Nou Kapav Ere Depi Asterla Mem
ENN lavi kot personn pa tom malad, vinn vie, ouswa mor! Se enn lavi extraordiner, pa vre? Ou kapav konn enn lavi koumsa! Me zordi, nou tou nou ena bann problem ek bann difikilte. Ki kapav ed ou pou ere depi asterla mem? Labib kapav ed ou pou ena enn lavi ki ere ek ki agreab depi azordi. Anou gete kouma Labib kapav ed nou pou fer fas ar sertin difikilte.
KILTIV KONTANTMAN
Konsey Labib: “Ki lamour pou larzan pa determinn zot lavi, kontant zot avek seki zot ena.”—Ebre 13:5.
Dan lemond azordi, bann dimounn fer nou krwar ki ena boukou kitsoz ki nou bien bizin. Me selman, Labib dir ki nou kapav ‘kontant nou avek seki nou ena’. Kouma?
Rezet “lamour pou larzan.” Bann dimounn sakrifie zot lasante, zot fami, zot bann kamarad, zot bann valer moral, ek mem zot dignite. Kifer zot fer tousala? Zis parski zot “kontan larzan.” (1 Timote 6:10) Me eski sa li vo lapenn? An realite, enn dimounn ki kontan larzan ‘zame li pou satisfe.’—Ekleziast 5:10.
Bann dimounn pli inportan ki bann kitsoz. Li vre ki bann kitsoz materyel zot itil. Me enn kitsoz pa kapav kontan nou ouswa ena rekonesans pou nou; zis bann dimounn ki ena sa kapasite-la. Kan nou ena “enn vre kamarad” sa ed nou pou kiltiv kontantman.—Proverb 17:17.
NOU KAPAV ERE DEPI ASTERLA MEM KAN NOU SWIV BANN KONSEY KI ENA DAN LABIB
KONTIGN ANDIRE MALGRE ENN MOVE LASANTE
Konsey Labib: “Enn leker ki dan lazwa li enn bon medsinn.”—Proverb 17:22.
Parey kouma “enn bon medsinn,” lazwa kapav ed nou pou andir enn maladi. Me kouma nou kapav zwaye mem si nou ena enn move lasante?
Kiltiv rekonesans. Si nou zis pans lor nou bann problem, “okenn zour” pa pou bon. (Proverb 15:15) Okontrer, Labib dir “montre ki zot ena rekonesans.” (Kolosien 3:15, NW) Aprann pou apresie bann bon kitsoz ki ena dan lavi, mem bann ti kitsoz. Enn zoli kouse soley, enn ti labriz, enn sourir enn dimounn ki ou kontan. Eski sa bann ti kitsoz-la pa rann ou lavi pli zoli?
Fer kitsoz pou lezot. Mem si nou lasante pa bon, “ena plis lazwa kan done ki kan gagne.” (Zistwar Bann Apot 20:35, NW) Kan lezot remersie nou pou seki nou’nn fer, nou pou plis zwaye ek nou pa pou tro pans lor nou bann problem. Nou kapav amelior nou lavi kan nou ed lezot pou amelior zot lavi.
FER OU MARYAZ VINN SOLID
Konsey Labib: “Verifie bien bann kitsoz ki pli inportan.”—Filipien 1:10, NW.
Kan bann konzwin pa pas boukou letan ansam, sa kapav koumans kree enn distans ant zot. Bann mari ek bann fam pou montre ki zot ena sazes kan zot donn priorite zot maryaz, enn parmi bann kitsoz ki pli inportan dan lavi.
Fer bann kitsoz ansam. Olie ki sakenn fer bann kitsoz dan so kote, kifer zot pa organiz zot pou fer bann kitsoz ansam? Labib dir ki “de pli bon ki enn.” (Ekleziast 4:9) Ki zot kapav fer ansam? Zot kapav kwi enn manze, pas enn ti moman lamer, rilax ek bwar enn ti dite ansam ouswa rod enn aktivite pou fer ansam.
Exprim ou lamour pou ou konzwin. Labib ankouraz enn mari ek enn fam pou kontan ek respekte sakenn so kamarad. (Efezien 5:28, 33) Enn zoli sourir, may ou konzwin dan ou lebra, ouswa donn li enn ti kado, se bann ti kitsoz ki kapav fer ou maryaz vinn pli solid. Biensir, bann konzwin bizin rezerv bann relasion sexiel ek bann lezot plezir sexiel zis pou zot konzwin.—Ebre 13:4.