Inn Gagn San-t-an Depi Ki Nou Pe Proklam Rwayom!
1. Apepre san-t-an avan, ki lepep Jéhovah ti ankouraze pou fer?
1 “Pran kont, Lerwa pe regne! Zot so bann mesaze. Alor proklam, proklam, proklam Lerwa ek so rwayom.” Sa fer preske san-t-an depi ki Frer Rutherford inn pronons sa bann parol bien pwisan la. Sa bann parol-la finn ankouraz lepep Bondie pou fer tou dimounn, partou lor later, konn mesaz lor Rwayom. Ek se seki nou finn fer! Parey kouma bann premie Kretien, nou finn pres bon nouvel lor Rwayom “dan tou kreasion anba lesiel.” (Col. 1:23) Kouma nou finn fer sa pandan sa siek ki finn pase la? Kouma nou kapav kontign fer sa amezir ki 100em laniverser nesans Rwayom Bondie pe koste?
2. Kouma nou bann piblikasion met laksan lor Rwayom Bondie?
2 Nou Get Deryer: Sa fer plizir dizenn lane ki nou bann piblikasion pe met laksan lor Rwayom Bondie. Depi 1939, nou magazinn prinsipal finn gard tit: Latour Degard Pe Anons Rwayom Jéhovah. Sa magazinn-la koz souvan lor Rwayom ek seki sa Rwayom-la pou fer. Magazinn Réveillez-vous ! osi met laksan lor Rwayom Bondie antan ki sel lespwar pou bann dimounn. Alor sa pa etonn nou ki azordi sa de magazinn-la se bann magazinn ki plis tradir ek plis distribie dan lemond antie!—Rev. 14:6.
3. Sit bann sertin metod ki nou’nn servi pou proklam Rwayom.
3 Lepep Jéhovah finn servi diferan metod pou proklam Rwayom. Dan lepase, nou ti servi bann loto avek bann oparler, radio, ek bann gramofonn portatif. Sa bann metod-la inn ed nou proklam bon nouvel avek boukou dimounn, dan enn lepok kot ti ena bien tigit proklamater. (Ps. 19:4) Dan bann dernie lane ki’nn pase, nou finn pibliye bann linformasion lor jw.org. Gras-a sa metod-la, nou pe proklam Rwayom ar plizir milyon dimounn—parmi ena bann ki viv dan bann pei kot nou laktivite li interdi.
4. Dan ki lezot form predikasion spesial nou finn lans nou?
4 Lepep Jéhovah finn lans zot osi dan lezot form predikasion spesial pou fer bann dimounn konn mesaz lor Rwayom. Par exanp, ver lane 1995, nou finn fer enn gran zefor pou pa zis pres lakaz par lakaz, me pou rann osi temwaniaz dan bann zardin piblik, bann parking, ek dan bann landrwa komersial. Pa tro lontan, dan bann gran lavil dan lemond antie, nou finn organiz osi enn gran temwaniaz dan bann plas piblik. Anplis, boukou kongregasion servi bann prezantwar ek bann latab ki zot instale dan bann landrwa kot boukou dimounn ale-vini. Biensir, nou predikasion lakaz par lakaz li res touzour metod prinsipal ki nou servi pou prese.—Actes 20:20.
5. Alor ki nouvo lane servis pe koumanse, ki lokazion sertin parmi nou pou kapav gagne?
5 Nou Get Devan: An Septam, nou pe koumans enn nouvo lane servis, ek boukou pe koumans sa lane-la antan ki pionie permanan. Eski to’si to pou parmi? Si to pa kapav, eski to kapav fer pionie tanporer detanzantan? Ki to kapav fer pionie ouswa non, pena dout ki Jéhovah pou beni ninport ki sakrifis to fer pou proklam Rwayom Bondie afon.—Mal. 3:10.
6. Kifer Oktob 2014 pou enn mwa bien spesial?
6 An Oktob 2014 sa pou fer 100 an depi ki Rwayom inn etabli. Alor, li apropriye ki sa mwa-la, edision piblik Latour Degard konsantre li lor Rwayom Bondie. Kifer nou pa fer enn zefor pou kit sa Latour Degard-la avek maximum dimounn? Alor ki nou pe get lavenir, anou kontign “anons bon nouvel lor Rwayom Bondie” ar tou bann ki pou ekoute.—Actes 8:12.