“Suive bien so trace”
1. Couma nou kapav vinn bann proclamateur efficace?
1 Jésus pa ti al dan bann lekol kot bann rabbin ti pé enseigné. Pourtant li ti pli grand Predicateur dan l’histoire. Heureusement, seki Jésus ti faire pendant so ministere, finn ecrire ek finn preservé pou nou profit. Pou nou kapav vinn bann proclamateur efficace, nou bizin “suive bien so trace.”—1 Pierre 2:21.
2. Ki pou aide nou manifesté mem qualité l’amour ki Jésus ti ena pou bann dimoune?
2 Montré l’amour envers bann dimoune: L’interet rempli ar l’amour ki Jésus ti ena pou bann dimoune ti motive li. (Marc 6:30-34) Beaucoup dan nou territoire pé “souffert” ek zot bien bizin la verité. (Rom. 8:22) Si nou reflechi lor zot situation difficile ek lor l’interet sincere ki Jéhovah ena pou zot, sa pou motive nou pou contigne preché. (2 Pierre 3:9) En plus, bann dimoune pou pli interessé ar nou message si zot trouvé ki nou interessé ar zot sincerement.
3. Dan ki l’occasion Jésus ti preché?
3 Saisi chaque l’occasion pou preché: Jésus ti profite chaque l’occasion ki li ti gagné pou partage la bonne nouvelle avek lezot. (Mat. 4:23; 9:9; Jean 4:7-10) Nou aussi pareil, nou envie pré pou koz lor la verité kan nou pé faire bann kitsoz ki nou habitué faire pendant la journée. Certain garde enn la-Bible ek bann publication touletan avek zot. Coumsa zot kapav rann temoignage dan zot travail, dan lekol, kan zot voyagé, ek kan zot al faire shopping, etc.
4. Couma nou kapav faire Royaume Bondié vinn theme nou predication?
4 Concentré-nou lor Royaume Bondié: La bonne nouvelle lor Royaume Bondié ti theme predication Jésus. (Luc 4:43) Mem si dan nou presentation nou pa mentionne desuite ou-soit directement Royaume Bondié, fodé pa nou blié ki nou bizin aide dimoune-la pou trouvé ki li bizin sa. Nou kapav koz lor bann mauvais condition ki ena dan le monde pou montré ki nou pé vive dan lepok dernier jour, mais nou envie avant tou “annonce bann bon nouvelle lor bann bon kitsoz.”—Rom. 10:15.
5. Pou ki nou efficace dan nou ministere, ki role la Bible bizin joué?
5 Compte lor Parole Bondié: Pendant so ministere, Jésus ti touletan servi bann l’Ecriture pou appuye seki li ti enseigné. Li pa ti enseigne nanyin dapré so prop pensée. (Jean 7:16, 18) Li ti nourri-li ar Parole Bondié ek li ti applik l’enseignement ki ena ladan kan li ti faire face ar bann l’attak Satan. (Mat. 4:1-4) Pou ki nou kapav enseigne lezot dan enn fason efficace, nou bizin lire la Bible toulé-jour, ek faire bann application personnel. (Rom. 2:21) Kan nou reponn bann question dan predication, nou bizin appuye nou bann reponse par bann verset biblik, ek nou lire bann verset directement dan la Bible a chaque fois ki li possible. Nou envie ki sa dimoune avek ki nou pé preché-la trouvé ki nou pa pé dire nou bann l’idée personnel, mais plutot ki nou pé appuye bien nou parole lor bann pensée Bondié.
6. Ki Jésus ti faire pou touche leker so l’auditoire?
6 Touche leker kan ou pé enseigné: “Jamais enn lot zom pa finn koz coumsa.” (Jean 7:46) C’est seki bann soldat finn dire lor Jésus kan bann chef pretre ek bann Pharisien ti demann zot kifer zot pa finn arrete li. Au lieu Jésus ti zis donne bann l’information, li ti koz dan enn fason ki ti touche leker bann ki li ti enseigné. (Luc 24:32) Pou rann so l’enseignement vivant, Jésus ti servi bann l’exemple ki sorti dan la vie toulé-jour. (Mat. 13:34) Li pa ti touffe bann ki ti ecoute li avek trop beaucoup information. (Jean 16:12) Li ti attire l’attention lor Jéhovah, pa lor li-mem. Pareil couma Jésus, nou kapav vinn bann bon enseignant selman si nou ‘contigne veille bien lor nou l’enseignement.’—1 Tim. 4:16.
7. Kifer Jésus ti perseveré dan ministere?
7 Perseveré malgré l’indifference ek l’opposition: Mem si Jésus ti accompli bann mirak, beaucoup pa ti ecoute li. (Luc 10:13) Mem so prop famille ti croire ki li’nn “perdi la tête.” (Marc 3:21) Malgré tou, Jésus ti perseveré. Li ti garde enn l’attitude positif parski li ti cent pour cent sur ki li ti ena la verité ki kapav libere bann dimoune. (Jean 8:32) Avek l’aide Jéhovah, nou aussi nou determiné pou pa baisse lé-bras.—2 Cor. 4:1.
8, 9. Concernant bann sacrifice pou la bonne nouvelle, couma nou kapav imite Jésus?
8 Faire bann sacrifice ki bizin pou kapav participe plus dan ministere: Jésus ti sacrifié so confort materiel pou so ministere. (Mat. 8:20) Li ti preché touletan, parfois ziska tard. (Marc 6:35, 36) Jésus ti koné ki li pa ti ena beaucoup lé-temps pou faire so travail. Parski “reste bien tigit lé-temps,” nou aussi nou bizin sacrifié nou lé-temps, nou l’energie, ek nou bann kitsoz materiel pareil couma Jésus.—1 Cor. 7:29-31.
9 Bann chretien premier siecle ti bann proclamateur efficace parski zot ti aprann ar Jésus. (Actes 4:13) Nou aussi nou pou kapav accompli bien nou ministere si nou imite pli grand Predicateur ki finn ena dan l’histoire.—2 Tim. 4:5.