Obeir Bann Berze Ki Jéhovah Inn Etabli

1, 2. Kifer Jéhovah konpar Limem ar enn berze?

JÉHOVAH konpar Limem ar enn berze. (Ézék. 34:11-14) Sa ed nou pou konpran kouma Jéhovah ete. Enn berze ki ena lamour santi li responsab pou lavi so bann brebi ek li veye ki zot bien. Li gid zot dan bann plas kot zot pou gagn manze ek delo (Ps. 23:1, 2); li vey lor zot lanwit-lizour (Luc 2:8); li protez zot kont bann zanimo sovaz (1 Sam. 17:34, 35); li sarye bann ki’nn fek ne (Is. 40:11); li rod bann ki’nn perdi, ek li pran swin bann ki’nn blese.​—Ézék. 34:16.

² Dan lepase, laplipar serviter Jéhovah ti bann berze ek bann planter. Alor, zot ti konpran kifer Jéhovah ti konpar Limem ar enn berze ki ena lamour. Zot ti kone ki bizin pran swin enn brebi ek okip li pou li kapav ena enn bon lasante. Li parey osi pou bann dimounn lor plan spiritiel. (Marc 6:34) Zot soufer kan pa pran zot kont lor plan spiritiel ek kan zot pena enn bon direksion. Zot vinn frazil ek zot kapav koumans fer bann move kitsoz​—zot al partou-partou parey kouma “bann brebi ki pena berze.” (1 Rois 22:17) Me selman, avek amour Jéhovah donn so bann serviter seki zot bizin.

3. Ki nou pou examine dan sa lartik-la?

³ Mem dan nou lepok, nou konpran kouma Jéhovah azir kouma enn berze. Nou trouve ki Jéhovah pe pran bien swin so bann serviter zordi. Anou gete kouma Li pe diriz so bann brebi ek kouma Li pe donn zot seki zot bizin. Nou pou examinn osi kouma bann brebi bizin reazir ar lintere ki Jéhovah ena pou zot.

EXSELAN BERZE ETABLI BANN ANSIEN

4. Kouma Jésus pran swin bann brebi Jéhovah?

⁴ Jéhovah inn etabli Jésus Christ kouma Sef kongregasion. (Éph. 1:22, 23) Jésus, “exselan berze,” li parey kouma so Papa. Li kontan bann brebi, li pran zot swin ek li’nn mem ‘donn so nam pou zot.’ (Jean 10:11, 15) Sakrifis Jésus vremem enn gran benediksion pou tou dimounn. (Mat. 20:28) Sa form parti dan proze Jéhovah ki “tou seki ena lafwa an [Jésus] pa detrir, me gagn lavi eternel.”​—Jean 3:16.

5, 6. (a) Kisannla Jésus finn etabli pou pran swin so bann brebi, ek ki bann brebi bizin fer pou gagn bann bienfe ar sa dispozision-la? (b) Pou ki rezon prinsipal nou bizin dispoze pou obeir bann ansien?

⁵ Kouma bann brebi montre ki Jésus Christ se zot Berze? Jésus ti dir: “Mo bann brebi ekout mo lavwa ek mo konn zot bien, ek zot swiv mwa.” (Jean 10:27) Bann brebi ekout lavwa Exselan Berze kan zot touletan swiv so direksion. Sa inplik ki zot korpere avek bann ansien ki li’nn etabli. Jésus ti dir ki so bann zapot ek so bann disip ti pou kontign travay ki li ti’nn koumanse. Zot ti pou “ansegn” ek ‘nouri bann ti brebi Jésus.’ (Mat. 28:20; lir Jean 21:15-17.) Amezir ki bann disip ti pe pres bonn nouvel dan pli boukou pei, pli boukou dimounn ti pe vinn bann disip Jésus. Alor, Jésus ti pran dispozision pou ki bann Kretien mir pran swin bann kongregasion.​—Éph. 4:11, 12.

⁶ Plitar, kan lapot Paul ti ekrir bann ansien ki ti dan kongregasion Éphèse, li ti dir zot ki se lespri sin ki finn etabli zot kouma bann sirveyan pou “pran swin kongregasion Bondie.” (Actes 20:28) Zordi osi, bann ansien etabli par lespri sin. Kifer nou kapav dir sa? Parski zot ranpli bann kondision neseser ki mansione dan Labib, ki finn inspire par lespri sin. Alor, kan nou obeir bann ansien, nou montre ki nou ena respe pou Jéhovah ek Jésus, de pli gran Berze. (Luc 10:16) Sa se rezon prinsipal kifer nou bizin dispoze pou obeir bann ansien. Me ena osi lezot rezon kifer nou bizin swiv zot direksion.

