Eski mo pé faire assez?
1. Ki tracas enn chretien ki fidele kapav gagné?
1 Eski ou’nn deja pose ou-mem sa question-la? Li possible ki ou nepli preché pareil couma avant a cause l’age, probleme la santé, ou-soit bann responsabilité familial ki’nn augmenté, ek sa kapav decourage ou. Enn soeur ki ena trois zenfant ti ecrire ki ena fois li senti-li coupable parski le temps ek l’energie ki li bizin pou occupe so famille empeche li faire plus dan predication. Ki kapav aide nou pou trouve bann kitsoz dan enn fason raisonnable?
2. Ki Jéhovah demann nou?
2 Ki Jéhovah demann nou?: Pena doute ki nou tou ti pou content faire plus dan predication. Mais souvent, ena enn grand difference entre seki nou ti pou content faire ek seki nou vrai-mem kapav faire. Parski nou ti pou content faire plus, sa montré ki nou pa sa qualité proclamateur ki pensé ki seki li’nn faire assez. Nou bizin rappel ki Jéhovah bien konn nou bann limite ek li pa demann nou plus ki seki nou kapav faire. (Ps. 103:13, 14) Ki Li demann nou? Li envie ki nou servi Li avek tou nou nâme, ki nou faire nou maximum.—Col. 3:23.
3. Couma nou kapav koné si nou pé faire assez dan nou ministere?
3 Ki kapav aide nou pou koné seki vrai-mem nou kapav faire? Nou kapav demann Jéhovah aide nou pou trouve nou situation couma bizin. (Ps. 26:2) Enn camarade ki dan la verité, ki nou kapav faire confiance ek ki mur, ki konn nou bien ek ki pa peur pou dire nou si nou bizin ameliore nou, kapav aussi aide nou. (Prov. 27:9) Rappel aussi ki bann situation changé, alors li pou bon ki nou examine nou situation de temps en temps.—Éph. 5:10.
4. Couma nou bizin considere bann rappel biblik concernant nou ministere?
4 Couma nou bizin considere bann rappel: Pendant enn la course, bann supporteur souvent criyé pou encourage bann dimoune ki pé galopé. Zot faire sa pou encourage bann dimoune ki pé galopé, pou realise zot l’objectif, pa pou demoralise zot. Li pareil aussi pou bann l’encouragement ek bann rappel biblik ki nou gagné dan nou bann reunion ek dan bann publication pou ‘pa arrete preche la parole.’ Zot pou nou prop di-bien, zot pa la pou faire nou croire ki bann zeffort ki nou pé faire zot pa assez. (2 Tim. 4:2) Nou kapav sur ki tant ki nou contigne essaye faire tou seki nou kapav, Jéhovah pou rappel nou ‘l’amour ek seki nou’nn faire’ ek ki Li pou recompense nou par rapport ar seki nou’nn faire.—Héb. 6:10.