Nou bien apprecié nou bann privilege!
1 Depuis ki dimoune existé, Jéhovah finn donne so bann serviteur different qualité privilege. Li finn donne zot bann privilege sans guette zot l’age, sexe, ou-soit zot position social. (Luc 1:41, 42; Actes 7:46; Phil. 1:29) Ki bann privilege Li donne nou zordi?
2 Certain privilege ki nou ena: Nou ena privilege ki Jéhovah enseigne nou. (Mat. 13:11, 15) Enn lot privilege ki nou ena c’est ki nou loué Jéhovah par nou bann commentaire dan bann reunion dan congregation. (Ps. 35:18) Kan nou gagne l’occasion pou faire bann commentaire, nou faire sa avek enthousiasme. Li pareil pou bann responsabilité dan congregation. Si nou considere chaque responsabilité couma enn l’honneur, nou pou faire tou seki nou kapav pou faire li bien. Eski nou participe regulierement dan privilege ki nou ena pou garde la Salle du Royaume prop ek dan enn bon l’etat?
3 Mem si bann dimoune par million pa sur si Bondié ecoute zot la-priere ou-soit non, mais nou, nou koné ki pli grand Personnage dan l’univers pé ecoute nou la-priere. Sa c’est privilege ki nou ena. (Prov. 15:29) Jéhovah personnellement ecoute la priere so bann serviteur. (1 Pierre 3:12) Li pa mette okenn limite lor quantité fois ki nou kapav prié Li. Nou kapav “prié dan tou l’occasion.” Nou vrai-mem apprecié sa don ki nou ena-la, pa vrai?—Éph. 6:18.
4 “Bann ki travail ensam avek Bondié”: Enn parmi bann pli grand privilege ki nou ena, c’est ki nou kapav annonce la bonne nouvelle lor Royaume Bondié en tant ki “bann ki travail ensam avek Bondié.” (1 Cor. 3:9) Sa travail-la faire nou gagne satisfaction ek donne nou la force moral. (Jean 4:34) Jéhovah pa bizin bann dimoune pou faire sa travail-la, mais Li finn donne nou sa responsabilité-la parski Li content nou. (Luc 19:39, 40) Mais Jéhovah pa finn donne n’importe kisannla sa privilege-la. Bann ki participe dan predication bizin rempli certain condition spirituel ek contigne rempli sa bann condition-la. (Is. 52:11) Eski nou montré ki nou apprecié sa privilege-la kan nou faire predication vinn enn priorité dan nou program chaque semaine?
5 Bann privilege ki Jéhovah donne nou, faire nou la-vie ena enn sens. (Prov. 10:22) Fodé jamais nou considere sa bann privilege-la couma enn kitsoz ki pena grand valeur! Kan nou montré ki nou vrai-mem content nou bann privilege, nou pou faire nou Papa ki dan le ciel content, Li-mem ki donne “tou joli don ek tou cadeau parfait.”—Jacq. 1:17.