Bann Lexperyans
◼ L’Australie: John, enn misie ki edike, ti al legliz kan li ti enn zanfan, me apre li ti vinn enn “vre ate.” Enn pionie ti donn li brosir La vie a-t-elle été créée ? ek kan pionie-la ti revizit li, ti kit brosir Origine de la vie avek li. Pionie-la ti kontign swiv so lintere kan li ti les bann dernie magazinn avek li ek ti atir so latansion lor bann lartik ki koz lor kreasion ouswa bann profesi Labib. Kan li ti trouve ki John ti’nn pare, li ti ofer li liv La Bible : Parole de Dieu ou des hommes ? Apre ki John ti lir sa liv-la, li ti koumans dir ki li nepli kone si Bondie existe ouswa non. Lerla, pionie-la ti koumans letid avek John dan liv Ki Labib Ansegne? ek li ti examinn paragraf 8 lor paz 20 ek paragraf 13-16 lor paz 23-24. Bann verse ki’nn site dan sa bann paragraf-la ti telman inpresionn John ki li ti dir: “Mo krwar mo bizin donn Labib enn deziem sans.”
◼ Mexique: Enn misie ti dir enn proklamater ki li pa krwar ki Labib inspire par Bondie. Proklamater-la ti propoz pou montre li bann prev ki Labib li inspire. Apre de-trwa diskision, seki misie-la ti pe aprann dan Labib ti koumans tous so leker. Seki ti tous li sirtou se bann prinsip Bondie. Li ti dir proklamater-la: “O-komansman, kan ou ek mwa, nou ti pe lir Labib, so bann konsey ti paret parey kouma bann konsey ki ena dan lezot liv ek sa pa ti ena lefe lor mwa. Me asterla, kan nou lir Labib, sirtou so bann konsey lor moralite, sa tous mo leker.”
◼ L’États-Unis: Kan zot ti pe fer predikasion spesial dan bann gran lavil, enn koup ti zwenn enn madam ki sorti Taïwan ek ki ti krwar dan Bondie. Selman, madam-la ti panse ki Labib se zis pou bann Eropeen ek bann Ameriken. Li ti vinn kot latab kot zot ti met bann piblikasion parski mem si li ti ena tou seki li ti bizin, li ti santi li perdi. Li ti espere ki Labib ti pou ed li gagn enn pli bon lavi. Sa koup-la ti koumans enn letid avek li dan liv Ki Labib Ansegne? ek anmemtan ti servi brosir La paix et le bonheur durables : comment les trouver. Olie ki zot ti examinn sapit 2 dan liv-la, zot ti get ansam seksion « Un guide bénéfique pour tous les humains » dan brosir-la. Apre ki li’nn examinn sis premie paragraf dan sa seksion-la, madam-la ti etone ek li ti dir ki Labib pa parey ditou kouma lezot liv relizie. Apre ki li ti examine kouma sertin profesi Labib inn akonpli, li ti dir: “Mo pa panse ki ena enn lot liv ki exakt kouma Labib!”
◼ Japon: Malgre ki enn dimounn ti dir enn proklamater ki li pa krwar dan Bondie, proklamater-la ti kontign vizit li pou koz avek li lor bann lartik « Hasard ou conception ? » ki ena dan Réveillez-Vous ! Tigit-tigit, sa misie-la ti sanz so fason panse ek ti koumans aksepte ki kitfwa ena enn Kreater. Asterla, li krwar ki ena enn Bondie, ek proklamater-la pe fer so letid dan brosir Enn Bon Nouvel Ki Sorti kot Bondie!
◼ Canada: Enn ser ti les bann dernie peryodik avek enn madam ki ti pe sorti kot li pou al dan so loto. Kan ser-la ti rann li vizit plitar, madam-la ti dir li dan enn fason ferm ki li pa interese ek ki li pa krwar dan Bondie. Ser-la ti desid pou pa abandone ek pou amenn pou li brosir Une vie pleinement satisfaisante : comment ? Kan ser-la ti reisi zwenn madam-la kot li, li ti dir madam-la ki mem si li kone li pa krwar dan Bondie, li ti pe pans li parski li kone ki madam-la ti pe elve so zanfan tousel. Li ti montre madam-la paragraf 6 lor paz 4 brosir-la, ki montre kotsa kapav gagn bann bon konsey. Apre sa, ser-la ti ankouraz madam-la pou lir bann sigzesion ki ena dan leson 2 ki montre kouma pou elve bann zanfan. Madam-la ti bien kontan pou gagn brosir-la.