Eski ou finn essaye sa method-la?

Si ou pé conduire enn l’etude la Bible, kifer ou pa demann ou etudiant si li ena kit camarade, bann famille ou-soit kit connaissance ki ti pou content aprann konn seki la Bible enseigné? Souvent, etudiant-la kapav donne ou plusieurs nom. Si ou etudiant d’accord, ou kapav mentionne so nom kan ou al visite sa bann dimoune-la pou propose zot enn l’etude la Bible. Ou kapav dire, “[Tel dimoune] inn bien apprecié seki li’nn aprann dan la Bible, ek li pensé ki ou’si kitfois ou ti pou content profite enn l’etude la Bible gratuit ki nou propose bann dimoune.” Apré sa, servi livre Ki la Bible enseigné? pou faire enn ti demonstration pou montré zot couma enn l’etude la Bible deroulé.

Si ou etudiant pé faire bann bon progré, ou kapav encourage li pou explik so bann camarade ou-soit bann membre so famille ki interessé, couma enn l’etude la Bible deroulé. Kitfois li kapav invite zot pou assisté so l’etude. Ou-soit si sa pa possible, li kapav faire enn l’arrangement pou ki ou joinde zot ek montré zot couma nou faire enn l’etude. Si ou faire sa, sa pou encourage ou etudiant pou commence partage avek lezot seki li pé aprann dan la Bible.

Ena aussi bann dimoune ki ou visité souvent. Mem si zot-mem zot pankor accepté enn l’etude, kitfois zot kapav dire ou kisannla ki zot koné, kapav interessé avek la Bible. Kan ou offert zot enn copie Ki la Bible enseigné?, ou kapav demann zot, “Eski ou konn enn lot dimoune ki ti pou content gagne sa livre-la pou lire?”

Nou reste bien tigit lé-temps avant la fin, a cause sa, nou envie servi tou moyen possible pou aide bann dimoune tann la bonne nouvelle ek accepté sa. Eski ou finn essaye sa method-la?