Faire traitre ar lezot—Enn signe dernier jour!

“Nou finn montré-nou fidele, juste ek sans reproche.”​—1 THESS. 2:10.

ROD SA BANN POINT IMPORTANT-LA:

Ki leson nou tiré ar trahison Dalila, Absalom ek Judas Iscariote?

Couma nou kapav imite fidelité Yonathân ek Pierre?

Couma nou kapav contigne reste fidele envers nou conjoint ek envers Jéhovah?

1-3. (a) Ki signe montré ki nou pé vive dan lepok dernier jour, ek ki sa impliké? (b) Ki trois question nou pou reponn?

KI DALILA, Absalom, ek Judas Iscariote ena en commun? Toulé-trois pa ti fidele​—Dalila pa ti fidele envers juge Samson ki ti content li; Absalom pa ti fidele envers so papa, le roi David, ek Juda pa ti fidele envers so Maitre, Jésus Christ. Dan chaque cas, zot bann mauvais action ti faire beaucoup di-tort! Mais kifer sa bizin interesse nou?

² Dan enn la liste ki enn ecrivain ti faire dan nou lepok, li ti dire ki enn parmi bann defaut ki pli commun zordi, c’est kan bann dimoune faire traitre ar lezot. Nou bizin attann pou trouve enn kitsoz coumsa. Kan Jésus ti donne signe concernant “conclusion sa systeme-la,” li ti dire: “Beaucoup . . . pou faire traitre sakenn ar so camarade.” (Mat. 24:3, 10) “Faire traitre” vedir “livré [enn kikenn], ou-soit mette li dan la main enn l’ennemi ou-soit kan nou pa fidele envers li.” Kan bann dimoune pa fidele coumsa, sa montré ki nou pé vive dan “dernier jour.” Paul ti annoncé ki dan lepok dernier jour, bann dimoune “pa pou fidele, . . . zot pou traitre.” (2 Tim. 3:1, 2, 4) Bann ecrivain ek bann ki faire film souvent presente dan enn fason interessant ek romantik bann scene kot bann dimoune pé faire traitre ar zot camarade. Mais dan la vie réel, bann action infidele ek bann trahison faire beaucoup di-tort ek faire lezot souffert. Sa bann action-la zot enn signe ki nou pé vive dan lepok la fin!

³ Ki bann leson nou kapav tiré dan la Bible lor l’exemple bann dimoune ki pa ti fidele dan le passé? Ki bann dimoune ki finn montré zot fidelité envers lezot nou kapav imité? Ek ar kisannla nou bizin bien decidé pou reste fidele? Anou reponn sa bann question-la.

BANN L’EXEMPLE DAN LE PASSÉ KI AVERTI NOU

4. Couma Dalila ti faire traitre ar Samson, ek kifer sa ti bien mauvais?

⁴ Premierement, anou prend l’exemple enn traitre ki ti appel Dalila, enn madame ki juge Samson ti content. Samson ti bien envie faire la guerre kont bann Philistin pou defann peuple Bondié. Cinq dirigeant Philistin kitfois ti koné ki Dalila pa ti ena enn vrai l’amour pou Samson. Alors, zot ti offert li enn gros somme l’argent pou decouvert secret Samson ek koné kifer li ti ena enn la force extraordinaire; lerla zot ti pou kapav touye li. Dalila ti content l’argent, alors li ti accepté seki bannla ti offert li. Trois fois li ti essaye decouvert secret Samson sans ki li ti reussi. Li ti contigne fatigue li “touletan par so bann parole ek li ti contigne mette pression lor li.” Finalement, Samson “ti perdi patience ziska ki li ti envie mort.” Lerla, Samson ti dire Dalila ki jamais finn coupe so cheveux ek si faire sa, li pou perdi so pouvoir.a Kan Dalila ti konn sa, li ti faire rase la tête Samson kan li ti pé dormi lor so genou. Apré sa, li ti livré Samson ar so bann l’ennemi pou zot faire seki zot envie avek li. (Juges 16:4, 5, 15-21) Seki Dalila ti faire ti vrai-mem mauvais, pa vrai? Parski li ti gourmand l’argent, Dalila ti faire traitre ar enn kikenn ki ti content li.

5. (a) Couma Absalom ti montré ki li pa ti fidele envers David, ek ki sa ti montré lor li? (b) Ki David ti ressenti kan Ahithophel ti faire traitre ar li?

