Kouma Ou Kapav Fer Ou Deziem Maryaz Reisi?

Herman ek Linda kontan zot finn zwenn zot kamarad. Linda ki’nn divorse avek so premie misie, konsider Herman kouma so “sevalie.” Pourtan, toulede rekonet ki dan enn deziem maryaz kapav ena bann difikilte ki zame ti pou existe dan enn premie maryaz.b

Si ou’nn remarye, ki ou resanti konsernan ou deziem maryaz? Enn madam ki apel Tamara ek ki’nn remarye trwa-z-an apre so divors, dir: “Kan ou marye premie fwa, ou ena sa santiman spesial ki ou maryaz pou dire pou touletan. Me, kan ou remarye, kitfwa ou pa pou ena sa mem santiman-la parski ou touzour rapel ki ou premie maryaz pa’nn dire.”

Malgre sa, boukou koup ki’nn remarye finn konn enn gran boner ki’nn dire. Zot maryaz inn reisi​—ek pou ou’si kapav reisi! Me kouma? Anou examinn trwa difikilte ki souvan bann koup ki’nn remarye gagne, ek gete kouma bann prinsip Labib kapav ed ou pou fer fas ar sa bann difikilte-la.c

PREMIE DIFIKILTE: OU DONN PLIS LINPORTANS OU PREMIE MARYAZ.

Ellen ki res l’Afrique du Sud dir: “Li difisil pou mwa pou bliye bann souvenir mo premie maryaz, sirtou kan nou al dan bann mem landrwa kot mwa ek mo premie misie nou ti al an vakans. Parfwa, li arive ki mo konpar mo deziem misie avek mo premie misie.” Dan enn lot kote, si ou konzwin ti deza marye avan, kitfwa ou pou agase si souvan li koz lor so premie maryaz.

KI OU KAPAV FER?: Li bon ki ou realist ek aksepte ki ni ou ni ou konzwin pa pou kapav bliye zot premie maryaz, sirtou si sa maryaz-la inn dir plizir lane. Ofet, sertin rekonet ki san fer par expre, zot inn apel zot deziem konzwin par nom zot premie konzwin! Ki ou kapav fer dan bann sitiasion koumsa? Labib donn sa konsey-la: “Esey konpran sakenn so kamarad.”​—1 Pierre 3:8, New Century Version.

Pa les zalouzi fer ou anpes ou konzwin koz lor so premie maryaz. Si li anvi fer sa, pran letan pou ekout li avek konpasion. Osi, pa tir konklizion vit-vit ki li pe konpar ou avek so premie konzwin. Ian ki’nn remarye inn gagn di-z-an, dir: “Kan mo koz lor mo premie madam, zame Kaitlyn, mo deziem madam ti konsider sa kouma enn size tabou. Plito, li ti konsider sa kouma enn lokazion pou kone ki’nn fer mwa vinn kouma mo ete azordi.” Kitfwa ou pou mem trouve ki sa bann konversasion-la pou ed ou vinn pli pros ar ou nouvo konzwin.

Konsantre-ou lor bann bon kalite ki ou nouvo konzwin ena. Li vre ki kitfwa ou nouvo konzwin pena sertin kalite ouswa kapasite ki ou premie konzwin ti ena. Selman, kitfwa li pli bon dan lezot domenn. Alor, fer ou relasion avek ou nouvo konzwin vinn pli for kan ou reflesi lor bann kalite ki li ena ek apresie sa bann kalite-la “san ki [ou] konpar li avek enn lot.” (Galates 6:4) Enn misie ki apel Edmond ek ki’nn marye de fwa dir: “Parey kouma pena de lamitie ki resanble, parey pena de maryaz ki resanble.”

Ki ou kapav fer pou pa les bann bon souvenir ki ou’nn ena avek ou premie konzwin bles santiman ou nouvo konzwin? Jared dir: “Enn fwa mo’nn explik mo madam ki mo premie maryaz se kouma enn zoli liv ki mwa ek mo premie madam nou’nn ekrir. Detanzantan, li arive ki mo relir sa liv-la ek pans lor bann bon moman ki nou’nn pase ansam. Me mo pa viv dan sa liv-la. Plito, mwa ek mo nouvo madam nou pe ekrir nou prop liv ek asterla, se dan sa liv-la ki mo pe viv dan lazwa.”