7. Kouma bann ansien ed nou pou gard bann bon relasion avek Jéhovah?

⁷ Kan bann ansien ankouraz zot bann frer ek ser ek donn zot enn direksion, zot touletan baz zot lor Labib ouswa lor bann prinsip ki ena dan Labib. Kan zot fer sa, zot pa pe rod diriz lavi zot bann frer ek ser. (2 Cor. 1:24) Okontrer, bann ansien anvi ed zot pou pran bann bon desizion ki baze lor Labib ek pou favoriz lord ek lape dan kongregasion. (1 Cor. 14:33, 40) Labib dir ki bann ansien pe ‘vey lor nou nam.’ Sa vedir ki bann ansien ena dezir pou ed sak manb dan kongregasion pou gard bann bon relasion avek Jéhovah. Alor, si zot trouve ki enn frer ouswa enn ser pe al fer, ouswa inn fini “fer enn fo pa,” zot pa pou tarde pou ed li. (Gal. 6:1, 2; Jude 22) Eski se pa bann bon rezon pou obeir ‘bann ki pe diriz nou’?​—Lir Hébreux 13:17.

8. Kouma bann ansien protez troupo Bondie?

⁸ Lapot Paul, ki ti enn berze spiritiel, ti ekrir so bann frer dan Colosses: “Fer atansion: kapav arive ki enn kikenn antrenn zot kouma so viktim par mwayin filozofi ek tronpri ki dan vid ek ki baze lor tradision bann zom, ek lor bann kitsoz debaz ki lemond ansegne me ki pena okenn rapor avek Christ.” (Col. 2:8) Sa lavertisman-la donn nou enn lot bon rezon kifer nou bizin obeir bann konsey baze lor Labib, ki bann ansien donn nou. Zot protez troupo Bondie kan zot met zot bann frer an gard kont bann ki rod afebli zot lafwa. Lapot Pierre ti averti bann Kretien ki “bann fos profet” ek “bann fos ansegnan” ti pou rod “atir bann dimounn ki pa stab” pou fer zot dezobeir Jéhovah. (2 Pierre 2:1, 14) Zordi osi bann ansien bizin donn mem lavertisman kan li neseser. Antan ki bann Kretien mir, zot ena lexperyans dan lavi. Anplis, Bondie finn etabli zot kouma ansien parski zot finn montre ki zot konpran bien Labib ek ki zot kalifie pou ansegn laverite ki sorti dan Labib. (1 Tim. 3:2; Tite 1:9) Zot ena matirite, lekilib ek sazes ki baze lor Labib, ek sa permet zot pou donn enn bon direksion zot bann frer ek ser.

EXSELAN BERZE NOURI EK PROTEZ BANN BREBI

9. Kouma Jésus donn enn direksion ek nouri kongregasion zordi?

⁹ Par so lorganizasion, Jéhovah donn tou nou bann frer ek ser dan lemond antie, nouritir spiritiel an-abondans. Nou gagn boukou konsey ki baze lor Labib dan nou bann piblikasion. Anplis, parfwa bann ansien gagn bann instriksion ar lorganizasion Jéhovah, swa atraver bann let, swa par bann sirveyan. Koumsa, bann brebi gagn enn direksion bien kler.

10. Ki responsabilite bann ansien ena konsernan bann ki’nn elwagne ar kongregasion?

¹⁰ Bann ansien ena responsabilite pou protez, nouri ek vey lor lasante spiritiel bann manb kongregasion, sirtou bann ki’nn afebli ouswa ki’nn tom malad lor plan spiritiel. (Lir Jacques 5:14, 15.) Kitfwa sertin parmi sa bann Kretien-la finn elwagne ar kongregasion ek inn aret servi Bondie. Dan sa sitiasion-la, ki enn ansien ki interes li ar so bann frer ek ser pou fer? Li pou fer tou seki li kapav pou al rod sak brebi ki’nn elwagne ek pou ankouraz li pou retourn dan kongregasion. Jésus ti dir: “Mo Papa ki dan lesiel pa anvi ki enn sel parmi sa bann tipti-la mor.”​—Mat. 18:12-14.

KOUMA NOU BIZIN KONSIDER LINPERFEKSION BANN ANSIEN?

11. Kifer sertin trouv sa difisil pou obeir bann ansien?

¹¹ Jéhovah ek Jésus, zot bann Berze parfe. Me bann ansien ki zot servi pou pran swin kongregasion, pa parfe. Akoz sa, sertin kapav trouv sa difisil pou obeir bann ansien. Kitfwa zot ena sa rezonnman-la: ‘Zot bann dimounn inparfe parey kouma nou. Kifer nou bizin ekout zot konsey?’ Li vre ki bann ansien inparfe. Me fode pa nou aret nou lor zot linperfeksion ek zot bann erer.

12, 13. (a) Dan lepase, ki erer bann serviter Bondie ki ti ena responsabilite ti fer? (b) Kifer Jéhovah ti fer ekrir dan Labib bann erer ki sa bann zom-la ti fer?

¹² Labib rekonet ki bann dimounn ki Jéhovah ti servi dan lepase pou diriz so pep, ti fer bann erer. Par exanp, Jéhovah ti swazir David pou vinn lerwa ek pou gid nasion Israël. Pourtan, plitar li ti komet ladilter ek li ti fer enn krim. (2 Sam. 12:7-9) Anou get osi lexanp lapot Pierre. Mem si li ti ena enn gran responsabilite dan kongregasion premie siek, li osi li ti fer bann erer bien grav. (Mat. 16:18, 19; Jean 13:38; 18:27; Gal. 2:11-14) Depi Adam ek Ève, pa finn ena personn ki parfe, apart Jésus.

