“Pu Bondye Tu Kitsoz Posib”
1 Pres mesaz Rwayom dan lemond antye, sa mem travay pli inportan pu kongregasyon Kretyin. (Matye 24:14) Sa li enn aktivite byin-byin gran. Dapre buku dimunn ki get nu, sa travay la demann plis resurs ki nu deza ena. Pu lezot, li paret preske inposib pu fer sa travay la parski dimunn bufonn nu, zot kont nu ek zot persekit nu. (Matye 24:9; 2 Timote 3:12) Pu bann ki ena dut, li inposib pu fer sa travay la. Me purtan, Zezi ti dir: “Pu Bondye tu kitsoz posib.”—Matye 19:26.
2 Bann Legzanp Pozitif pu Imite: Kan Zezi ti kumans so minister, li ti tusel fas ar lemond. Pu anpes li reysi so minister, so bann lennmi finn maltret li dan tu sort kalite fason, ziska ki zot finn mem tuy li. Purtan, alafin Zezi finn dir avek konfyans: “Mo finn ranport laviktwar lor lemond.” (Zan 16:33) Vremem, Zezi finn akonpli enn kitsoz ki personn pa ti pu krwar!
3 Parey kuma Zezi, so bann disip usi ti ena mem kuraz ek mem zel dan zot minister Kretyin. Buku finn gayn fwete ek bate, zot finn al dan prizon, ek zot finn mem perdi lavi. Malgre sa, zot ti “dan lazwa parski finn truve ki zot merit gayn maltrete pu so non.” (Akt 5:41) Mem ki zot sityasyon pa ti favorab, zot finn pres bon nuvel “ziska parti pli lwin lor later,” enn travay ki purtan ti paret inposib pu fer.—Akt 1:8; Kolosyin 1:23.
4 Kuma Nu Kapav Reysi Zordi:Nu’si, mem dan bann kondisyon byin-byin difisil, nu finn kontiyn nu travay predikasyon Rwayom avek zel. Malgre ki pe anpes nu prese, pe persekit nu, pe met nu dan prizon ek pe sey bann mwayin vyolan pu aret nu, sa pa anpes nu gayn bann bon rezilta. Kuma eski sa posib? “‘Pa par lafors bann larme, ni par pwisans, me par mo lespri,’ Zeova bann larme finn dir.” (Zekarya 4:6) Kan Zeova deryer nu, nanyin pa kapav aret nu travay!—Romin 8:31.
5 Kan nu prese, nu pena okenn rezon pu nu timid, uswa pu nu gayn per, uswa ankor pu santi ki nu pa kalifye. (2 Korintyin 2:16, 17) Nu ena tu bann bon rezon pu akseler predikasyon bon nuvel Rwayom. Avek led Zeova, nu pu akonpli seki “inposib”!—Lik 18:27.