bete ki pena enn profond respé pou l’autorité ki Jéhovah inn etabli dan la famille, li, li ena respé pou sa disposition-la. Li pa manifesté enn l’esprit desobeissance ek independance couma ena dan le monde, mais li soumette ar so conjoint. (Éph. 2:2) Enn femme ki bete, pa hesité pou koz en mal lor so mari, alors ki enn femme ki sage faire tou pou augmente respé ki so bann zenfant ek lezot ena pou so mari. Enn femme ki sage pa faire pression ou-soit pa la guerre ar so mari, parski li pa’lé ki ni li, ni lezot mank respé envers l’autorité so mari. Li pou faire aussi l’economie. Enn femme bete kitfois pou gaspille seki la famille inn trimé pou gagné. Enn femme ki soutenir so mari, li pa coumsa. Li coopere avek so mari dan domaine finance. Fason ki li faire bann kitsoz montré ki li ena enn bon jugement ek li faire l’economie. Li pa force so mari pou travail overtime.
12. Ki enn femme kapav faire pou aide bann membre so famille pou ‘reste lor zot garde’?
12 Enn femme ki donne enn bon l’exemple aide bann membre so famille pou ‘reste lor zot garde’ kan li coopere avek so mari dan l’education spirituel zot bann zenfant. (Prov. 1:8) Li faire tou pou soutenir programme ki’nn faire pou l’etude familial. En plus, li soutenir so mari kan mari-la donne conseil ek discipline zot bann zenfant. Oui, li vrai-mem bien different avek enn femme ki pa coopere avek so mari ek a cause sa, so bann zenfant souffert lor plan physik ek spirituel!
13. Kifer li important ki enn femme soutenir so mari ki bien occupé avek so bann responsabilité dan l’organisation?
13 Ki sentiment enn femme ki soutenir so mari ena kan li trouve li bien occupé dan congregation? Pena doute ki li bien content! Ki so mari enn assistant ministeriel, enn ancien ou-soit kitfois enn membre dan Comité liaison hospitalier ou-soit ki travail dan bann construction bann la Salle du Royaume, li bien content ki so mari ena sa privilege-la. Pou bien soutenir so mari par so bann parole ek so bann action, surement sa pou demann li faire bann sacrifice. Mais, li conscient ki si so mari bien occupé avek bann responsabilité dan congregation ek dan l’organisation, sa pou aide tou so famille pou reste lor zot garde lor plan spirituel.
14. (a) Ki difficulté enn femme ki soutenir so mari kapav gagné, ek couma li kapav surmonte sa? (b) Ki enn femme kapav faire pou bien-etre tou so famille?
14 Kitfois li pa toujours facile pou enn femme soutenir so mari ek donne enn bon l’exemple, surtout kan li pa d’accord avek enn decision ki so mari inn prend. Mais kan-mem, li pou manifesté enn “caractere trankil ek douce” ek li pou coopere avek li pou ki so decision marche bien. (1 Pierre 3:4) Enn bon femme essaye suive bon l’exemple bann femme fidele dan le passé, ki ti ena la crainte pou Bondié, couma par exemple Sara, Ruth, Abigaïl, ek Marie, mama Jésus. (1 Pierre 3:5, 6) Li imite aussi bann femme agé dan nou lepok, ki ena “enn conduite ki montré respé pou Bondié.” (Tite 2:3, 4) Kan li montré l’amour ek respé pou so mari, enn femme ki donne enn bon l’exemple faire beaucoup pou ki so mariage reussi ek pou bien-etre tou so famille. So lakaz c’est enn l’endroit kot gagne l’encouragement ek securité. Pou enn zom spirituel, enn femme ki soutenir li, ena enn grand valeur!—Prov. 18:22.
Jeune—‘fixé zot lizié lor bann kitsoz ki zot pa trouvé’
15. Couma bann jeune kapav faire zot part ek aide zot parent pou ki la famille ‘reste lor so garde’?
15 Zot bann jeune, couma zot kapav faire zot part ek aide zot parent pou ki toute la famille ‘reste lor so garde’ lor plan spirituel? Guette prix ki Jéhovah inn mette devant ou. Kitfois depuis ou tipti, ou bann parent ti montré ou bann zimage couma la vie pou été dan Paradis. A mesure ki ou’nn grandi, surement zot finn servi la Bible ek bann publication biblik pou aide ou faire vision couma la vie eternel pou été dan le monde nouveau. Kan ou contigne fixé ou lizié lor ou service pou Jéhovah ek ou organise ou la vie en rapport avek sa, sa pou aide ou pou ‘reste lor ou garde.’
16, 17. Ki bann jeune kapav faire pou zot reussi galope lé-course ki pou faire zot gagne la vie?