⁵ Anou prend l’exemple enn lot traitre ki ti appel Absalom. Li ti ena enn grand l’ambition, li ti bien decidé pou tire so papa, le roi David, lor trone ek pou vinn le roi dan so place. D’abord, Absalom “ti kokin leker bann zom Israël” kan li ti pretann ki li ti content zot ek li ti faire zot bann fausse promesse. Li ti maye zot ek li ti embrasse zot, coumadir li ti bien interessé ar zot ek ar seki zot ti bizin. (2 Sam. 15:2-6) Absalom ti mem reussi faire Ahithophel faire traitre ar David ek vinn ensam avek li dan so rebellion, alors ki David ti ena confiance dan sa conseiller-la. (2 Sam. 15:31) Dan Psaumes 3 ek 55, David ti ecrire couma sa trahison-la ti faire li souffert. (Ps. 3:1-8; lire Psaume 55:12-14.) Absalom ti montré ki li pa ti ena okenn respé pou souveraineté Bondié kan li ti faire sa complot-la kont le roi ki Jéhovah ti’nn etabli. (1 Chron. 28:5) A la fin, so complot pa ti marché ek David ti contigne dirigé couma le roi ki Jéhovah ti’nn oint.

6. Couma Judas ti trahir Jésus, ek couma bann dimoune servi so nom zordi?

⁶ Asterla, reflechi lor l’exemple Judas Iscariote ki ti faire traitre ar Jésus Christ. Pendant dernier Pâque ki Jésus ti celebré avek so 12 zapotre, li ti dire zot: “Vrai-mem mo dire zot, enn parmi zot pou trahir moi.” (Mat. 26:21) Plitar, pendant la nuit, Jésus ti dire Pierre, Jacques ek Jean ki ti dan jardin Gethsémané: “Guetté! Sa kikenn ki pou trahir moi-la pé vini.” Desuite, Judas ti vinn dan jardin avek so bann complice, “ek li ti al droite lor Jésus ek ti dire li: ‘Bonjour Rabbi!’ ek li ti embrasse li avek enn grand tendresse.” (Mat. 26:46-50; Luc 22:47, 52) Judas ti “trahir di-sang enn innocent” kan li ti livré Jésus ar so bann l’ennemi. Comié l’argent Judas ti gagné pou trahir Jésus? Zis 30 piece l’argent! (Mat. 27:3-5) Depuis sa, bann dimoune inn servi nom Judas pou decrire enn “traitre” surtout enn kikenn ki trahir so prop camarade.b

7. Ki bann leson nou finn aprann ar l’exemple (a) Absalom ek Judas ek (b) Dalila?

⁷ Ki nou finn aprann ar sa bann l’exemple-la? Absalom ek Judas toulé-deux ti mort vilain parski zot ti faire traitre ar enn kikenn ki Jéhovah ti’nn oint. (2 Sam. 18:9, 14-17; Actes 1:18-20) Kan bann dimoune tann nom Dalila touletan zot pense enn kikenn ki pa ti fidele ek ki ti ena enn fausse l’amour. (Ps. 119:158) Alors, li vrai-mem bien important ki nou rejette tendance pou ena l’ambition ek l’amour pou l’argent, bann defaut ki kapav faire nou perdi faveur Jéhovah! Pena pli grand leson ki kapav aide nou pou pa faire traitre ar lezot, pa vrai?

IMITE BANN KI FINN RESTE FIDELE

8, 9. (a) Kifer Yonathân ti promette David ki li pou reste fidele envers li? (b) Couma nou kapav imite Yonathân?

⁸ La Bible koz aussi lor beaucoup dimoune ki finn reste fidele. Anou examine deux parmi zot ek guetté ki nou kapav aprann ar zot l’exemple. Premierement, nou pou examine l’exemple enn zom ki ti montré so fidelité envers David. Yonathân, ki ti pli grand garson le roi Saül, normalement ti pou herite trone en Israël. Mais, Jéhovah ti choisir David pou vinn prochain le roi en Israël. Yonathân ti respecté decision Bondié. Li pa ti jaloux ek pa ti considere David couma enn rival. Au contraire, “nâme Yonathân ti attache avek nâme David” kan li ti promette David ki li pou reste fidele envers li. Li ti mem donne David so linge, so l’epée, so l’arc ek so ceinture. Kan li ti faire sa, li ti pé donne David l’honneur ki enn le roi merité. (1 Sam. 18:1-4) Yonathân ti faire tou seki li kapav pou ‘fortifié la main David.’ Li ti al mem ziska riské so prop la vie pou prend part David devant Saül. Avek fidelité Yonathân ti dire David: “Toi, to pou vinn le roi lor Israël, ek moi, mo pou vinn deuxieme apré toi.” (1 Sam. 20:30-34; 23:16, 17) Li pa etonnant ki apré la mort Yonathân, David ti exprime so tristesse ek so l’amour pou li dan enn chanté bien triste.​—2 Sam. 1:17, 26.

