Eski ou kapav aide enn conjoint ki pa Témoin accepté la verité?
1. Kifer eski pa zis bann chretien ki ena enn conjoint ki pa Témoin ki interessé pou aide zot conjoint accepté la verité?
1 Eski certain proclamateur dan ou congregation ena enn mari ou-soit enn femme ki pa Témoin? Si oui, pena doute ki sa bann proclamateur-la envie ki zot conjoint vinn joinde zot dan vrai l’adoration. Mais pa zis zot tousel ki envie sa. Pareil couma Jéhovah, la congregation en entier envie ki “tou sorte qualité dimoune sauvé ek gagne enn connaissance exact lor la verité.” (1 Tim. 2:4) Si dan nou congregation ena bann proclamateur ki zot conjoint pa Témoin, couma nou kapav aide sa bann conjoint-la pou accepté la verité?
2. Couma kan nou servi nou bon sens, sa pou aide nou pou aide enn conjoint ki pa Témoin?
2 Pou commencé, nou bizin essaye comprend sa conjoint ki pa Témoin-la. Beaucoup sa bann conjoint-la content zot famille ek faire zeffort pou vinn enn bon conjoint ou-soit enn bon parent. Kitfois zot sincere dan zot croyance religieux ki different ar seki pou nou. Zot kapav konn bien tigit kitsoz lor bann Témoins de Jéhovah, sauf seki zot bann camarade ki mal informé ou-soit ki ena certain prejugé finn dire zot. Certain pa content kan zot conjoint servi le temps ki zot ti habitué passé avek la famille, pou depense sa dan zot l’adoration. Si nou servi nou bon sens, sa pou aide nou traite enn conjoint ki pa Témoin avek bonté ek respé ek nou pa pou montré ki nou mal a l’aise kan nou avek li.—Prov. 16:20-23.
3. Ki kitfois meilleur fason nou kapav aide enn conjoint ki pa Témoin accepté la verité?
3 L’interet personnel: Meilleur fason pou nou aide enn conjoint ki pa Témoin accepté la verité, au moins au commencement, c’est kitfois par nou bann action, pa a travers enn conversation biblik. (1 Pierre 3:1, 2) A cause sa, li important ki nou montré enn l’interet personnel. Bann soeur dan congregation kapav interesse-zot avek bann femme ki pa Témoin, ek bann frere kapav faire pareil envers bann mari ki pa Témoin. Couma zot kapav faire sa?
4. Couma nou kapav manifesté enn l’interet personnel?
4 Si ou pankor joinde enn conjoint ki pa Témoin, koz sa avek so conjoint ki chretien ek kitfois apré ou pou kapav koz avek sa conjoint ki pa Témoin-la. Pa bizin decouragé si au commencement sa conjoint ki pa Témoin-la pa montré l’interet pou seki nou pé faire. Kan nou montré-nou amical ek ena enn l’interet personnel envers li, sa kapav pousse li pou apprecié plus bann Témoins de Jéhovah. (Rom. 12:20) Certain chretien mur finn invite enn conjoint ki pa Témoin avek so famille pou prend enn repas, avek l’intention pou faire plus connaissance ek pou tire tou prejugé ki kapav existé. Zot finn koz lor seki interesse sa conjoint-la, au-lieu ki zot inn faire la conversation tourne autour bann sujet spirituel. Plitar, kan sa conjoint ki pa Témoin-la senti-li pli a l’aise, lerla kitfois pou kapav commence enn conversation lor la Bible. Ou-soit li kapav accepté l’invitation pou assisté enn nou bann reunion pou guette seki so madame pé aprann, surtout ki li deja konn certain dan la congregation. Mem si li pankor pré pou pose bann question lor la verité, nou kapav felicite li pou bann soutien ki li pé donne so conjoint ki Témoin.
5. Couma bann ancien kapav aide enn conjoint ki pa Témoin accepté la verité?
5 Bann ancien surtout bizin aide bann conjoint ki pa Témoin ek rod bann l’occasion pou rann enn temoignage. Enn conjoint ki pa Témoin ki avant pa finn montré l’interet pou enn conversation biblik, kapav ecoute bann l’encouragement ki ena dan la Bible kan li dan l’hopital ou-soit kan li pé faire face ar bann probleme la santé bien grave. Si enn famille ki divisé lor plan spirituel pé passe par enn moment difficile, couma par exemple, la mort enn membre la famille, bann ancien kapav invite sa conjoint ki pa Témoin-la pou ecoute bann parole reconfortant ki zot pou dire la famille.
6. Kifer nou bizin aide bann conjoint ki pa Témoin pou accepté la verité?
6 Mazinn la joie ki enn chretien dan nou congregation pou ena si so mari ou-soit so femme manifesté l’interet ek vinn dan la verité! Enn l’evenement joyeux coumsa pou aussi faire Jéhovah, bann ange ek lezot membre dan la congregation bien content. (Luc 15:7, 10) Selman, mem si au commencement, sa conjoint ki pa Témoin-la pa montré l’interet, nou kapav heureux. Kifer? Parski Jéhovah—ki “pa envie ki personne detruire, mais . . . envie ki tou dimoune repenti”—prend plaisir dan bann zeffort ki nou pé contigne faire.—2 Pierre 3:9.
[L’encadré page 6]
Meilleur fason pou nou aide enn conjoint ki pa Témoin accepté la verité, au moins au commencement, c’est kitfois par nou bann action, pa a travers enn conversation biblik