Eski U Fer U Par pu ki Rapor Servis Egzak?
1 Dan buku resi Labib ena bann sif presi, ki kapav ed nu pu gayn enn lide kler lor bann levennman ki’nn arive. Par egzanp, Gideonn ti gayn viktwar lor bann Madyann avek zis 300 zom. (Ziz 7:7) Anz Zeova ti tuy 185,000 solda Asiryin. (2 Ler. 19:35) Zur Lapantkot 33 N.L., anviron 3,000 dimunn ti batize. Ek enn tipe apre, kantite dimunn ki ti’nn vinn krwayan ti’nn ariv apepre 5,000. (Akt 2:41; 4:4) Sa bann resi la montre nu klerman ki bann serviter Bondye lontan ti fer zefor pu ranpli enn rapor konplet ek egzak.
2 Zordi, lorganizasyon Zeova demann nu pu met nu rapor predikasyon sak mwa. Si nu korper fidelman avek sa laranzman la, sa pu ede pu siperviz byin travay predikasyon. Bann rapor kapav montre ki laspe nu minister bizin pran kont, uswa kot sa bizin avoy plis proklamater. Dan kongregasyon, bann rapor servis ed bann ansyin pu kone kisannla kapav ogmant so predikasyon uswa kisannla bizin led. Bann rapor lor progre ki predikasyon pe fer ankuraz tu bann frer ek ser dan lemond. Eski u pe fer u par pu ki ena enn rapor egzak?
3 U Responsabilite Personel: Lafin dimwa, eski u gayn difikilte pu rapel ki u’nn fer dan predikasyon? Si wi, kifer eski u pa ekrir u laktivite sak fwa u al prese? Sertin servi enn kalandriye uswa enn karne. Lezot amenn avek zot enn fis rapor vid. Lafin dimwa, remet u rapor avek u sirveyan letid liv san tarde. Si u bliye donn u rapor, kontakte u sirveyan letid liv san tarde olye ki u atann ki li, li vinn koz ar u. Kan u fer zefor pu donn enn rapor pu u laktivite, sa montre ki u respekte laranzman ki Zeova finn pran. U montre usi ki u ena konsiderasyon pu bann frer ki ena responsabilite pu ramas ek konpil tu bann rapor.—Lik 16:10.
4 Rol Sirveyan Letid Liv: Kuma enn berze ki lor so gard ek ki ena konsiderasyon, sirveyan letid liv interes li ar laktivite ki so grup fer tutlong lemwa. (Pro. 27:23) Li kone si sak proklamater pe partisip byin, regilyerman ek si zot truv lazwa dan predikasyon. Ek si ena ki pa’nn prese pandan enn mwa, li propoz so led vit-vit. Defwa seki bizin se zis enn mo lankurazman, enn sigzesyon pratik, uswa enn linvitasyon pu akonpayn li dan predikasyon.
5 Lafin dimwa, sirveyan la pu asir li ki tu dimunn ki dan so grup finn fer zot enn devwar pu remet zot rapor. Kumsa sekreter kapav avoy filyal rapor egzak kongregasyon le sis, mwa prosin. Kan lafin dimwa pe koste, li pu bon ki sirveyan letid liv rapel so grup pu prepar zot rapor ek li bon usi ki ena bann fis rapor disponib dan letid liv. Si ena ki bliye pu donn so rapor, li kapav rapel zot ek ankuraz zot.
6 Si nu remet nu rapor san tarde, sa permet ki kont tu bann rapor pu gayn enn rapor egzak lor seki finn fer dan predikasyon. Eski u pu fer u par pu remet u rapor sak mwa san tarde?