⁹ Yonathân ti koné ar kisannla li ti bizin reste fidele. Li ti soumette-li dan enn fason complet ar Souverain l’univers, Jéhovah, ek li ti soutenir David parski li ti koné ki Bondié ti’nn choisir li. Azordi aussi pareil, mem si pa finn donne nou enn privilege special dan congregation, nou bizin disposé pou soutenir bann frere ki Jéhovah inn etabli pou prend la tête parmi nou.​—1 Thess. 5:12, 13; Héb. 13:17, 24.

10, 11. (a) Kifer Pierre ti montré so fidelité kan li pa ti abandonne Jésus? (b) Couma nou kapav imite Pierre, ek ki sa bizin pousse nou pou faire?

¹⁰ Enn lot bon l’exemple ki nou pou examiné, c’est l’exemple l’apotre Pierre, ki ti promette pou reste fidele envers Jésus. Jésus ti servi enn langage symbolik bien cri, pou mette l’accent lor l’importance pou manifesté la foi dan so la chair ek so di-sang ki bientot li ti pou offert en sacrifice. Kan li ti dire sa, beaucoup so bann disciple ti trouve sa bann parole-la choquant, ek zot ti abandonne li. (Jean 6:53-60, 66) Alors, Jésus ti tourne-li vers so 12 zapotre ek li ti demann zot: “Eski zot envie allé zot aussi?” C’est Pierre ki ti reponn: “Seigneur, vers kisannla nou pou allé? C’est toi ki ena bann parole la vie eternel; ek nou finn croire ek nou finn arrivé koné ki to-mem sa kikenn ki saint-la ek ki sorti kot Bondié.” (Jean 6:67-69) Eski sa vedir ki Pierre ti comprend tou seki Jésus ti dire concernant sacrifice ki Li ti pré pou faire? Kitfois non. Malgré sa, Pierre ti bien decidé pou reste fidele envers Garson Bondié, ki ti oint ar l’esprit saint.

¹¹ Pierre pa ti pensé ki kitfois Jésus ti’nn faire enn erreur ek ki avek le temps, Li ti pou corrige seki Li ti dire. Au contraire, avek humilité Pierre ti reconette ki Jésus ti ena “bann parole la vie eternel.” Zordi, couma eski nou reagir kan nou trouve enn l’idée ki difficile pou comprend ou-soit ki pa en accord avek seki nou pensé, dan bann publication ki “l’intendant fidele” inn publié? Nou bizin faire bann grand zeffort pou essaye comprend sa l’idée-la au lieu ki nou zis attann ki ena enn changement ki pou en accord avek seki nou pensé.​—Lire Luc 12:42.

RESTE FIDELE ENVERS OU CONJOINT

12, 13. (a) Couma enn dimoune kapav arrivé trahir so conjoint? (b) Kifer l’age enn dimoune pa enn excuse pou commette l’adultere?

¹² Trahir enn dimoune dan n’importe ki fason c’est enn kitsoz ki bien mauvais. Fodé pa nou laisse enn action coumsa affecté la paix ek l’unité ki ena dan enn famille chretien ou-soit dan congregation. Avek sa pensée-la dan nou l’esprit, anou guetté ki nou bizin faire pou contigne reste fidele envers nou conjoint ek nou Bondié.

¹³ L’adultere c’est enn parmi bann trahison ki faire plus di-tort. Sa dimoune ki’nn commette l’adultere-la finn casse so l’engagement kan li’nn vinn infidele envers so conjoint ek li’nn donne so l’attention ek so l’affection enn lot dimoune. Conjoint innocent-la li, enn sel coute li trouve-li tousel ek so la vie devire enba-la-haut. Couma sa kapav arrivé entre deux dimoune ki enn lepok ti content sakenn so camarade? Souvent sa commencé kan bann conjoint nepli interessé ar sentiment zot camarade. Gabriella Turnaturi, enn professeur sociologie, expliké ki kapav ena trahison dan enn couple si toulé-deux conjoint arrete faire tou seki zot kapav pou fortifié zot relation. Sa kapav arrivé mem dan bann couple kot bann conjoint finn gagne plus ki 40 an. Par exemple, enn missié ki ti ena 50 an ek ki ti marié depuis 25 an, ti divorce avek so madame ki ti fidele. Li ti faire sa pou li kapav vive avek enn lot femme ar ki li ti attiré. Certain dire ki li normal pou ena enn conduite coumsa dan sa l’age-la, zot appel sa crise quarantaine. Selman, sa li pa enn excuse. Mais, au lieu ki nou faire croire ki c’est enn kitsoz ki nou pa kapav evité, anou appel sa seki li été vrai-mem: enn trahison.c

14. (a) Ki Jéhovah ressenti kan enn kikenn faire traitre ar so conjoint? (b) Ki Jésus ti dire concernant fidelité dan enn mariage?

