“Mo pa interessé”
1 Souvent bann dimoune dire nou sa kan nou preché dan certain l’endroit. Ki kitsoz pou aide nou pou pa decouragé kan nou joinde bann dimoune ki indifferent dan nou territoire? Couma eski nou kapav faire bann dimoune interessé ar la bonne nouvelle?
2 Garde nou la-joie: Si nou rappel kifer beaucoup dimoune indifferent, sa pou aide nou garde nou la-joie. Ena dimoune ki finn aprann lor l’evolution ou-soit zot finn grandi parmi bann dimoune ki pa croire dan Bondié. Alors kitfois zot pa’nn gagne l’occasion pou reflechi lor valeur la Bible. Kitfois ena lezot ki finn decouragé parski zot pa ti attann pou trouve bann dimoune ki hypocrite dan la religion. Certain indifferent parski zot decouragé a cause zot situation ek zot pena okenn l’espoir. (Éph. 2:12) Certain pa ‘prend nou message compte’ parski zot accablé par bann tracas ki ena dan la vie.—Mat. 24:37-39.
3 Mem si certain dimoune reagir dan enn fason negatif, nou kapav gagne la joie dan predication parski nou koné ki nou bann zeffort glorifié Jéhovah. (1 Pierre 4:11) En plus, kan nou koz lor la verité, mem avek bann ki pankor apprecié so valeur, sa fortifié nou prop la-foi. Anou faire tou seki nou kapav pou considere bann dimoune dan nou territoire pareil couma Jéhovah considere zot. Li ti chagrin bann habitant la ville Ninive ki pa ti “konn difference entre zot droite ek zot gauche.” (Yona 4:11) Bann dimoune ki reste dan nou territoire bizin la bonne nouvelle! Alors, fodé pa ki nou baisse lebra. Au contraire nou bizin rod bann fason pou faire zot interessé ar message ki ena dan la Bible.
4 Koz lor bann kitsoz ki’nn arrivé dan l’endroit: Kitfois dan ou introduction, ou kapav mentionne enn kitsoz ki’nn arrivé dan l’endroit ek apré demann dimoune-la ki li pensé lor la. Ecoute li kan li kozé, apré montré li message encourageant ki ena dan la Bible en rapport avek seki tracasse li. Apré ki enn malheur ti’nn arrivé dan so l’endroit, devant chaque la porte, enn Témoin ti dire ki li ti bien regrette seki ti’nn arrivé. Li ti dire: “Enn sel coup, bann dimoune ti commence kozé. Mo ti gagne bann bon conversation sa jour-la parski mo ti montré ki mo interessé avek zot.”
5 Royaume Bondié pou amenn enn solution pou chaque problem ki l’humanité pé gagné. Essaye trouvé ki kitsoz surtout ki tracasse sa dimoune ki ou joinde-la. Kitfois li kapav laisse ou explik li l’espoir ki trouve dan la Bible. Sinon, kitfois li pou disposé pou ecouté “enn lot fois.”—Actes 17:32.