Eski ou pé reflete la gloire Jéhovah?
“Pareil couma bann la glace, nou reflete la gloire Jéhovah.”—2 COR. 3:18.
COUMA OU POU REPONN?
Malgré nou l’imperfection, couma nou kapav glorifié Jéhovah?
Couma nou bann la priere ek bann reunion aide nou pou reflete la gloire Bondié?
Ki kapav aide nou pou contigne glorifié Jéhovah?
1, 2. Kifer eski li raisonnable pou pensé ki nou kapav imite bann qualité Jéhovah?
DAN enn fason ou enn lot, nou tou nou ressemblé nou bann parent. Alors, sa pa etonne nou si nou tann enn dimoune dire enn garson: ‘To ressemblé net to papa.’ Ou-soit enn dimoune dire enn tifi: ‘To faire moi rappel to mama.’ Ek bann zenfant souvent imite seki zot parent faire. Mais ki nou kapav dire lor nou? Eski nou kapav imite nou Papa ki dan le ciel, Jéhovah? Mem si nou pa finn trouve Li, nou kapav aprann lor so bann qualité extraordinaire kan nou etudié so Parole, kan nou observe la creation ek aussi kan nou medite lor bann verset biblik, surtout lor seki so Garson, Jésus Christ, ti dire ek faire. (Jean 1:18; Rom. 1:20) Alors, li possible pou reflete la gloire Jéhovah.
2 Avant ki Bondié ti crée Adam ek Ève, Li ti ena confiance ki bann dimoune ti pou kapav faire so volonté, manifesté so bann qualité ek faire Li gagne la gloire. (Lire Genèse 1:26, 27.) Kan nou pé developpe l’attachement pou Bondié, nou bizin manifesté bann qualité nou Createur. Si nou faire sa, nou pou ena enn grand privilege pou reflete la gloire Bondié n’importe ki culture nou été, ki l’education nou’nn gagné, ek ki race nou été. Kifer? Parski “Bondié pa faire preference, mais dan n’importe ki nation, dimoune ki ena la crainte pou Li ek ki pratik la justice, Bondié accepté li.”—Actes 10:34, 35.
3. Ki bann chretien ressenti pendant ki zot pé servi Jéhovah?
3 Bann chretien oint reflete la gloire Jéhovah. L’apotre Paul ki ti oint avek l’esprit saint, ti ecrire: “Nou tou, alors ki nou avek enn figure ki nepli couvert ar enn voile, pareil couma bann la glace, nou reflete la gloire Jéhovah, nou transformé dan sa mem zimage-la, avek enn la gloire ki contigne augmenté.” (2 Cor. 3:18) Kan prophete Moïse ti desann montagne Sinaï avek bann tablette roche kot ti ena bann Dix Commandement, so figure ti pé brillé avek bann rayon la lumiere parski Jéhovah ti’nn koz avek li. (Ex. 34:29, 30) Mem si bann chretien pa’nn faire mem l’experience ki Moïse ek bann rayon la lumiere pa pé sorti lor zot figure, zot gagne enn grand la joie kan zot koz ar lezot lor Jéhovah, lor so bann qualité ek lor projet extraordinaire ki Li ena pou bann dimoune. Alors, pareil couma bann la glace en metal ki ti ena dan le passé, bann chretien oint ek bann chretien ki ena l’esperance pou vive lor la terre, reflete la gloire Jéhovah dan zot la vie ek dan zot ministere. (2 Cor. 4:1) Eski ou pé reflete la gloire Jéhovah kan ou amenn enn la vie ki faire Li plaisir ek kan ou participe regulierement dan predication?
NOU ENVIE REFLETE LA GLOIRE JÉHOVAH
4, 5. (a) Pareil couma Paul, kont ki kitsoz nou bizin lutté? (b) Couma peché affecté nou?
4 En tant ki bann serviteur Jéhovah, pena doute ki nou envie honore ek glorifié nou Createur dan tou kitsoz ki nou faire. Mais, bien souvent nou pa reussi faire seki nou envie. Paul aussi ti bizin faire face ar sa probleme-la. (Lire Romains 7:21-25.) Paul ti expliké kifer nou ena enn la lutte coumsa pou faire. Li ti ecrire: “Tou dimoune inn faire peché ek zot pa reussi arrive ziska la gloire Bondié.” (Rom. 3:23) Oui, l’humanité finn herite peché Adam ek inn vinn esclave peché, ki pé regne lor zot couma enn le roi bien cruel.—Rom. 5:12; 6:12.
