Nou ena bann tresor ki ena enn grand valeur pou partagé
1 Parole Bondié rempli ar bann tresor spirituel ki ena valeur ek ki nou bien apprecié. (Ps. 12:6; 119:11, 14) Enn fois, Jésus ti servi bann l’exemple ki montré bann different aspect Royaume Bondié, ek apré li ti demann so bann disciple: “Eski zot finn saisi sens tou sa bann kitsoz-la?” Kan bann disciple ti reponn ki zot ti saisi sens tou sa bann kitsoz-la, Jésus ti dire zot: “Dan sa cas-la, tou bann ki enseigne en publik, apré ki’nn enseigne li lor royaume ki dan le ciel, li pareil couma enn zom, enn chef dan so lakaz, ki tire bann nouveau ek bann vié kitsoz dan so tresor.”—Mat. 13:1-52.
2 Nou kapav compare bann verité ki nou finn aprann kan nou ti fek commence etudié la Bible ar bann vié tresor. A mesure ki nou contigne augmente nou connaissance lor bann kitsoz profond dan Parole Bondié grace a nou l’etude personnel, nou trouve lezot verité ki ena dan la Bible, ek pou nou sa coumadir bann nouveau tresor. (1 Cor. 2:7) En plus, “l’esclave fidele et avisé” aussi faire nou reussi comprend bann nouveau tresor.—Mat. 24:45.
3 Nou bien apprecié sa bann tresor spirituel-la, ki zot vié ou-soit nouveau. Sa pousse nou pou rod gagne formation ek pou gagne l’experience couma bann enseignant Parole Bondié. Nou envie partage avek lezot bann verité ki nou finn aprann ek ki ena enn grand valeur.
4 Aprann ar l’exemple Jésus: Jésus ti montré seki li ti ressenti pou sa bann tresor-la kan li ti faire beaucoup zeffort pou partage sa avek lezot. Mem kan li ti fatigué, li pa ti arrete tire bann tresor ki li ti ena dan so “store.”—Jean 4:6-14.
5 L’amour ki Jésus ti ena pou bann ki ti pauvre lor plan spirituel ti motive li pou partage bann verité ki sorti kot Bondié ki couma bann tresor ki faire gagne la vie. (Ps. 72:13) Li ti ena pitié pou bann ki ti faim bann kitsoz spirituel ek sa ti pousse-li pou “enseigne zot beaucoup kitsoz.”—Marc 6:34.
6 Imite Jésus: Kan nou bien apprecié bann tresor ki nou ena, pareil couma Jésus, nou pou bien envie montré bann dimoune bann tresor spirituel directement dan la Bible. (Prov. 2:1-5) Mem si parfois nou kapav fatigué, nou pou koz concernant bann verité ki ena dan la Bible avek enn leker rempli ar zele. (Marc 6:34) Nou grand l’appreciation pou bann tresor spirituel ki nou ena pou pousse nou pou faire tou seki nou kapav dan ministere, ek pou rod faire toujours plus dan predication.