“L’Obéissance pou Bondié” L’Assemblée District Bann Témoins de Jéhovah pou 2005
1 Jéhovah, nous Grand Instructeur, prend bann dispositions pou rassemblé nous ek pou enseigne nous pou marche dans so chemin. (Is. 30:20, 21; 54:13) Li faire sa à travers so esclave fidèle ek avisé, ki organise bann rassemblements pareil couma nou l’assemblée district ki faire chaque l’année. (Mat. 24:45-47) Nous éna même sentiment ki psalmiste David ki ti chanté: “Parmi bann la-foules rassemblé mo pou béni Jéhovah.” (Ps. 26:12) David ti bien comprend l’importance pou laisse li enseigné par Jéhovah ek li ti déterminé pou retrouve li parmi le peuple de Jéhovah chaque fois ki zot ti rassemblé.
2 Eski ou pou parmi ‘bann la-foules ki pou rassemblé’ pendant l’Assemblée District “L’Obéissance pou Bondié,” sa l’année-la? Si oui, sa bann renseignements-la pou aide ou dans ou préparation.
3 Asterla Même, Commence Préparé pou Assisté Toulé-Trois Jours l’Assemblée: “Bann plans enn kikenn ki faire zefforts, pou faire li gagne enn l’avantage.” (Prov. 21:5) Eski sa bann paroles-la pa mette l’accent lor l’importance pou prépare nous sans tardé? Pou ou sûr ki ou pa pou manque nanyin dans sa programme spirituel encourageant-la, li bon ki asterla même ou prend tou bann dispositions nécessaire pou assisté toulé-trois jours. Si ou bizin demann ou patron congé, faire li asterla même. Si ou bizin koz avec ou conjoint ki pa dans la vérité, pa atann dernier minute pou faire li. N’importe ki problème ou bizin faire façe, koz sa ar Jéhovah dans ou la-prière. Éna confiance ki avec so l’aide, “ou bann plans pou établi solidement.” (Prov. 16:3) En plus, li bon ki ou aide ou bann étudiants pou prépare zot pou ki zot kapav assisté tou bann sessions.
4 Bann Besoins Spécial: L’apôtre Paul ti décrire certains frères couma “enn aide ki fortifié” li. (Col. 4:7-11) Enn façon ki zot finn apporte zot l’aide, c’est kan zot ti rann li bann services personnel. En rapport avec l’assemblée, couma eski nous kapav vinn “enn aide ki fortifié” lézot? Kitfois, bann proclamateurs ki âgé, ki malade, bann ki dans service à plein temps, ek lézot frères ek soeurs, bizin enn aide pratique pou zot transport. C’est surtout bann membres de la famille ki éna responsabilité pou occupe sa. (1 Tim. 5:4) Mais si zot pa kapav, bann frères ek soeurs kapav apporte zot l’aide. (Jacq. 1:27) Bann surveillants l’étude de livre bizin check avec bann proclamateurs dans so groupe ki éna bann besoins spécial, pou assuré ki zot finn fini prend bann dispositions bien à l’avance.
5 Assisté Nou l’Assemblée Dans l’Ordre ek en Sécurité: Pou assuré ki éna assez places, publications ek lézot kitsoz encore, tou bann proclamateurs encouragé pou assisté l’assemblée kot zot congrégation invité.
6 Bizin Bann Volontaires: Jésus ti laisse enn l’exemple parfait kan avec humilité, li ti prend compte besoin bann dimoune. (Luc 9:12-17; Jean 13:5, 14-16) Bann ki porte zot volontaire pendant l’assemblée, zot manifesté même l’attitude ki Jésus. Comité l’assemblée pa pou tardé pou invite bann volontaires pou aidé dans différent service. Li bien important ki bann anciens porte zot volontaire ek accepté bann responsabilités ki donne zot. Grâce à zot bon l’état d’esprit, zot laisse enn bon l’exemple pou bann frères ek soeurs dans congrégation.—1 Pierre 5:2, 3.
7 À travers l’esclave fidèle ek avisé, Jéhovah rassemblé so peuple pou donne li enn l’enseignement spirituel. (Luc 12:42) C’est vrai ki sa demann beaucoup zefforts pou prend bann dispositions pou assisté toulé-trois jours, mais li vaut la peine. Péna doute ki sa l’année-la, l’Assemblée District “L’Obéissance pou Bondié” pou fortifié nous détermination pou servi Jéhovah asterla ek pou l’éternité. Anou déterminé pou suive l’encouragement sa psalmiste-la: “Béni Jéhovah dans bann la-foules ki rassemblé.”—Ps. 68:26.
[L’encadré lor page 3]
Programme
Vendredi ek Samedi
9:30 a.m. - 5:05 p.m.
Dimanche
9:30 a.m. - 4:10 p.m.
[L’encadré lor page 4]
Seulement pou la Réunion
◼ Nous bien apprécié la paix ek l’ordre ki éna pendant nou bann l’assemblées, pa vrai? Sa permette nous profite programme dans bann pli bon conditions ki éna. Nous bien reconnaissant pou travail ki bann volontaires faire avant, pendant ek après l’assemblée. Nous ti pou content félicite zot pou zot bon coopération envers sa bann frères-la, kan zot respecté bann directives ki’nn établi pou nou bien-être ek nou sécurité.
◼ Couma zot finn remarqué pendant bann derniers l’assemblées district, parking rempli. Péna assez place, à cause sa nou’nn bizin servi bann l’endroits ki pa ti prévoir pou parking. Sa commence pose enn problème pou la sécurité.
◼ Couma nous kapav montré ki nous envie coopéré pou ki nou l’assemblée déroule dans l’ordre dans sa domaine-la? C’est kan nous faire tou nou possible pou ré-groupe nous dans bann l’autos. Nous pa oulé établi okenn règle, parski nous koné ki sakenn so situation différent, par exemple éna certains ki responsable bann services dans l’assemblée, donc zot bizin sorti pli bonne heure ek rentre pli tard. Mais, anou faire tou séki nous kapav pou ré-groupe nous dans enn même l’auto.