Enn l’occasion pou nou nourri-nou ek pou dan la joie
1. Couma Jéhovah donne so bann serviteur seki zot bizin lor plan spirituel?
1 Avek amour, Jéhovah donne so bann serviteur seki zot bizin lor plan spirituel. Alors ki le monde en general pé konn enn famine spirituel, nou, vrai-mem nou bien nourri lor plan spirituel. (Is. 65:13) Enn fason ki Jéhovah nourri nou lor plan spirituel, c’est par l’assemblée district ki ena toulé l’année. Eski ou pé prepare-ou pou assisté tou bann session prochain l’assemblée district “Guidé par l’esprit Bondié”? Enn bon festin spirituel bien nourrissant finn preparé.
2. Ki nou bizin faire pou prepare-nou a l’avance pou l’assemblée?
2 Prepare ou a l’avance: “Bann plan enn kikenn ki travail dur pou faire li gagne l’avantage.” (Prov. 21:5) Alors, kan ou pé faire ou bann preparation pou assisté toulé-trois jour l’assemblée, pa tardé pou demann ou patron congé pou l’assemblée district. Si ou pou bizin enn logement pendant l’assemblée, eski ou finn faire bann l’arrangement? Ou pou envie aussi amenn ou dejeuner pou ki ou kapav mange avek ou bann frere ek soeur dan la Salle l’assemblée. Faire l’arrangement pou vinn assez boner chaque jour pou ou kapav trouve enn place ek chante premier cantik ek ecoute la priere.
3. Ki qualité linge nou bizin metté?
3 Nou envie aussi faire sur ki nou pou habille bien ek avek modestie. (1 Tim. 2:9, 10) Bann l’assemblée district donne nou enn bon l’occasion pou rann temoignage bann dimoune dan l’endroit. Kan nou habille dan enn fason respectable ek nou mette nou badge, nou montré ki nou bien different ar bann dimoune dan le monde ek nou faire enn bon l’impression lor lezot.
4. Ki pou aide nou ek nou famille pou profite bien programme?
4 Suive bien: Surement nou pa pou envie mank okenn miette ki pou servi dan sa festin spirituel-la! (Prov. 22:17, 18) Nou pou reussi reste concentré ek empeche lezot kitsoz distraire nou pendant programme si nou suive lecture bann texte la Bible ek nou prend bann note courte. Tantot apré l’assemblée, nou kapav servi nou bann note pou discute avek lezot lor bann point interessant ki ti ena dan programme. Dan bann dernier l’année, finn remarké ki certain jeune assize ensam dan l’assemblée, zot kozé pendant session ou-soit zot envoye message lor zot telephone portable. Si nou ena zenfant, mem bann adolescent, li pou pli bon ki zot assize kot nou ek ki zot ecoute programme en famille au lieu ki nou laisse zot al assize dan enn lot place avek lezot jeune.
5. Couma nou kapav augmente nou la-joie dan l’assemblée?
5 Profite enn bon compagnie: Nou apprecié plus enn bon repas kan nou mange li avek nou bann camarade. (Prov. 15:17) Li pareil aussi kan nou ensam avek nou bann frere ek soeur, sa donne nou plus la-joie dan l’assemblée. Alors, avant ek apré bann session, li vrai-mem agreable pou prend l’initiative pou koz avek lezot frere et soeur ek profite enn bon compagnie! (Ps. 133:1) Kan president invite ou pou assizé avant ki la musik commencé, nou bizin fini nou conversation ek al assizé avant programme commencé.
6. Raconte enn l’experience personnel ki montré couma nou kapav rann temoignage avek bann dimoune dan l’endroit kot faire l’assemblée.
6 Saisi chaque l’occasion pou rann temoignage: Souvent bann l’assemblée donne nou bann bon l’occasion pou rann temoignage. Certain dimoune pose bann question ar bann ki assisté l’assemblée concernant theme ki ena lor zot badge. Sa finn permette zot pou commence bann conversation ek pou rann enn bon temoignage lor la verité. Bann frere finn invite certain ki finn pose question ek bannla finn vinn l’assemblée.
7. Kifer nou bizin assisté sa l’assemblée district ki pé vini-la?
7 Finn passe beaucoup lé-temps pou prepare programme, l’endroit kot pou faire l’assemblée, pou organise bann different service pou l’assemblée, ek pou prepare bann discours. Tou sa travail ki’nn faire avek amour pou prepare sa festin spirituel-la montré couma Jéhovah ena enn grand l’affection pou so bann serviteur. Anou faire tou pou nou present ek pou profite maximum nourriture spirituel! Kan nou faire sa, contrairement ar le monde, nou pou “criyé dan la joie parski [nou] leker pou content.”—Is. 65:14.
[Box on page 4]
Bann rappel pou l’assemblée district
◼ Programme: Toulé-trois jour, l’assemblée pou commencé 9:20 a.m. La porte la Salle l’assemblée pou ouvert 8:00 a.m. Kan la musik commence joué, nou tou nou bizin prend nou place pou ki programme kapav commencé dan enn fason ki digne. Programme pou terminé 4:55 p.m. vendredi ek samedi, ek 4:00 p.m. dimanche.
◼ Parking: Parski bann place parking limité, nou encourage bann frere pou organise-zot pou voyage ensam pou evité ki enn l’auto amenn zis enn ou deux dimoune.
◼ Reserve bann place: Ou kapav reserve bann place zis pou ou famille, ou-soit pou bann dimoune ki pé voyage ensam avek ou dan mem transport.
◼ Repas pou midi: S’il vous plait, amenn ou repas pou midi au lieu ou al acheté mangé en-dehors pendant pause. Ou kapav servi enn ti cooler-bag ki kapav rente enba ou chaise. Fodé pa amenn bann grand cooler-bag, ni bann kitsoz en verre. Bann boisson alkolik interdit dan l’assemblée.
◼ Bann donation: Nou kapav montré nou l’appreciation pou tou bann disposition ki’nn prend pou l’assemblée kan nou faire bann contribution volontaire soit dan la Salle du Royaume ou-soit dan la Salle l’assemblée. Bann donation ki faire par cheque dan bann l’assemblée district, bizin faire lor nom “Association les Témoins de Jéhovah.”
◼ Bann accident ek urgence: Si ena enn urgence medical, ou bizin appel enn kikenn dan service l’accueil, ek c’est li ki pou contacté service premier secours. L’equipe premier secours ki qualifié kapav guette la situation ek donne enn l’aide. Si necessaire, l’equipe premier secours pou appel SAMU.
◼ Enregistré programme: Pa gagne droit branche okenn l’appareil lor la ligne electrik ou-soit lor systeme sonorisation la Salle l’assemblée. Si ou enregistré programme, fodé pa ki sa derange lezot.
◼ Bann parfum: Nou pou montré ki nou ena consideration pou lezot si nou pa trop servi bann parfum fort ki kapav faire bann dimoune ki ena probleme respiratoire ek lezot probleme ki associé ar sa, tombe malade.—1 Cor. 10:24.
◼ Bann form pou suive l’interet: Bizin servi bann form Veuillez suivre l’intérêt (S-43) pou donne bann renseignement lor n’importe ki dimoune ki manifesté l’interet kan nou donne temoignage informel pendant l’assemblée. Bann proclamateur bizin amenn deux-trois sa bann form-la avek zot kan zot vinn l’assemblée. Kan zot inn fini rempli li, zot kapav donne sa bann form-la secretaire zot congregation kan zot retourné.—Guette Ministère du Royaume février 2005, p. 6.