Ou kapav gagne beaucoup richesse!
1. Kifer nou bizin guetté si nou kapav faire pionnier permanent?
1 Eski ou pé rod gagne plus la joie ek satisfaction dan ou la vie? Eski sa faire ou plaisir ek ou gagne satisfaction kan ou aide lezot? Eski ou envie augmente ou service pou Jéhovah? Si ou reponn oui pou sa bann question-la, alors li possible ki ou kapav faire service pionnier permanent. Bien sur, nou bizin prend en consideration bann responsabilité familial ou-soit lezot responsabilité biblik, ek aussi probleme la santé ek bann limite physik.
2. Mentionne certain richesse spirituel ki bann pionnier gagné.
2 Dan bann parole ki Salomon ti ecrire par inspiration Bondié, nou trouve enn lien entre benediction Jéhovah ek bann richesse materiel. (Prov. 10:22) Zordi, kan Jéhovah beni nou, nou gagne surtout bann richesse spirituel ek bann pionnier permanent gagne sa bann richesse-la en abondance. Par exemple, zot konn sa grand la joie ki gagné kan donné-la, kan zot “reacheté le temps” lor bann lezot kitsoz personnel ki zot ti pou kapav faire. (Col. 4:5; Actes 20:35) Jéhovah remarké ek apprecié travail ki zot faire avek amour. Sa bann ‘tresor dan le ciel-la’ jamais pa pou perdi valeur. (Mat. 6:20; Héb. 6:10) En plus, parski bann pionnier garde enn ‘lizié simple’ ek zot ena confiance ki Jéhovah pou donne zot seki zot bizin, zot relation avek Li vinn pli fort.—Mat. 6:22, 25, 32; Héb. 13:5, 6.
3. Ki difference ena entre galope derriere bann richesse materiel ek galope derriere bann richesse spirituel?
3 Kan bann dimoune galope derriere bann richesse materiel, souvent sa faire zot gagne ‘beaucoup desir ki pena sens ek ki faire di-tort.’ (1 Tim. 6:9, 10; Jacq. 5:1-3) Li pa pareil avek bann benediction ki Jéhovah donné. Parski bann pionnier permanent passe enn bon partie zot le temps pou preché, sa aide zot pou garde enn l’equilibre spirituel ek reste concentré lor bann kitsoz ki pli important. (Phil. 1:10) Enn frere ti quitte so travail ingenieur, ki ti pé prend tou so le temps, pou vinn pionnier. Li dire: “Mo travail ti stresse moi, mais pa service pionnier. Aster mo kapav aide bann dimoune ek enseigne zot la verité. Aide bann dimoune pou konn la verité, sa li beaucoup pli interessant ek sa finn faire moi gagne beaucoup plus satisfaction.”
4. Couma bann pionnier permanent gagne benediction en mem temps ki zot amenn bann benediction pou lezot?
4 Zot bann benediction pou lezot: Zordi, tou dimoune faire face avek “bann lepok critik ki difficile pou supporté.” (2 Tim. 3:1) Bann dimoune partout lor la terre, bien bizin l’espoir. Bann proclamateur gagne enn grand la joie kan zot trouve bann dimoune ki desesperé change l’attitude ek vinn positif a mesure ki zot accepté la bonne nouvelle. Asterla, maziné ki quantité la joie bann pionnier permanent gagné kan zot depense plus ki 800 l’heure temps par an dan sa travail ki sap la vie bann dimoune-la!—1 Tim. 4:16.
5, 6. Ki kapav permette ou pou vinn enn pionnier permanent?
5 Eski ou finn deja bien reflechi lor service pionnier permanent? Kitfois li pou necessaire ki ou “reacheté le temps ki bizin” lor bann l’objectif ki moins important. (Éph. 5:15, 16) Beaucoup finn faire sa ek finn simplifié zot la vie, seki finn permette zot diminué le temps ki zot passé dan travail pou zot kapav donne plus le temps pou bann l’interet Royaume Bondié. Eski ou kapav change ou programme pou faire pareil couma zot?
6 Prié Jéhovah pou gagne sagesse pou ou kapav faire enn programme ki pratik. (Jacq. 1:5) Ki benediction ou kapav attann pou gagné en retour? Bann richesse spirituel en abondance! Jéhovah pou beni ou aussi lor plan materiel kan Li pou donne ou seki bizin pou vive. (Mat. 6:33) Bann ki testé Jéhovah dan sa domaine-la pou gagne “enn benediction ziska ki personne pa mank nanyin.”—Mal. 3:10.