Eski ou’nn prepare-ou pou enn festin spirituel?
1. Ki qualité preparation bizin faire kan ena enn festin?
1 Enn festin demann beaucoup preparation. Bizin rod mangé, prepare zot bien, ek apré presente zot bien. Bizin organisé pou servi sa mangé-la. En plus, bizin prepare l’endroit kot pou faire sa festin-la. Bann invité aussi bizin prepare-zot, surtout si zot pou bizin voyage beaucoup. Mem si ena beaucoup travail ki impliké, li vaut la peine pou profite enn bon repas avek bann camarade ek bann famille. Bientot, bann Témoins de Jéhovah partout lor la terre pou joinde ensam, pou profite enn festin spirituel ki zot finn attann avek impatience—l’assemblée district “Contigne veillé!” Beaucoup preparation inn fini commencé pou ki programme ek tou kitsoz pré. Nou tou nou finn invité. Pou ki nou kapav present ek tire maximum profit, nou aussi nou bizin prepare-nou personnellement.—Prov. 21:5.
2. Ki nou bizin faire pou nou profite bien sa festin spirituel-la?
2 Tire maximum profit: Eski ou’nn fini organise-ou pou ki ou la pendant chaque partie sa festin spirituel-la? Si necessaire, koz ar ou patron pou faire li koné ki ou pou assisté tou bann session ou l’assemblée, sans blié premier jour aussi. Eski ou finn deja faire bann l’arrangement pou transport? Bann ancien bizin verifié ki bann ki agé ek ki ena enn probleme la santé gagne l’aide ki bizin.—Jér. 23:4; Gal. 6:10.
3. Ki bann rappel pou aide nou prepare-nou pou commencement programme chaque jour l’assemblée?
3 Prepare-ou pou arrive l’assemblée boner toulé-jour ek pou trouve enn place avant ki programme commencé. Deux-trois minute avant ki session commencé, guette seki ena lor ou programme. Sa pou aide ou prepare ou leker pou bann discours ki pou presenté. (Ezra 7:10) Desuite couma president introduire la musik, prend ou place pou ou kapav ecoute la musik ek prepare ou pou premier cantik ek la priere.
4. Couma bann famille kapav tire maximum profit avek programme l’assemblée?
4 Si tou bann membre la famille assize ensam pendant l’assemblée, bann parent pou kapav sur ki zot zenfant pé ecoute bien programme l’assemblée. (Deut. 31:12) Tou dimoune encouragé pou suive bann verset dan zot prop la Bible. Si ou prend bann ti note, sa kapav aide ou pou reste concentré. Plitar, ou bann note pou kapav aide ou rappel bann point important ki finn ena dan bann discours. Resisté ar tentation pou koz pou nanyin pendant session ou-soit pou quitte ou place. Si ou ena enn telephone portable, pa laisse li distraire ou ou-soit distraire lezot pendant programme. Apré chaque session, kifer ou pa discute avek lezot lor seki ou finn apprecié dan programme?
5. Ki kitsoz ki vrai-mem extraordinaire dan nou bann l’assemblée, ek couma nou kapav bien profite sa?
5 Pendant l’assemblée district, nou ena l’occasion pou profite enn relation bien proche avek nou bann frere ek soeur, ek sa c’est enn kitsoz ki bann dimoune dan le monde pa kapav faire. (Ps. 133:1-3; Marc 10:29, 30) Kifer ou pa presente ou-mem avek bann dimoune ki assize pré kot ou ek koz avek zot pendant pause midi? Sa c’est enn l’avantage ki ena kan nou amenn enn repas leger ek kan nou reste dan la Salle l’assemblée au lieu nou al en dehors dan enn restaurant. Faire sur pou pa rate sa l’occasion pou ena enn l’echange l’encouragement-la.—Rom. 1:11, 12.
6. Ki preparation nou bizin faire concernant linge ki nou pou metté?
6 L’habillement: Li interessant pou noté ki Jéhovah ti demann bann Israélite pou mette bann frange dan rebord zot linge, avek enn cordon bleu zis la-haut lor sa bann frange-la. (Nomb. 15:37-41) Sa ti enn signe ki zot ti enn peuple a part pou adore Jéhovah. Zordi, nou l’habillement ki digne ek modeste ki nou ena kan nou al l’assemblée mette nou a part avek sa le monde-la. Nou l’habillement rann enn grand temoignage bann dimoune ki trouve nou, mem apré l’assemblée. Alors, reflechi bien ki qualité linge ou pou metté.
