L’instruction ki amenn vers la vie
1 Sa faire plaisir pou trouve lizié bann dimoune eclairé kan zot arrivé comprend la verité ki ena dan Parole Bondié, pa vrai? Kan nou partage avek lezot connaissance concernant Bondié ek seki Li ena l’intention pou faire pou bann dimoune, sa donne nou enn grand satisfaction. Sa qualité l’instruction-la kapav amenn enn dimoune vers la vie eternel.—Jean 17:3.
2 Kifer li superieur: Zordi li possible pou aprann lor n’importe ki sujet ki nou kapav pensé, par tout qualité moyen. (Eccl. 12:12) Mais nou pa kapav compare valeur sa connaissance-la avek “bann kitsoz extraordinaire lor Bondié.” (Actes 2:11) Eski sa l’instruction ki le monde offert-la inn kapav faire bann dimoune vinn pli proche avek nou Createur ek faire zot konn seki li ena l’intention pou faire? Eski sa finn aide zot pou koné ki arrivé kan nou mort ou-soit kifer ena tou sa souffrance-la? Eski sa finn donne bann dimoune enn l’espoir? Eski sa finn aide zot pou ameliore zot la-vie famille? Non. C’est zis grace a l’instruction ki Bondié donné ki nou kapav trouve bann reponse ki vaut la peine pou bann question pli important ki ena dan la vie.
3 L’instruction ki sorti kot Bondié donne enn kitsoz ki rare dan le monde zordi. Li aide bann etudiant pou developpe bann principe moral. Kan bann dimoune accepté ek suive l’enseignement Parole Bondié, sa tire dan zot leker l’idée ki enn race, enn tribu ou-soit enn pays pli superieur ki enn lot. (Héb. 4:12) Sa finn aussi pousse bann dimoune pou abandonne tou forme violence ek ‘mette nouveau personnalité lor zot.’ (Col. 3:9-11; Mika 4:1-3) En plus, l’instruction ki sorti kot Bondié finn donne bann million dimoune, la force pou debarrasse-zot ar bann pratik ek bann defaut ki Bondié pa content.—1 Cor. 6:9-11.
4 Kifer sa li bien important asterla: Nou grand Instructeur averti nou concernant signification lepok ki nou pé vive. Dan so bann jugement ki finn annoncé depuis avant, ena bann renseignement ki concerne nou zordi ek ki nou bizin faire tou dimoune lor la terre entier koné. (Rév. 14:6, 7) Christ pé regné dan le ciel; tou bann fausse religion pou detruire bientot, ek Royaume Bondié inn paré pou detruire tou bann gouvernement ki ena lor la terre. (Dan. 2:44; Rév. 11:15; 17:16) Alors, li bien important ki bann dimoune reconette le Roi ki Bondié inn choisir ek ki pé regné asterla, ki zot sorti dan Babylone la Grande, ek ki zot invok nom Jéhovah avek la foi. (Ps. 2:11, 12; Romains 10:13; Rév. 18:4) Anou faire tou seki nou kapav pou partage avek lezot sa l’instruction ki amenn vers la vie-la.