5 Ki été peché? C’est n’importe ki kitsoz ki contraire ar personnalité Jéhovah, so bann fason agir, so bann principe ek so volonté. Peché gate relation ki enn dimoune ena avek Bondié. Peché faire nou rate nou l’objectif, pareil couma enn dimoune ki pé tire enn coute fleche ek rate so l’objectif. Nou kapav faire peché par expré ou-soit par erreur. (Nomb. 15:27-31) Peché ena enn grand l’influence lor bann dimoune ek li mette enn barriere entre zot ek zot Createur. (Ps. 51:5; Is. 59:2; Col. 1:21) Alors, la plupart dimoune vive dan enn fason ki eloigne-zot net ar Jéhovah ek zot rate grand privilege pou reflete la gloire Bondié. Pena nanyin ki ena enn pli mauvais l’effet lor bann dimoune ki peché.
6. Mem si nou bann dimoune ki faire peché, couma nou kapav reflete la gloire Bondié?
6 Mem si nou finn né avek peché, Jéhovah finn montré ki Li enn “Bondié ki donne l’esperance.” (Rom. 15:13) Li finn prend bann disposition pou libere nou ar peché—sacrifice so Garson, Jésus Christ. Kan nou ena la foi dan sa sacrifice-la, nou nepli “esclave peché,” mais nou kapav reflete la gloire Jéhovah. (Rom. 5:19; 6:6; Jean 3:16) Si nou contigne garde sa bon relation-la avek Bondié, nou ena garantie ki Li pou beni nou asterla. Ek dan l’avenir, Li pou faire nou vinn parfait ek Li pou donne nou la vie eternel. Mem si nou encore bann dimoune ki faire peché, c’est vrai-mem enn benediction ki Bondié considere nou couma bann dimoune ki kapav reflete so la gloire!
REFLETE LA GLOIRE BONDIÉ
7. Ki nou bizin reconette pou ki nou kapav reflete la gloire Bondié?
7 Pou nou kapav bien reflete la gloire Bondié, nou bizin reconette dan enn fason honnete ki nou imparfait. (2 Chron. 6:36) Nou bizin reconette sa ek faire tou pou controle sa tendance-la, lerla nou pou glorifié Bondié pli bien. Par exemple, si nou finn prend l’habitude pou guette pornographie, enn peché ki deshonore Bondié, nou bizin reconette ki nou bizin l’aide lor plan spirituel—ek faire kitsoz pou gagne sa l’aide-la. (Jacq. 5:14, 15) Sa c’est premier kitsoz ki nou pou bizin faire si nou envie honore Bondié. En tant ki bann adorateur Jéhovah, nou bizin touletan examine-nou-mem ek guetté si nou pé vive en accord avek bann principe juste ki Li’nn donné. (Prov. 28:18; 1 Cor. 10:12) N’importe ki tendance nou ena pou faire peché, nou bizin contigne lutté pou controle zot, pou ki nou kapav reflete la gloire Bondié.
8. Mem si nou pa parfait, ki nou bizin faire?
8 Jésus ti sel dimoune ki’nn existé ki touletan ti faire Bondié plaisir ek ti reflete So la gloire ziska li mort. Mem si nou pa parfait pareil couma Jésus ti été, nou kapav ek nou bizin faire tou pou suive so l’exemple. (1 Pierre 2:21) Jéhovah remark bann zeffort ek bann progré ki nou faire, ek Li beni tou seki nou faire pou donne Li la gloire.
9. Couma la Bible aide bann chretien pou vive en accord avek bann principe Bondié?
9 Parole Jéhovah kapav aide nou pou ameliore-nou. Li bien important ki nou etudié la Bible en profondeur ek ki nou medite lor seki nou lire. (Ps. 1:1-3) Kan nou lire la Bible toulé-jour, sa aide nou pou ameliore-nou. (Lire Jacques 1:22-25.) Connaissance ki nou ena lor la Bible, c’est sa-mem base nou la foi ek li aussi fortifié nou determination pou evite faire enn peché grave ek pou faire plaisir Jéhovah.—Ps. 119:11, 47, 48.
