Enn nouveau serie lartik pou commence bann l’etude la Bible
1. Ki nouveau serie lartik pou parette dan La Tour de Garde, ek dan ki fason inn faire sa bann lartik-la?
1 A partir mois janvier, pou ena enn nouveau serie lartik ki pou publié dan La Tour de Garde edition publik, en français, ek dan La Tour de Garde 1er février, en creole. Sa pou aide nou commence bann l’etude la Bible. So titre c’est: “Anou aprann ar Parole Bondié.” Pena doute ki certain dan territoire pou content pou lire chaque lartik dan sa serie-la, mais inn faire sa bann lartik-la dan enn fason pou ki nou kapav servi zot kan nou pé koz avek bann dimoune.
2. Ki pou ena dan sa bann lartik-la?
2 Ki pou ena dan sa nouveau serie lartik-la?: Finn ecrire titre ek bann sous-titre dan forme bann question ki ou kapav demann dimoune-la dan ou conversation. Inn zis cite reference bann verset important, sans ki’nn ecrire bann parole bann verset-la, pou ki dimoune-la gagne la joie pou aprann direct dan Parole Bondié. Bann paragraphe-la courte pou ki kapav examine zot devant la porte dimoune-la-mem. Chaque lartik faire reference ar livre Ki la Bible enseigné? pou aide ou pou contigne l’etude dan sa livre-la kan bizin.
3. Kan ou pé preche porte en porte, couma ou kapav servi sa serie lartik-la pou commence l’etude la Bible devant la porte?
3 Couma pou servi li: Kan ou pé presente bann periodik ou kapav pose enn question ki kapav interesse dimoune-la, enn question ki koz lor lartik-la en general. Par exemple, numero 1er janvier, en français, ek 1er février, en creole, koz lor valeur ki la Bible ena. Ou kapav demandé: “Eski ou considere la Bible couma Parole Bondié ou-soit zis couma enn bon livre? [Laisse dimoune-la reponn.] Mo ena enn kitsoz interessant lor sa sujet-la.” Montré premier question, lire premier paragraphe, ek guette dan la Bible texte ki’nn cité. Lire question-la encore enn fois, ek demann dimoune-la seki li pensé. Examine bann paragraphe dapré seki dimoune-la kapav, servi bann question kot ena enn numero, pou base ou conversation. Avant ou quitte dimoune-la, attire so l’attention lor prochain question kot ena enn numero ek fini faire bann l’arrangement precis pou retourné ek pou koz lor sa question-la. Retourné pou koz plus lor sa lartik-la toulé-semaine ziska ki ou kapav amenn prochain numero La Tour de Garde. Enn lot kitsoz ki ou kapav faire c’est servi methode direct ek propose dimoune-la enn l’etude la Bible. Apré servi lartik ki ena dan periodik-la pou montré couma enn l’etude deroulé.
4. Couma nou kapav servi sa bann lartik-la kan nou pé faire bann nouvelle visite?
4 Ou kapav aussi servi sa serie lartik-la dan ou tournée periodik ek kan ou pé faire bann lezot nouvelle visite. Ou kapav zis dire: “Ena enn nouveau lartik dan La Tour de Garde. Laisse mo montré-ou couma ou kapav servi li.” Nou prié ki sa nouveau serie lartik-la pou aide pli beaucoup dimoune pou “gagne enn connaissance exact lor la verité.”—1 Tim. 2:4.