Jeune Frere, Eski Ou Ena Desir pou Gagne Bann Privilege?
1. Kan eski enn jeune frere bizin commence suive conseil ki ena dan 1 Timothée 3:1?
1 “Si enn zom ena desir [pou gagne bann privilege] . . . , li pé rod faire enn bon travail.” (1 Tim. 3:1) Sa bann parole inspiré-la encourage bann frere pou qualifié zot pou gagne bann privilege dan congregation. Mais, eski ou bizin attann ki ou vinn enn adulte pou faire sa? Avredir, li pli bon ki ou commence ena desir pou gagne bann privilege kan ou ankor jeune. Sa pou permette ou gagne bann formation ek montré ki ou pou kapav servi couma assistant ministeriel kan ou vinn pli grand. (1 Tim. 3:10) Si ou enn jeune frere, couma ou kapav travail pou gagne bann privilege?
2. Couma ou kapav developpe ek montré l’esprit sacrifice?
2 L’Esprit Sacrifice: Pa blié ki ou desir c’est pou faire enn bon travail, pa pou gagne enn titre. Alors, developpe desir pou servi ou bann frere ek soeur. Enn fason pou faire sa, c’est kan ou medite lor bon l’exemple Jésus. (Mat. 20:28; Jean 4:6, 7; 13:4, 5) Demann Jéhovah pou aide ou pou interessé avek lezot. (1 Cor. 10:24) Eski ou kapav donne enn l’aide pratik bann ki agé ou-soit ki handicapé dan congregation? Eski ou porte-ou volontaire pou coupe gazon, nettoye lakour, ou-soit faire lezot kitsoz pou entretenir la Salle du Royaume? Eski ou kapav porte-ou volontaire pou remplace enn sujet dan Lekol Ministere Theocratik? Ou pou trouvé ki kan ou donne-ou-mem pou lezot, sa pou faire ou gagne la joie.—Actes 20:35.
3. Kifer li important ki ou ena enn bon spiritualité, ek couma ou kapav developpe sa?
3 Spiritualité: Li pli important pou enn kikenn ki pé servi dan congregation ena enn bon spiritualité plutot ki bann talent ou-soit bann capacité naturel. Enn dimoune spirituel essaye trouve bann kitsoz pareil couma Jéhovah ek Jésus trouvé. (1 Cor. 2:15, 16) Li manifesté “fruit l’esprit.” (Gal. 5:22, 23) Li aussi enn kikenn ki zelé dan predication ek ki mette Royaume Bondié en premier dan so lavi. (Mat. 6:33) Ou kapav developpe bann qualité spirituel kan ou ena enn bon programme letid personnel. Sa implik lire la Bible toulé-jour, lire chaque numero La Tour de Garde ek Réveillez-vous !, prepare ek assisté bann reunion congregation. (Ps. 1:1, 2; Héb. 10:24, 25) Kan li ti encourage Timothée ki ti ankor jeune pou faire bann progré spirituel, Paul ti ecrire: “Contigne veille bien lor . . . to l’enseignement.” (1 Tim. 4:15, 16) Alors, prepare bien bann devoir ki ou gagné dan Lekol Ministere Theocratik. Prepare-ou pou ou ministere, ek participe regulierement ladan. Fixé-ou bann l’objectif spirituel couma par exemple, vinn pionnier, servi dan Béthel, ou-soit assisté Lekol Biblik pou Bann Frere Celibataire, ek travail pou realise sa bann l’objectif-la. Enn bon spiritualité pou aide ou pou “sauvé, [ek] al loin ar bann desir la jeunesse.”—2 Tim. 2:22.
4. Kifer li important ki ou enn dimoune ki kapav faire confiance ek ki fidele?
4 Ki Kapav Faire Confiance ek Ki Fidele: Dan premier siecle, bann frere ki ti gagne responsabilité pou distribué mangé ar bann Chretien ki ti bizin l’aide, ti bann frere “ki [ti] ena enn bon reputation.” Pena doute ki ti konn zot couma bann dimoune ki kapav faire confiance ek ki fidele. A cause sa, bann zapotre pa ti tracassé si travail-la ti pou faire ou-soit non. Au contraire, sa ti permette zot pou concentré lor lezot kitsoz pli important. (Actes 6:1-4) Alors, kan donne ou enn responsabilité dan congregation, accompli li pli bien ki ou kapav. Imite Noé ki ti suive bien bann instruction ki Jéhovah ti donne li pou arrange l’arche. (Gen. 6:22) Ou fidelité ena valeur pou Jéhovah ek sa montré ki ou enn dimoune ki mur lor plan spirituel.—1 Cor. 4:2; guette l’encadré “Ki Bienfait Bann Formation Faire Ou Gagné?”
5. Kifer bann jeune frere bizin ena desir pou gagne bann privilege dan congregation?
5 Pareil couma Isaïe ti prophetisé, Jéhovah pé accelere rassemblement bann dimoune. (Is. 60:22) En moyenne, 250,000 dimoune pé prend bapteme toulé-l’année. Parski ena tou sa bann nouveau-la ki pé vinn dan la verité, bizin bann zom ki qualifié lor plan spirituel pou prend bann responsabilité dan congregation. Zordi, plis ki avant, ena beaucoup pou faire dan service Jéhovah. (1 Cor. 15:58) Jeune frere, eski ou ena desir pou gagne bann privilege dan congregation? Si oui, alors ou vrai-mem pé rod faire enn bon travail!
[L’encadré page 2]
Parski ena tou sa bann nouveau-la ki pé vinn dan la verité, bizin bann zom ki qualifié lor plan spirituel pou prend bann responsabilité dan congregation
[L’encadré page 3]
Ki Bienfait Bann Formation Faire Ou Gagné?
Bann jeune frere ki qualifié gagne bann bienfait kan bann ancien donne zot bann responsabilité ek forme zot. Enn surveillant circonscription ki ti pé assize lor l’estrade ek ti pé donne bann l’encouragement enn proclamateur apré reunion, ti remark enn jeune garson ki ti pé debouté pré kot zot. Alors li ti demann garson-la si li ti pé attann pou koz avek li. Sa jeune frere-la ti dire ki li ti gagne responsabilité pou passe aspirateur lor l’estrade apré chaque reunion. So bann parent ti pé al lakaz, mais li pa ti envie allé avant ki li fini so travail. Surveillant circonscription-la ti bien content pou sorti lor l’estrade. Li ti dire: “Pou forme bann jeune frere ki qualifié, bann ancien sa congregation-la ti touletan pé donne zot bann responsabilité. A cause sa, chaque fois ki mo ti passe dan sa congregation-la, souvent zot ti pé recommande enn jeune frere couma assistant ministeriel.”