10. Couma la priere kapav aide nou pou servi Jéhovah pli bien?
10 Pou reflete la gloire Bondié, nou bizin aussi “perseveré dan la priere.” (Rom. 12:12) Nou kapav ek nou bizin prié pou ki Jéhovah aide nou pou servi Li dan fason ki Li accepté. Pou faire sa, nou kapav demann Li pou donne nou so l’esprit saint, plus la foi, la force pou kapav resisté bann tentation, ek capacité pou “konn servi parole la verité couma bizin.” (2 Tim. 2:15; Mat. 6:13; Luc 11:13; 17:5) Pareil couma enn zenfant depann lor so papa, nou aussi nou bizin depann lor nou Papa ki dan le ciel, Jéhovah. Si nou demann Li pou aide nou servi Li pli bien, nou kapav sur ki Li pou aide nou. Fodé jamais nou pensé ki nou pé agace Li! Au contraire, dan la priere anou loué Li, remercié Li, rod so direction surtout dan bann l’epreuve, ek demann Li aide nou pou servi Li dan enn fason ki glorifié so nom ki saint.—Ps. 86:12; Jacq. 1:5-7.
11. Couma bann reunion aide nou pou reflete la gloire Bondié?
11 Bondié finn donne “l’esclave fidele et avisé” responsabilité pou prend soin so bann brebis ki ena valeur pou Li. (Mat. 24:45-47; Ps. 100:3) Sa l’esclave-la bien interessé ar fason ki bann chretien pé reflete la gloire Jéhovah. Bann reunion aide nou pou faire bann changement dan nou la vie, pareil couma enn tailleur corrige bann defaut dan nou linge pou ki nou parette pli joli. (Héb. 10:24, 25) Alors, anou faire zeffort pou arrive boner reunion. Si nou ena l’habitude pou arrive tard, nou pou rate enn partie conseil ki donné pou ameliore-nou en tant ki bann serviteur Jéhovah.
ANOU IMITE BONDIÉ
12. Couma nou kapav imite Bondié?
12 Pou nou kapav reflete la gloire Jéhovah, nou bizin “vinn bann dimoune ki imite Bondié.” (Éph. 5:1) Enn fason ki nou kapav imite Jéhovah c’est kan nou trouve bann kitsoz pareil couma Li. Si nou rod faire bann kitsoz dan nou prop fason, nou pou deshonore Li ek sa pou faire nou-mem di-tort. Le monde ki autour nou li enba l’influence enn mauvais l’esprit, Satan le Diable. Alors, nou bizin travail dur pou detesté tou seki Jéhovah detesté ek content seki Li content. (Ps. 97:10; 1 Jean 5:19) Nou bizin sur ki sel bon fason pou nou servi Bondié, c’est kan nou faire tou kitsoz pou glorifié Li.—Lire 1 Corinthiens 10:31.
13. Kifer nou bizin ena la haine pou peché, ek ki sa pou pousse nou pou faire?
13 Jéhovah ena la haine pou peché, ek nou aussi nou bizin ena mem la haine ki Li. Oui, nou bizin reste pli loin ki possible ar bann kitsoz ki kapav faire nou faire peché. Fodé pa nou essaye guetté ki quantité nou kapav kosté ar peché sans ki nou faire li. Par exemple, nou bizin faire attention pou nou pa tombe dan piege l’apostasie, enn peché ki pou empeche nou glorifié Bondié. (Deut. 13:6-9) Alors, anou reste loin ar bann apostat ou-soit n’importe kisannla ki pretann li enn frere mais ki ena enn conduite ki deshonore Bondié. Sa appliké mem si sa dimoune-la li enn membre nou famille. (1 Cor. 5:11) Nou pa pou gagne nanyin de bon si nou essaye montré bann apostat ou-soit bann ki critik l’organisation Jéhovah, ki zot ena tort. En realité, li pa bon ek li bien dangereux lor plan spirituel ki nou lire bann kitsoz ki sa bann dimoune-la ecrire, ki li dan bann livre ou-soit lor Internet.—Lire Isaïe 5:20; Matthieu 7:6.
14. Kan nou pé essaye reflete la gloire Bondié, ki qualité bann dimoune bizin plus remarké en nou, ek kifer?
14 Kan nou manifesté l’amour c’est enn fason extraordinaire ki permette nou pou imite nou Papa ki dan le ciel. Oui, pareil couma Li, nou bizin content lezot. (1 Jean 4:16-19) En realité, l’amour ki ena parmi nou c’est enn signe ki montré ki nou bann disciple Jésus ek bann serviteur Jéhovah. (Jean 13:34, 35) Mem si parfois a cause nou l’imperfection li difficile pou manifesté l’amour, nou bizin mette nou bann tendance imparfait enn coté, ek manifesté l’amour touletan. Kan nou developpe l’amour ek lezot qualité spirituel, sa pou empeche nou pou faire peché ek pou agir dan enn mauvais fason.—2 Pierre 1:5-7.