7. Couma nou kapav rann temoignage avek bann dimoune dan l’endroit kot pou faire l’assemblée?
7 Rann enn temoignage: Si nou bien prepare-nou a l’avance, kitfois, nou kapav rann temoignage bann dimoune dan l’endroit kot faire l’assemblée. Kan nou assisté l’assemblée district anou donne témoignage ar tou dimoune ki nou joinde. Si nou mette nou badge, sa kapav attire l’attention bann dimoune ek donne nou l’occasion pou koz lor la verité. Anou rod bann l’occasion pou preché kan nou pé arreté pou prend l’essence, ou-soit kan nou pé prend bus. Nou kapav gagne bann bon resultat si nou donne temoignage dan sa bann situation-la. Alors, anou toujours ena nou la Bible avek nou ek bann publication approprié, ek nou toujours pré pou rann enn temoignage.
8. Couma nou kapav montré nou reconnaissance envers Jéhovah, sa Kikenn ki finn invite nou-la?
8 Mem si c’est nou bann frere ki pou presente bann discours, bann interview, ek bann demonstration, c’est nou Papa ki dan le ciel, Jéhovah, ki offert nou sa festin-la toulé-l’année avek amour. (Is. 65:13, 14) Nou montré nou reconnaissance envers sa Kikenn ki finn invite nou-la, kan nou present chaque jour l’assemblée ek profite chaque partie sa bon festin spirituel ki pou servi nou-la. Eski ou’nn fini prepare-ou pou faire sa?
[L’encadré lor page 6]
Bann rappel pou l’assemblée district
◼ Programme: Toulé-trois jour, l’assemblée pou commencé 9:20 a.m. La porte la Salle l’assemblée pou ouvert 8:00 a.m. Kan la musik commence joué, nou tou nou bizin prend nou place pou ki programme kapav commencé dan enn fason ki digne. Programme pou terminé 4:55 p.m. vendredi ek samedi, ek 4:00 p.m. dimanche.
◼ Parking: Parski bann place parking limité, nou encourage bann frere pou organise-zot pou voyage ensam pou evité ki enn l’auto amenn zis enn ou deux dimoune.
◼ Reserve bann place: Ou kapav reserve bann place zis pou ou famille, ou-soit pou bann dimoune ki pé voyage ensam avek ou dan mem transport.
◼ Repas pou midi: S’il vous plait, amenn ou repas pou midi au lieu ou al acheté mangé en-dehors pendant pause. Ou kapav servi enn ti cooler-bag ki kapav rente enba ou chaise. Fodé pa amenn bann grand cooler-bag, ni bann kitsoz en verre.
◼ Bann donation: Nou kapav montré nou l’appreciation pou tou bann disposition ki’nn prend pou l’assemblée kan nou faire bann contribution volontaire soit dan la Salle du Royaume ou-soit dan la Salle l’assemblée. Bann donation ki faire par cheque dan bann l’assemblée district, bizin faire lor nom “Association of Jehovah’s Witnesses.”
◼ Bann accident ek urgence: Si ena enn urgence medical, ou bizin appel enn kikenn dan service l’accueil, ek c’est li ki pou contacté service premier secours. L’equipe premier secours ki qualifié kapav guette la situation ek donne enn l’aide. Si necessaire, l’equipe premier secours pou appel SAMU.
◼ Enregistré programme: Pa gagne droit branche okenn l’appareil lor la ligne electrik ou-soit lor systeme sonorisation la Salle l’assemblée. Si ou enregistré programme, fodé pa ki sa derange lezot.
◼ Bann parfum: Couma zot koné, li arrivé ki l’air pa circulé facilement dan nou la salle l’assemblée, en plus ena beaucoup dimoune tout autour. Alors, nou pou montré ki nou ena consideration pou lezot si nou pa trop servi bann parfum fort ki kapav faire bann dimoune ki ena probleme respiratoire ek lezot probleme ki associé ar sa, tombe malade.—1 Cor. 10:24.
◼ Bann form pou suive l’interet: Bizin servi bann form Veuillez suivre l’intérêt (S-43) pou donne bann renseignement lor n’importe ki dimoune ki manifesté l’interet kan nou donne temoignage informel pendant l’assemblée. Bann proclamateur bizin amenn deux-trois sa bann form-la avek zot kan zot vinn l’assemblée. Kan zot inn fini rempli li, zot kapav donne sa bann form-la secretaire zot congregation kan zot retourné.—Guette Ministère du Royaume février 2005, p. 6.