¹⁴ Ki Jéhovah ressenti kan certain quitte zot conjoint sans okenn raison biblik? Bondié “haïr divorce,” ek Li finn prononce bann parole bien severe kont bann ki maltraite ek ki abandonne zot conjoint. (Lire Malaki 2:13-16.) Jésus aussi ena mem sentiment ki so Papa. Li ti enseigné ki enn dimoune pa kapav rejette ou-soit abandonne enn conjoint innocent ek faire coumadir nanyin pa’nn arrivé.​—Lire Matthieu 19:3-6, 9.

15. Couma bann conjoint kapav faire zot fidelité vinn pli solide?

¹⁵ Couma bann ki marié kapav contigne reste fidele envers zot conjoint? Parole Bondié dire: “Trouve la joie avek femme [ou-soit mari] ar ki to’nn marié depuis to jeunesse” ek, “vive to la vie avek femme [ou-soit mari] ki to content.” (Prov. 5:18; Eccl. 9:9) Kan toulé-deux conjoint pé vieilli ensam, zot bizin faire tou pou fortifié zot relation lor plan physik ek sentimental. Sa vedir ki toulé-deux bizin prend compte sakenn so camarade, passe le temps sakenn ar so camarade, ek vinn proche sakenn ar so camarade. Zot bizin faire tou pou protege zot mariage ek zot relation avek Jéhovah. Pou zot kapav faire sa, bann couple bizin etudié la Bible ensam, travail souvent dan predication ensam, ek prié ensam pou gagne benediction Jéhovah.

RESTE FIDELE ENVERS JÉHOVAH

16, 17. (a) Couma kan enn kikenn inn exclu dan nou famille ou-soit dan congregation, sa kapav testé nou fidelité envers Jéhovah? (b) Ki l’exemple montré ki nou gagne bann bon resultat kan nou obeir commandement Jéhovah pou pa frequente enn membre nou famille ki’nn exclu?

¹⁶ Ena bann membre congregation ki ti faire bann peché grave ek ti bizin discipline zot “dan enn fason severe, pou ki zot vinn fort dan la foi.” (Tite 1:13) Certain finn exclu a cause zot conduite. Bann ki finn laisse discipline ‘forme zot,’ inn ré-vinn fort lor plan spirituel. (Héb. 12:11) Ki nou pou faire si enn membre nou famille ou-soit enn bon camarade inn exclu? Sa pou testé nou fidelité, pa envers sa dimoune-la, mais envers Jéhovah. Jéhovah pé guetté si nou pou obeir so commandement pou coupe tou contact avek n’importe kisannla ki’nn exclu.​—Lire 1 Corinthiens 5:11-13.

¹⁷ Anou guette enn l’exemple ki montré ki bon resultat enn famille kapav gagné kan li soutenir disposition ki Jéhovah inn prend pou pa frequente enn membre la famille ki’nn exclu. Enn jeune frere ti’nn exclu pendant plus ki dix an. Pendant tou sa le temps-la, so papa, so mama, ek so quatre frere ti’nn “arrete frequente” li. Parfois, li ti essaye passe le temps avek zot dan zot l’activité, mais chaque membre la famille ti bien decidé pou pa gagne okenn contact avek li. Apré ki li ti reintegré, li ti dire ki parski li pa ti kapav frequente so famille, sa ti mank li beaucoup surtout a-soir kan li ti tousel. Mais li ti reconette ki si so famille ti contigne frequente li, mem enn tigit, sa ti contact-la ti pou assez pou li. Mais selman, parski li pa ti gagne mem enn ti contact avek okenn membre so famille, sa grand desir pou retrouve so famille-la ti pousse li pou retabli so relation avek Jéhovah. Reflechi lor la si jamais ou tenté pou desobeir commandement Jéhovah ek frequente enn membre ou famille ki’nn exclu.

18. Apré ki nou finn examine bann bienfait ki nou gagné kan nou reste fidele ek bann consequence kan nou infidele, ki ou bien decidé pou faire?

¹⁸ Nou pé vive dan enn le monde kot beaucoup dimoune pa fidele ek faire traitre ar zot camarade. Pourtant, dan congregation nou kapav trouve plusieurs l’exemple bann dimoune fidele ki nou kapav imité. Coumadir zot conduite koz pou zot ek dire: “Zot temoin, ek Bondié aussi, ki quantité nou finn montré-nou fidele, juste ek sans reproche envers zot, bann croyant.” (1 Thess. 2:10) Alors, anou contigne reste toujours fidele envers Bondié ek envers sakenn nou camarade.

[Notes]

[Zimage page 16]

Pierre ti reste fidele envers Garson Bondié ki ti oint ar l’esprit saint, mem si lezot ti rejette Li