“Sa Bann Parol la . . . Bizin lor To Leker”
Bann paran parey kouma bann berze. Zot bizin pran bien swin zot zanfan ki kapav fasilman elwagne ek lerla li vinn pli fasil pou lezot atak zot. (Prov. 27:23) Kouma bann paran kapav ranpli bien zot rol berze? Sak zour zot bizin pran letan pou koz avek zot zanfan pou kone seki ena dan so lespri ek so leker. (Prov. 20:5) Pou fer lafwa zot zanfan vinn pli solid, bann paran bizin servi osi bann materyo ki reziste dife. (1 Kor. 3:10-15) Video “Sa Bann Parol la . . . Bizin lor To Leker” montre linportans pou fer ladorasion an fami regilierman. Get sa video-la an fami, ek apre examinn sa bann kestion-la:
(1) Ki finn amenn Frer Roman ek so fami pou negliz bann kitsoz spiritiel? (2) Kifer Frer Roman pa’nn reisi fer so ladorasion an fami premie fwa ki li’nn eseye? (3) Ki prinsip Labib kapav vremem ed enn paran pou elve so zanfan? (Det. 6:6, 7) (4) Ki pou ed enn fami ena enn pli bon kominikasion? (5) Ki kalite sakrifis bann paran bizin fer pou zot zanfan? (6) Kouma Frer ek Ser Barrow finn ena enn bon linflians lor Frer Roman ek so fami? (Prov. 27:17) (7) Kouma enn sef fami bizin prepar li alavans pou ki li ena enn bon ladorasion an fami? (8) Ki Frer Roman inn koumans fer pou sanz bann kitsoz dan so fami? (9) Kifer li bien inportan fer ladorasion an fami regilierman? (Efe. 6:4) (10) Sit sertin kitsoz ki to kapav fer pandan to ladorasion an fami? (11) Kouma Frer Roman ti gard so kalm me ti res ferm kan li ti ed Marcus pou konpran linportans pou fer seki drwat? (Zer. 17:9) (12) Kouma Frer ek Ser Roman ti ed Rebecca rezone pou li kapav pran enn bon desizion konsernan so relasion avek Justin? (Mark 12:30; 2 Tim. 2:22) (13) Kouma Frer ek Ser Roman inn montre lafwa kan zot inn fer bann sanzman dan zot lavi? (Mat. 6:33) (14) Kouma sa video-la montre ki bann mari bizin ed zot fami lor plan spiritiel? (1 Tim. 5:8) (15) Antan ki sef fami, ki to bien deside pou fer?
NOT POU BANN SEF FAMI: Se dan lasanble distrik 2011 ki ti prezant sa dram modern la. Eski sa lepok-la, to ti trouve ki to bizin amelior to ladorasion an fami? Ki to kapav dir asterla? Si to ankor bizin fer bann sanzman, priye Zeova. Demann Li pou ed twa fer sa bann sanzman-la pou ki to fami gagn bann bienfe pou touletan.—Efe. 5:15-17.