15. Ki l’effet l’amour ena lor nou relation avek lezot?
15 L’amour pousse nou pou faire le bien envers lezot dimoune. (Rom. 13:8-10) Par exemple, l’amour pou nou conjoint pou protege nou mariage kont l’adultere. L’amour pou bann ancien ek respé pou travail ki zot faire, pou aide nou pou obeir zot ek pou soumette ar zot direction. Bann zenfant ki content zot bann parent, pou obeir ek pou honore zot. Zot pa pou koz en mal lor zot. Si nou content nou prochain, nou pa pou considere zot couma inferieur ar nou ou-soit nou pa pou mank respé envers zot dan nou parole. (Jacq. 3:9) Bann ancien ki content troupeau Bondié pou traite bann membre congregation avek tendresse.—Actes 20:28, 29.
16. Couma l’amour aide nou dan nou ministere?
16 Dan nou ministere aussi nou bizin manifesté l’amour. Parski nou bien content Jéhovah, nou pa pou laisse bann dimoune ki indifferent ou-soit opposé ar nou message decourage nou. Au contraire, nou pou contigne preche la bonne nouvelle. L’amour pou pousse nou pou prepare-nou bien ek pou faire zeffort pou vinn efficace dan nou ministere. Si vrai-mem nou content Bondié ek nou prochain, nou pa pou considere predication couma enn fardeau ou-soit faire li par simple devoir. Au contraire, nou pou considere nou ministere couma enn grand privilege ek nou pou accompli li avek la joie.—Mat. 10:7.
CONTIGNE GLORIFIÉ JÉHOVAH
17. Ki bienfait nou gagné kan nou reconette ki parfois nou pa reussi reflete la gloire Bondié?
17 Le monde en general pa conscient ki li grave pou faire peché, mais nou, nou pa coumsa. Sa faire nou trouve l’importance pou lutte kont nou bann tendance imparfait. Kan nou reconette nou l’imperfection, sa permette nou pou forme nou conscience pou ki li pousse nou pou agir bien kan enn mauvais desir pé commence developpé dan nou l’esprit ek nou leker. (Rom. 7:22, 23) Li vrai ki nou kapav faible, mais Bondié kapav fortifié nou pou nou faire seki bien dan n’importe ki situation.—2 Cor. 12:10.
18, 19. (a) Ki kitsoz aide nou pou reussi lutte kont bann mauvais l’esprit? (b) Ki nou bizin bien decidé pou faire?
18 Si nou envie glorifié Jéhovah, nou bizin aussi lutte kont bann mauvais l’esprit. Bondié inn donne nou enn l’equipement la guerre spirituel ki permette nou pou reussi faire sa. (Éph. 6:11-13) Satan pa pé arrete essaye kokin la gloire ki zis Jéhovah tousel merité. Satan le Diable pé aussi contigne faire tou seki li kapav pou detruire bann bon relation ki nou ena avek Jéhovah. Mais li vrai-mem enn grand defaite pou Satan kan nou ek plusieurs million lezot dimoune imparfait, bann zom, bann femme ek bann zenfant, pé reussi garde nou l’integrité ek pé glorifié Jéhovah! Alors, anou contigne loué Jéhovah, pareil couma bann creature spirituel ki dire: “To digne, Jéhovah, oui nou Bondié, pou gagne la gloire, l’honneur ek pouvoir, parski to finn crée tou kitsoz, ek a cause to volonté zot existé ek zot finn crée.”—Rév. 4:11.
19 Nou bizin bien decidé pou contigne glorifié Jéhovah, n’importe ki arrivé. Surement Li bien content ki sa quantité dimoune fidele-la pé faire tou seki zot kapav pou imite Li ek pou reflete so la gloire. (Prov. 27:11) Anou ena mem sentiment ki David, ki ti chanté: “Mo loué toi avek tou mo leker, o Jéhovah, mo Bondié, ek mo pou glorifié to nom pou touletan.” (Ps. 86:12) Nou pé attann avek impatience jour kan nou pou kapav reflete la gloire Jéhovah dan enn fason parfait ek kan nou pou kapav loué Li pou touletan! C’est sa l’experience-la ki bann dimoune obeissant pou faire. Eski ou pé reflete la gloire Jéhovah asterla, avek l’esperance pou faire sa pendant tou l’eternité?
[Zimage page 31]
Eski ou pé reflete la gloire Jéhovah dan sa bann fason-la?