DEZIEM DIFIKILTE: PA KONE KOUMA POU AZIR KAN OU AVEK BANN KAMARAD KI PA TRO KONN OU NOUVO KONZWIN.

Javier ki’nn remarye si-z-an apre so divors, dir: “Pandan enn moman apre nou maryaz, mo madam ti ena linpresion ki enn-de mo bann kamarad ti pe examinn li ek teste li pou get so reaksion.” Leo ki ti dan enn sitiasion diferan rakonte: “Sertin ti dir mo madam ziska ki pwin zot ti kontan ek ti mank so premie misie​—tousala, devan mwa!”

KI OU KAPAV FER?: Esey met ou dan plas ou bann kamarad. Ian, ki nou’nn site avan, dir: “Mo panse bann ki kamarad avek enn koup, parfwa trouv sa bien difisil ek bizar pou frekant zis enn ladan.” Alor, “vinn rezonab ek montre douser anver tou” dimounn. (Tite 3:2) Donn letan ou bann kamarad ek ou bann fami pou adapte zot ar ou nouvo sitiasion. Parey kouma ou maryaz inn sanze, ou kapav osi ena bann sanzman dan ou lamitie. Javier, ki nou’nn site avan, dir ki amezir ki letan pase, li ek so madam inn koumans frekant bann ansien kamarad. Li dir osi: “Me antan ki koup, nou’nn osi esey fer bann nouvo kamarad, ek sa ti ed nou.”

Pran kont bann santiman ou nouvo konzwin kan ou ansam avek bann ansien kamarad. Par exanp, si konversasion vinn lor ou premie maryaz, servi takt ek bon zizman pou ki ou konzwin pa santi li apar. Enn proverb Biblik dir: “Si enn dimounn koze san reflesi, alor, so bann parol kapav bles [lezot] koumadir li pe donn kout lepe. Me enn dimounn ki saz fer atansion ar seki li dir. So bann parol kapav geri sa bann blesir-la.”​—Proverbes 12:18, Holy Bible​—Easy-to-Read Version.

TRWAZIEM DIFIKILTE: FER KONFIANS OU NOUVO KONZWIN PARSKI OU PREMIE KONZWIN TI INFIDEL.

Andrew ki so premie madam inn kit li, dir: “Mo ti per ki enn kikenn retronp mwa ankor.” Plitar, li ti marye avek so nouvo madam ki apel Riley. Li dir: “Souvan mo ti demann momem si enn zour mo pou kapav vinn enn bon mari parey kouma Riley so premie misie. Mo ti mem trakase tansion li panse ki mo pa ase bon pou li, ek kit mwa pou al avek enn lot dimounn.”

KI OU KAPAV FER?: Pa ezite pou dir ou konzwin seki trakas ou. Labib dir: “Bann plan pa reisi kan pena okenn diskision konfidansiel.” (Proverbes 15:22) Alafin, bann diskision konfidansiel ti ed Andrew ek Riley pou fer konfians sakenn so kamarad. Andrew dir: “Mo ti dir Riley ki pou mwa, divors zame ti enn mwayin fasil pou sorti dan bann problem, ek Riley ti rasir mwa kan li ti dir mwa ki li’si li pans parey. Tigit-tigit, mo’nn arive fer li foul konfians.”

Si ou nouvo konzwin so premie konzwin ti tronp li, fer tou seki ou kapav pou gagn so konfians. Par exanp, Michel ek Sabine, ki divorse toule-de, ti dakor pou inform zot kamarad si zot gagn kit kontak avek zot ex-konzwin. Sabine dir: “Sa langazman ki nou ti pran anver nou kamarad la ti fer nou santi nou an sekirite.”​—Éphésiens 4:25.

Boukou deziem maryaz inn reisi, ek pou ou’si kapav reisi. Apre tou, konpare avek premie fwa ki ou ti marye, kitfwa ou konn oumem inpe plis. Andrew, ki nou’nn site avan, dir: “Mo’nn gagn enn gran rekonfor gras-a mo maryaz avek Riley. Apre 13 an maryaz, nou’nn vinn bien pros​—enn relasion ki nou pa anvi perdi zame.”