Question Ki’nn Soulevé
◼ Ziska ki point enn proclamateur ki pankor baptisé bizin assisté reunion congregation ek participe dan ministere avant ki donne li bapteme?
Kan enn dimoune decide pou prend bapteme, c’est decision pli important ki li prend. Alors, avant ki enn dimoune prend bapteme, li bizin assez konpran ki Bondié pé demann li. En plis, li bizin deja pé montré ki li bien decidé pou vive en accord avek bann principe Bondié.
Bann Chretien inn gagne l’ordre pou pa neglige zot rassemblement. Alors, enn proclamateur ki pankor baptisé bizin deja pé montré ki li pé assisté bann reunion regulierement. (Héb. 10:24, 25) Li bizin aussi pé donne bann commentaire. Mem si sa pa enn condition pou li gagne bapteme, kitfois li pou donne so nom dan Lekol Ministere Theocratik.
En plis, bann Chretien inn gagne mission pou preche la bonne nouvelle ek faire bann disciple. Alors, enn proclamateur ki pankor baptisé bizin participe dan enn fason regulier dan ministere avant so bapteme. (Mat. 24:14; 28:19, 20) Pendant comié mois eski li bizin preché avant ki li prend bapteme? Li normal ki bizin donne li assez le temps pou montré ki li bien determiné pou participe avek zele ek dan enn fason regulier dan so ministere mois apré mois. (Ps. 78:37) Selman, li pa necessaire ki ena enn longue periode le temps depuis ki li’nn commence preché ziska ki li qualifié pou prend bapteme, kitfois zis deux-trois mois. Ki quantité ler li bizin mette lor so rapport predication? Pena bann regle precis pou sa. Bann ancien bizin guette chaque proclamateur so situation ek montré-zot raisonnable ek equilibré.—Luc 21:1-4.
Bann ancien (ou-soit bann assistant ministeriel dan bann congregation kot pena beaucoup ancien) ki faire reunion avek enn candidat bapteme bizin rappel ki chaque dimoune diferan, ek zot bizin servi zot bon jugement pou decidé si li qualifié pou bapteme ou-soit non. Zot pou attann ki li vrai-mem envie vinn enn Témoins de Jéhovah ek montré ki li apprecié privilege ki li ena pou frequente l’organisation Jéhovah ek pou participe dan ministere. Bann ancien comprend ki sa dimoune-la pankor grandi lor plan spirituel ou-soit pena mem capacité ki bann proclamateur baptisé ki ena l’experience. Si bann ancien pensé ki sa candidat-la pa qualifié pou prend bapteme, avek bonté zot bizin faire li koné pou ki bann raison Biblik zot inn prend sa decision-la, ek zot pou prend bann disposition pou li gagne l’aide spirituel ki li bizin.