Anou loué Jéhovah chaque jour
1. Ki bann serviteur Bondié senti-zot poussé pou faire, ek kifer?
1 Le roi David ti dire ki li ti bien decidé pou loué Jéhovah “toute-longue la journée,” ek mem pou touletan. (Ps. 145:2, 7, 21) Nou aussi nou ena bann bon raison pou loué Jéhovah chaque jour.—Ps. 37:10; 145:14, 18; 2 Pierre 3:13.
2. Couma bann famille kapav loué Jéhovah chaque jour?
2 Dan nou lakaz: Bann publication ki nou ena, aide nou pou ena bann conversation encourageant ek spirituel kan nou faire texte du jour, kan nou ena l’etude familial, ek kan nou prepare nou bann reunion. Beaucoup famille faire enn zeffort pou mange ensam au moins enn fois par jour. Kan zot faire sa, zot pa pressé, zot relax ek sa donne zot l’occasion pou loué Jéhovah. Sa qualité conversation ki bann parent prend l’initiative pou ena avek zot bann zenfant-la, kapav aide zot beaucoup pou elevé zot zenfant dan “discipline ek dan bann l’avertissement Jéhovah.”—Éph. 6:4; Deut. 6:5-7.
3. Ki l’occasion nou ena pou loué Jéhovah kan nou avek nou bann frere ek soeur?
3 Avek nou bann frere ek soeur: Kan nou dan predication ou-soit dan reunion, nou ena bann bon l’occasion pou loué Jéhovah ensam avek nou bann compagnon chretien. (Prov. 15:30; Phil. 4:8; Héb. 13:15) Parski nou tou nou content Jéhovah, li bizin facile pou exprime nou reconnaissance pou so bonté, kan nou koz avek nou bann frere ek soeur.—Ps. 106:1.
4. Dan ki circonstance ou kapav loué Jéhovah?
4 Avek bann ki pena mem croyance ki nou: Mem si nou situation pa permette nou participe dan predication toulé-jour, kan nou koz lor Jéhovah ek lor so bann projet avek nou bann collegue travail, bann camarade lekol, ek lezot dimoune ki autour nou, mem pou enn ti moment, sa kapav donne l’espoir bann ki sincere. (Ps. 27:14; 1 Pierre 3:15) Enn soeur ki ti pé voyage dan enn avion, ti rann temoignage enn madame. Seki sa madame-la ti tann sa soeur-la dire, ti tellement console ek encourage li, ki li’nn donne soeur-la so l’adresse ek so numero telephone pou ki zot kapav reste en contact. Pendant ki le monde pé affecté ar bann probleme ki pé augmenté ek ki pé vinn pli pire, bann serviteur Jéhovah contigné dire ‘la bonne nouvelle lor enn kitsoz ki pli bon’ ar bann dimoune ki envie ecouté. Sa donne sa bann dimoune-la l’espoir ek faire zot loué Jéhovah.—Is. 52:7; Rom. 15:11.
5. Kifer nou envie loué Jéhovah, ek ki kitsoz sa kapav accompli?
5 Sa surement faire Jéhovah plaisir pou tann so bann serviteur loué Li chaque jour! Pareil couma creation Jéhovah ki autour nou, nou aussi nou kapav faire bann parole sorti chaque jour dan nou lakaz, dan la congregation, ek kan nou koz avek bann ki kitfois enn jour zot-mem zot pou loué Jéhovah.—Ps. 19:1-4.