¹³ Dan lepase, sertin serviter Jéhovah ki ti ena bann responsabilite ti fer bann erer. Kifer Jéhovah finn fer ekrir zot bann erer dan Labib? Enn parmi bann rezon, se parski Bondie anvi montre ki Li kapav servi bann dimounn inparfe pou gid so pep. An realite, samem ki Li’nn fer touletan. Alor, fode pa nou servi linperfeksion bann ansien kouma enn exkiz pou mirmire kont zot ouswa pou ignor zot lotorite. Jéhovah atann ki nou respekte sa bann frer-la ek nou obeir zot.​—Lir Exode 16:2, 8.

14, 15. Ki nou kapav aprann ar fason ki Jéhovah ti kominik ar so pep dan lepase?

¹⁴ Zordi, li bien inportan ki nou obeir bann ansien. Kifer? Reflesi kouma, dan lepase, Jéhovah ti kominik avek so pep dan bann moman bien difisil. Par exanp, kan pep Israël ti kit l’Égypte, Bondie ti donn zot bann instriksion bien inportan atraver Moïse ek Aaron. Pou ki zot gagn lavi sov kan ti ena diziem ple, bann Izraelit ti bizin obeir bann instriksion. Zot ti bizin fer enn manze spesial, touy enn mouton ek fann inpe so disan lor bann montan ek linto zot laport. Eski Bondie ti koz ar so pep pou donn zot sa instriksion-la direkteman depi lesiel? Non, me zot ti bizin ekout bann ansien dan Israël ki ti gagn bann instriksion presi ar Moïse. (Ex. 12:1-7, 21-23, 29) Dan sa sitiasion-la, Moïse ek bann ansien ti fer lepep konn bann instriksion Jéhovah. Zordi osi bann ansien fer parey.

¹⁵ Kitfwa ou kapav pans plizir lokazion ki mansione dan Labib kan Jéhovah ti donn bann instriksion atraver bann dimounn ouswa bann anz. Sa bann instriksion-la ti sov lavi so bann serviter. Dan tou sa bann sitiasion-la, Bondie ti deside pou donn sertin dimounn lotorite pou koz lor so nom ek dir so pep seki zot ti bizin fer dan bann sitiasion kritik. Eski ou pa panse ki Jéhovah pou fer parey kan pou ena Har-Maguédôn? Zordi, bann ansien ki ena responsabilite pou reprezant Jéhovah ouswa so lorganizasion, bizin fer bien atansion pou pa abiz lor lotorite ki zot inn gagne.

“ENN SEL TROUPO, ENN SEL BERZE”

16. Ki “parol” nou bizin ekoute?

¹⁶ Pep Jéhovah form “enn sel troupo” anba direksion “enn sel berze,” Jésus Christ. (Jean 10:16) Jésus ti dir ki li pou avek so bann disip “toulezour ziska lafin sa sistem-la.” (Mat. 28:20) Antan ki Lerwa dan lesiel, li ena enn kontrol total lor tou bann levennman ki pou ena avan ki li vini pou detrir lemond Satan. Pou nou gard nou linite ek pou nou res an sekirite dan troupo Bondie, nou bizin ekout ‘enn parol deryer nou’ ki dir nou kot nou bizin ale. Sa “parol[-la],” se seki lespri sin Bondie dir nou atraver Labib ek seki Jéhovah ek Jésus dir nou atraver bann zom ki zot inn etabli kouma ansien.​—Lir Isaïe 30:21; Révélation 3:22.

17, 18. (a) Ki danze pe menas troupo Bondie, me ki nou kapav sir? (b) Ki nou pou examine dan prosin lartik?

¹⁷ Labib dir ki Satan “kouma enn lion ki pe kriye ek ki pe rod kikenn pou devore.” (1 Pierre 5:8) Parey kouma enn zanimo sovaz ek voras, li pe espionn troupo Bondie, li pe rod enn lokazion pou sot lor bann ki pa fer atansion ouswa ki pe elwagne ar troupo Bondie. Sa se enn bon rezon kifer nou bizin res bien pros ar nou bann frer dan kongregasion ek ar ‘berze ek sirveyan nou nam.’ (1 Pierre 2:25) Konsernan bann ki pou gagn lavi sov kan pou ena gran detres, Révélation 7:17 dir: “Lagno [Jésus] . . . pou pran zot swin, ek pou gid zot ver bann lasours delo lavi. Ek Bondie pou souy tou larm dan zot lizie.” Eski kapav ena enn pli bon promes ki sa?

¹⁸ Apre ki nou finn examinn bann responsabilite bien inportan ki bann ansien ena, li bon ki nou demann noumem sa kestion-la: Kouma sa bann frer ki Bondie inn etabli la kapav fer sir ki zot pe tret bann brebi Jésus dan enn bon fason? Nou pou examinn repons sa kestion-la dan prosin lartik.