Montré enn l’interet sincere—Kan ou preche ar tou dimoune
1 Dan enn vision, l’apotre Jean ti trouve enn ange ki ti pé envolé au milieu le ciel ek ki ti pé annonce enn bon nouvel eternel ar bann dimoune dan “tou nation ek tribu ek langue ek peuple.” (Rév. 14:6) Eski nou pé suive l’exemple sa ange-la ek nou pé preche ar tou dimoune? Sans ki nou rann nou compte, nou kapav developpe enn mauvais l’attitude ek nou faire preference. Nou l’attitude envers bann dimoune ki nou joinde kapav influence fason ki nou presente zot la bonne nouvelle. Alors, nou bizin montré enn l’interet sincere kan nou preche avek bann dimoune ki pa mem culture ki nou.
2 Examine ou territoire: Eski ena bann dimoune ki sorti enn lot pays ki reste dan ou territoire? Li bien facile pou blié zot. Prend l’initiative pou rod sa bann dimoune-la ek essaye konn zot pli bien. Ki bann kitsoz ki tracasse zot, ki bann kitsoz ki zot content ek zot pa content, ki bann kitsoz ki zot peur ek couma zot considere bann dimoune enn lot culture? Faire zeffort pou adapté ou message lor Royaume Bondié par rapport ar sa bann kitsoz-la. (1 Cor. 9:19-23) Pareil couma l’apotre Paul, nou bizin senti ki nou ena enn devoir pou partage la bonne nouvelle avek tou bann dimoune dan nou territoire, mem bann dimoune ki sorti dan enn lot pays, ki ena enn lot culture, ki koz enn lot langue, ou-soit ki bien riche.—Rom. 1:14, note.
3 Mais couma ou kapav rann temoignage enn dimoune ki koz enn lot langue? Utilise bien brochure Une bonne nouvelle pour des gens de toutes nations. Ou kapav aussi amenn dé-trois tract ou-soit brochure dan bann langue ki bann dimoune kozé dan ou territoire. (Guette Ministère du Royaume juillet 2003, p. 4, § 2-3.) En plus, certain proclamateur inn faire zeffort pou aprann dé-trois parole ek enn ti presentation dan lezot langue. Souvent bann dimoune bien content kan zot tann enn kikenn pé faire zeffort pou koz avek zot dan zot prop langue, mem si li zis dé-trois ti parole. Sa kapav attire zot vers la bonne nouvelle.
4 Imite Jéhovah: Kan nou partage la bonne nouvelle avek bann dimoune ki pa mem culture ki nou, nou imite Jéhovah, nou Bondié ki pa faire preference ek ki “envie ki tou sorte qualité dimoune sauvé ek gagne enn connaissance exact lor la verité.”—1 Tim. 2:3, 4.