Question Ki’nn Soulevé

◼ Ki bann principe Biblik ki appliké ar l’utilisation bann telephone portable dan reunion ek dan predication?

“Pou Tou Kitsoz Ena enn le Temps Fixé.” (Eccl. 3:1): Bann telephone portable permette bann dimoune pou envoye message ek pou koz avek lezot n’importe ki ler. Selman, ena bann moment kot bann Chretien pa envie ki zot telephone portable derange zot. Par exemple, nou bann reunion c’est enn moment kot nou adore Jéhovah, gagne bann l’instruction spirituel, ek kot sakenn encourage so camarade. (Deut. 31:12; Ps. 22:22; Rom. 1:11, 12) Eski nou kapav teigne nou telephone kan nou arrive reunion ek guette nou bann message kan nou’nn sorti reunion? Si kitfois nou pé attann enn call urgent ek nou bizin quitte nou portable allumé, nou bizin reglé li dan enn fason ki li pa pou derange lezot.

“Faire Tou Kitsoz a Cause la Bonne Nouvelle.” (1 Cor. 9:23): Parfois, nou ena bann bon raison pou servi nou portable dan nou ministere. Par exemple, frere ki responsable predication kitfois pou servi so portable pou prend nouvelle bann ki pé preché dan bann lezot blok. Parfois, bann proclamateur servi zot portable pou telephone enn dimoune interessé ou-soit enn etudiant la Bible avant ki zot al faire visite, surtout si dimoune-la reste assez loin. Si nou ena enn telephone avek nou, nou bizin prend bann precaution pou ki sa pa derange nou kan nou pé koz avek enn dimoune. (2 Cor. 6:3) Letan nou pé attann lezot proclamateur, au lieu ki nou telephone ou-soit envoye message enn camarade, eski li pa pou pli bon ki nou reste concentré lor nou ministere ek lor bann proclamateur avek ki nou pé travail?

Ena Consideration pou Lezot. (1 Cor. 10:24; Phil. 2:4): Fodé jamais nou pensé ki nou kapav permette-nou arrive en retard dan reunion predication parski nou pensé nou kapav telephone ou-soit envoye message enn kikenn pou koné kot-sa nou groupe pé preché. Kan nou arrive en retard, souvent bizin ré-organise groupe. Bien sur, parfois ena bann situation ki nou pa kapav controlé ki faire nou arrive en retard. Selman, kan nou prend l’habitude pou arrive a ler, nou montré ki nou ena consideration pou disposition ki Jéhovah inn prend, pou frere ki responsable predication, ek pou bann lezot proclamateur.