Ki To Kapav Fer pou Ede Apre enn Katastrof Natirel?

Azordi, nou gagn boukou plis katastrof natirel ki avan. Pou kapav ede apre enn katastrof natirel, li bien inportan ki nou fer sa dan enn fason organize. Akoz sa, Komite Santral finn met anplas enn Departman ki Donn Led Apre enn Katastrof dan sak biro nasional.

Kan bann frer ki dan sa departman-la aprann ki finn ena enn katastrof, deswit zot kontakte bann ansien dan sa landrwa-la pou kone ki led bann proklamater bizin. Si ena tro boukou dega ek ki bann proklamater pa kapav okip sa par zotmem, biro nasional pou avoy bann frer ki kalifie pou organiz travay-la. Sa bann frer-la kapav aste bann kitsoz ki manke, ouswa demann bann frer ek ser pou fer don bann kitsoz presi ek pou port zot volonter.

Ena boukou lavantaz kan nou fer bann kitsoz dan sa fason-la. Sa evit ki nou fer bann zefor dan vid, ki ena konfizion, ek ki nou gaspiy larzan ek bann kitsoz materyel.

Se bann frer ki biro nasional avoye ki pou kapav dir ki kantite larzan ek ki kantite volonter pou bizin. Zot kapav osi koz avek bann lotorite lokal, ki kapav ed nou pou fer sa bann travay-la pli vit. Si pa’nn demann twa pou fer sa, silteple pa pran linisiativ pou ramas larzan, avoy bann kitsoz materyel, ouswa vwayaze pou al dan sa landrwa-la.

Me selman kan ena enn katastrof natirel, nou kontan pou ede. (Eb 13:16) Nou kontan nou bann frer ek ser! Alor ki nou kapav fer? Enn kitsoz bien inportan ki nou kapav fer se priye pou bann ki’nn pas dan sa katastrof-la ek pou bann ki’nn al donn enn koudme. Nou kapav osi fer bann kontribision. Se bann biro nasional, ki travay anba direksion Komite Santral, ki pou kone kotsa ek kouma pou servi sa kas-la pli bien. Ek si nou anvi port nou volonter pou al ede, nou kapav ranpli enn form DC-50 (Demande d’admission comme volontaire local développement-construction).

GET VIDEO GRAN INONDASION DAN BREZIL, EK APRE SA, REPONN SA KESTION-LA:

Ki’nn tous twa kan to get bann zefor ki bann Temwin Zeova inn fer pou ed zot bann frer ek ser apre sa inondasion-la?