16 Prend serieux bann parole ki l’apotre Paul ti dire dan 1 Corinthiens 9:24. (Lire.) Galope sa lé-course ki pou faire ou gagne la vie-la dan l’intention pou gagné. Choisir pou ena enn conduite ki pou faire ou gagne prix la vie eternel. Beaucoup finn galope derriere bann kitsoz materiel ek finn laisse sa empeche zot garde zot lizié fixé lor sa prix-la. Li vrai-mem bete pou agir coumsa! Si ou organise ou la vie pou gagne la richesse, sa pa pou faire ou vrai-mem gagne vrai bonheur. Bann kitsoz ki l’argent kapav acheté, pa pou duré pou touletan. Mais ou, fixé ou lizié lor ‘bann kitsoz ki ou pa trouvé.’ Kifer? Parski “bann kitsoz ki nou pa trouvé, zot eternel.”—2 Cor. 4:18.
17 Parmi “bann kitsoz ki nou pa trouvé,” ena bann benediction ki Royaume Bondié pou amené. Organise ou la vie dan enn fason pou gagne sa bann benediction-la. Ou gagne vrai bonheur kan ou servi ou la vie dan service Jéhovah. Servi vrai Bondié donne ou bann possibilité pou realise bann ti l’objectif ek aussi bann pli grand l’objectif.a Kan ou fixé bann l’objectif spirituel ki ou pou kapav realisé, sa kapav aide ou pou garde ou l’esprit fixé lor service Bondié pou ou kapav gagne prix la vie eternel.—1 Jean 2:17.
18, 19. Couma enn jeune kapav koné si li’nn developpe bann bon relation avek Bondié?
18 Jeune, pou ou faire ou premier pas lor chemin la vie, ou bizin developpe bann relation personnel avek Jéhovah. Eski ou finn faire sa pas-la? Demann ou-mem: ‘Eski mo enn dimoune spirituel, ou-soit eski mo depann lor mo bann parent pou mo participe dan bann activité spirituel? Eski mo developpe bann qualité ki faire Bondié plaisir? Eski mo faire zeffort pou garde enn bon l’habitude pou participe dan bann activité ki ena enn rapport avek vrai l’adoration, par exemple, kan regulierement mo faire la priere, mo etudié, mo assisté reunion ek mo sorti predication? Eski mo pé developpe bann relation personnel avek Bondié ki pé faire moi vinn proche ar Li?’—Jacq. 4:8.
19 Reflechi lor l’exemple Moïse. Mem si li ti bizin soumette ar culture enn lot pays, li ti prefere ki bann dimoune konn li couma enn adorateur Jéhovah au lieu ki garson tifi Pharaon. (Lire Hébreux 11:24-27.) Jeune chretien, ou aussi ou bizin bien decidé pou servi Jéhovah avek fidelité. Kan ou faire sa, ou pou gagne vrai bonheur, enn pli bon qualité la vie asterla, ek l’esperance pou “bien saisi vrai la vie.”—1 Tim. 6:19.
20. Dan lé-course ki amenn vers la vie, kisannla ki gagne prix?
20 Dan bann jeux ki ti ena dan le passé, enn sel coureur ti gagné. Mais li pa pareil dan lé-course ki amenn vers la vie. Bondié envie “ki tou sorte qualité dimoune sauvé ek gagne enn connaissance exact lor la verité.” (1 Tim. 2:3, 4) Beaucoup finn galope avek succès avant ou, ek beaucoup pé galope ensam avek ou. (Héb. 12:1, 2) Bann ki pou gagne prix, c’est bann ki pa abandonné. Alors, faire tou seki ou kapav pou gagne sa prix-la!
21. Ki nou pou examiné dan prochain lartik?
21 Pena doute ki “grand jour Jéhovah ki faire peur” pou vini. (Mal. 4:5) Fodé pa ki bann famille chretien laisse sa jour-la vinn lor zot sans ki zot attann. Li bien important ki sakenn dan la famille prend responsabilité ki Jéhovah inn donne li, couma la Bible expliké. Ki ou kapav faire encore pou reste lor ou garde lor plan spirituel ek pou fortifié ou relation avek Bondié? Dan prochain lartik, nou pou examine trois kitsoz ki ena enn l’effet lor bien-etre spirituel la famille.
[Note]
a Guette La Tour de Garde 1er novembre 2010, page 20-24, en créole; 15 juillet 2004, page 21-23, en français.
Ki ou finn aprann?
• Kifer li bien important ki bann famille chretien ‘reste lor zot garde’?
• Couma enn mari kapav imite l’excellent Berger?
• Ki enn femme ki donne enn bon l’exemple kapav faire pou soutenir so mari?
• Ki bann jeune kapav faire pou ki zot famille reste lor zot garde lor plan spirituel?
[Zimage page 12]
Pou enn zom spirituel, enn femme ki soutenir li, ena enn grand valeur