Eski Ena enn Baryer Ki Anpes U Prese?
1 Laplipar dimunn amenn enn lavi byin sarze. Bann Temwin Zeova zot parmi bann dimunn ki pli okipe— zot etidye Parol Bondye, zot asiste bann reynion kongregasyon, ek zot partisip dan predikasyon. An plis, nu okipe avek nu travay, nu luvraz lakaz uswa nu devwar lekol, ek buku lezot responsabilite; tusala pran nu letan. Sa li sirtu difisil pu bann sef fami.
2 Parski lavi li difisil dan plizir landrwa, defwa bann sef fami bizin travay buku ek lite pu gayn zot lavi. Kan travay pran laplipar zot letan ek zot lenerzi, zot pa res nanyin pu depanse dan predikasyon. Pwiski zot oblize donn zot fami seki zot bizin lor plan materyel, buku kitfwa panse ki zot kapav partisip zis enn tigit mem dan predikasyon. (1 Tim. 5:8) Li vre ki zordi ena buku presyon pu gayn bann kitsoz neseser dan lavi. Me fode pa ki nu travay vinn enn baryer pu pres bon nuvel. (Mark 13:10) Alor, Li bon ki nu egzaminn nu sityasyon.
3 Pwiski lasenn lemond pe sanze tuletan, kitfwa enn sef fami kapav tante pu depans plis letan ki bizin dan travay, dan lespwar pu ramas plis kas pu bann letan dir. (1 Kor. 7:31) Mem si kan travay plis, sa kapav permet enn fami gayn plis kitsoz materyel uswa plis mwayin pu amize ek distrer, eski sa fami la pu konn plis boner ek kontantman, si li pe sakrifye letan ki ti bizin rezerve pu bann laktivite spirityel ek lasistans regilye dan reynion? Sirman nu pu anvi evit tu kitsoz ki kapav met nu lasante spirityel an danze. Li plito saz pu pran kont konsey Zezi pu ‘ramas bann trezor ki dan lesyel’ ek vinn “ris anver Bondye”.—Mat. 6:19-21; Lik 12:15-21.
4 Rod Bann Lintere Rwayom Avan Tu: Zezi finn anseyn so bann disip pu met bann kitsoz spirityel avan ninport ki kitsoz. Li finn ankuraz zot: “Fode ki zame zot trakase ek zot dir, ‘ Ki nu pu manze?’ uswa, ‘Ki nu pu bwar?’ uswa, ‘Ki nu pu mete?’” Kifer eski Zezi finn dir sa? Li explike: “Parski zot Papa dan lesyel kone ki zot bizin tu sa bann kitsoz la.” Si vremem nu krwar sa bann parol la, pa pu ena okenn baryer ki pu anpes nu fer seki Zezi finn dir apre: “Donk, kontiyn rod Rwayom ek so lazistis avan tu, ek tu sa bann lezot kitsoz la [kitsoz materyel ki neseser] zot pu gayne apre.” Bondye pu veye ki nu gayn sa bann kitsoz neseser la! (Mat. 6:31-33) Wi, pa asterla ki nu pu al pran bann traka anplis pu rod gayn nu lavi uswa pu viv enn lavi byin alez dan enn lemond ki byinto pe al fini.—1 Pyer 5:7; 1 Zan 2:15-17.
5 Nu travay pu nu gayn bann kitsoz ki nu bizin lor plan materyel. Me komye eski nu bizin? Lapot Pol finn ekrir: “Si nu ena manze ek linz, nu pu satisfe ar sa mem.” Eski nu pe rod gayn plis ki sa? Si wi, kitfwa nu pe rekolte deza bann konsekans ki Pol ti mansyone kan li ti donn sa lavertisman la: “Bann ki finn byin deside pu vinn ris, zot tom dan tantasyon, dan enn pyez ek dan buku bann dezir bet ek ki fer zot ditor, ki plonz bann dimunn dan destriksyon ek larwinn.” (1 Tim. 6:8, 9; Mat. 6:24; Lik 14:33) Kuma eski nu kapav kone si nu pe rod gayn tro ek si sa pe vinn enn baryer pu nu?
6 Si akoz nu travay nu pas zis enn tigit letan mem dan predikasyon uswa nu pa truv linportans pu fer bann sakrifis pu pres bon nuvel, abe la nu bizin reget nu bann priyorite. (Ebre 13:15, 16) Enn lavi buku pli sinp pu ed nu pu tir sa baryer ki anpes nu prese la. Kan nu servi nu letan ek nu lenerzi, nu bizin fer enn manyer ki lintere Rwayom li tuletan enn gran priyorite pu nu.
7 Travay Ki Pa Dan Vid: Bann parol Pol ankuraz nu pu tuzur ena “buku pu fer dan travay Senyer, parski [nu] kone ki nu travay pa dan vid devan Senyer.” (1 Kor. 15:58) Predikasyon Rwayom ek fer bann disip, sa mem prinsipal “travay Senyer”. (Mat. 24:14; 28:19, 20) Pu nu partisip plin-plin dan sa travay la, nu bizin prevwar enn letan pu prese sak semenn ek fer zefor pu pa servi sa letan la pu lezot aktivite. (Efe. 5:15-17) Lerla, ni travay ni okenn lot kitsoz pa pu vinn enn baryer pu nu minister.
8 Kan nu ofer nu mem pu partaz bann laverite ki ena dan Labib avek lezot, nu gut pli gran lazwa ki nu gayne kan nu done. (Akt 20:35) Si nu kontiyn travay predikasyon Rwayom, nu kapav get lavenir avek konfyans, “parski Bondye Li pa enn kikenn ki pena lazistis, ki pu bliye [nu] travay ek lamur ki [nu] finn montre pu so non.”—Ebre 6:10.