Qualité pli important ki enn bon enseignant bizin ena

1. Ki qualité bien important enn enseignant bizin ena?

¹ Ki kitsoz ki faire enn dimoune vinn enn bon enseignant la Bible? L’education ki li’nn gagné? So l’experience? So bann capacité? Avredir, seki pli important c’est sa mem qualité ki accompli la loi-la, ki identifié bann disciple Jésus ek qualité principal ki Jéhovah ena, ki plus attire nou vers Li. (Jean 13:35; Gal. 5:14; 1 Jean 4:8) C’est l’amour. Bann bon enseignant manifesté l’amour.

2. Kifer li bien important ki nou ena l’amour pou bann dimoune?

² L’amour pou bann dimoune: Jésus, nou grand Enseignant, ti montré l’amour pou bann dimoune ek sa ti encourage zot pou ecoute li. (Luc 5:12, 13; Jean 13:1; 15:13) Si nou interesse nou ar bann dimoune, nou pou donne temoignage dan tou l’occasion. Kan nou gagne bann obstacle couma persecution ek kan bann dimoune pa interessé ar nou message, sa pa decourage nou. Nou pou montré enn l’interet sincere ek personnel envers bann dimoune ki nou preché, ek nou pou adapté nou message ar bann kitsoz ki tracasse zot. Nou pou disposé pou prend le temps pa zis kan nou avek chaque etudiant la Bible mais aussi kan nou pé prepare nou avant chaque l’etude.

3. Couma l’amour pou bann verité biblik aide nou dan ministere?

³ L’amour pou bann verité biblik: Jésus ti ena aussi l’amour pou bann verité biblik ek li ti considere zot couma bann tresor. (Mat. 13:52) Si nou content la verité, nou pou koz avek enthousiaste, ek sa pou pousse bann dimoune pou envie ecoute nou. Sa qualité l’amour-la pou aide nou pou fixé nou l’attention lor valeur nou message ki nou pé partagé, au lieu ki nou concentré nou lor nou bann limite. Coumsa nou pou moins stressé dan nou ministere.

4. Couma nou kapav cultive l’amour?

⁴ Cultive l’amour: Couma nou kapav cultive l’amour pou bann dimoune? C’est kan nou medite lor l’amour ki Jéhovah ek so Garson inn montré ek mauvais condition spirituel bann dimoune dan nou territoire été. (Marc 6:34; 1 Jean 4:10, 11) Kan nou ena enn l’etude personnel ki regulier ek nou medité, nou l’amour pou bann verité biblik pou vinn pli profond. L’amour forme partie fruit l’esprit. (Gal. 5:22) Alors, nou kapav suppliye Jéhovah pou ki Li donne nou l’esprit saint ek demann Li aide nou pou ki nou l’amour grandi. (Luc 11:13; 1 Jean 5:14) Mem si nou ena enn bon l’education, nou ena l’experience dan la verité, ou-soit nou ena bann capacité naturel, c’est selman si nou manifesté l’amour ki nou pou enn bon enseignant la Bible.