Swiv Lexanp Bann Profet—Mika
1. Lor ki kestion kitfwa Mika ti reflesi, me kifer so predikasion pa ti dan vid?
1 ‘Kan eski lafin sa move lemond-la pou arive?’ Kitfwa profet Mika ti reflesi lor enn kestion koumsa kan li ti pe anons bann mesaz konsernan zizman Jéhovah kont rwayom Israël ek rwayom Juda. Me, so predikasion pa ti dan vid. An 740 Avan Nou Lepok, kan Mika ti ankor vivan, bann parol ki Jéhovah ti dir kont Samarie ti realize. (Mika 1:6, 7) Plitar, Jérusalem ti detrir an 607 Avan Nou Lepok. (Mika 3:12) Kouma nou kapav imit Mika amezir ki nou atann ki Jéhovah exekit so bann zizman dan nou lepok?
2. Kouma ek kifer nou montre nou ena pasians amezir ki nou atann zour Jéhovah?
2 Ena Pasians: Mika ti ekrir: “Mwa, se Jéhovah ki mo pou kontign veye. Mo’le kontign atann Bondie ki pou sov mwa.” (Mika 7:7) Biensir, Mika pa ti zis asize ek atann lafin vini. Antan ki profet Jéhovah, li ti res bien okipe. Li parey pou nou’si. Amezir ki nou pe atann zour Jéhovah, nou bizin fer “bann aksion ki montre ki [nou] kondwit sin ek ki [nou] atase ar Bondie.” (2 Pierre 3:11, 12) Jéhovah so pasians donn bann dimounn letan pou repanti. (2 Pierre 3:9) Alor, nou pou ekout avek serye konsey ki Bondie donn nou pou imit pasians bann profet.—Jacq. 5:10.
3. Kifer nou bizin sipliy Jéhovah pou donn nou so lespri sin?
3 Kont lor Lafors Jéhovah: Mika ti ena enn mision difisil, me li ti kont lor Jéhovah pou gagn lafors pou akonpli so mision. (Mika 3:8) Se pa enn kwinsidans ki Parol Jéhovah ankouraz nou pou kont lor Bondie pou gagn lafors. Jéhovah kontan pou donn lafors bann ki fatige pou ki zot kapav akonpli zot bann responsabilite teokratik. (Ps. 84:5, 7; Is. 40:28-31) Eski oumem ou’nn deza fer sa lexperyans-la dan ou servis? Eski souvan ou sipliy Jéhovah pou donn ou lafors par mwayin so lespri sin?—Luc 11:13.
4. Par so fason viv, kouma Mika inn les nou enn bon lexanp?
4 Pandan toutlong so lavi, se volonte Bondie ki Mika ti fer pas an premie. Li ti bien determine pou res fidel malgre ki li ti viv dan enn lanvironnman degrade lor plan moral. Li parey pou nou’si. Sak zour nou lintegrite pas par bann test. Alor, anou plis determine pou “mars o-nom Jéhovah nou Bondie pou touletan.”—Mika 4:5.