Kestion Bann Lekter
Apre nesans Zezi, kifer Zozef ek Mari inn res dan Betleem olie ki zot retourn kot zot dan Nazaret?
Labib pa dir nanye lor la. Me Labib donn nou de-trwa detay interesan ki explike kifer zot inn swazir pou pa retourn Nazaret deswit.
Enn anz ti dir Mari ki li ti pou tom ansint ek gagn enn zanfan. Kan anz-la ti dir sa, Mari ek Zozef ti pe res dan Nazaret, dan Galile, landrwa kot Zozef inn grandi. (Lik 1:26-31; 2:4) Plitar, kan zot ti kit Lezip, zot ti retourn dan Nazaret. Zezi inn grandi laba, akoz sa ti apel li Nazareen. (Mat. 2:19-23) Se pou sa rezon-la ki nou mazinn Nazaret kan koz lor Zezi, Zozef, ek Mari.
Mari ti ena enn fami ki ti apel Elizabet, ki ti res dan Zida. Elizabet ti madam enn pret ki apel Zakari ek li ti vinn mama Zan Batis. (Lik 1:5, 9, 13, 36) Mari ti vizit Elizabet ek li ti res kot li pandan trwa mwa. Apre sa, Mari ti retourn Nazaret. (Lik 1:39, 40, 56) Se pou sa rezon-la ki Mari ti konn sa landrwa-la bien.
Inpe letan apre, Zozef ti kit Nazaret ek li ti al Betleem, parski bann Romin ti donn lord pou ki tou dimounn “al anrezistre zot dan lavil kot zot ti ne.” Dapre enn profesi, Betleem ti osi lavil kot Lemesi ti pou ne. (Lik 2:3, 4; 1 Sam. 17:15; 20:6; Mish. 5:2) Kan Mari ti gagn Zezi dan Betleem, Zozef pa ti fer li fer enn long vwayaz pou retourn Nazaret avek enn zanfan ki fek ne. Zot ti res Betleem, ki ti apepre nef kilomet ar Zerizalem. Depi Betleem, li ti pou pli fasil osi pou zot amenn Zezi dan tanp, pou zot ofer sakrifis ki zot ti bizin fer dapre Lalwa.—Lev. 12:2, 6-8; Lik 2:22-24.
Anz Zeova ti dir Mari ki so garson ti pou gagn “tronn so zanset, David” ek ki li ti pou “dirize kouma Lerwa.” Kitfwa Zozef ek Mari ti konpran ki li bien inportan ki Zezi ne dan lavil kot David ti sorti. (Lik 1:32, 33; 2:11, 17) Kitfwa zot ti panse osi ki li ti pou pli bon ki zot res laba ziska ki zot kone seki Bondie anvi zot fer.
Nou pa kone komie letan zot ti pe res dan Betleem kan bann astrolog ti vinn get zot. Selman, sa lepok-la, zot ti pe res dan enn lakaz, ek Zezi ti enn “ti zanfan,” pa enn ti baba. (Mat. 2:11) Li paret ki olie ki zot retourn dan Nazaret, zot ti res dan Betleem pandan enn sertenn letan.
Erod ti donn lord “pou touy tou bann garson ki ti ena de-z-an ouswa mwins dan Betleem.” (Mat. 2:16) Enn anz ti averti Zozef. Alor, li ek so fami ti al Lezip ek zot ti res laba ziska ki Erod mor. Plitar, Zozef ti amenn so fami Nazaret. Kifer zot pa ti retourn Betleem apre sa? Parski Arkelais, garson Erod, ti pe diriz Zide ek li ti enn zom bien kriel. Enn anz ti osi averti Zozef ki zot ti pou an danze si zot ti retourn laba. Dan Nazaret, zot ti pou an sekirite pou elve Zezi.—Mat. 2:19-22; 13:55; Lik 2:39, 52.
Zozef kitfwa ti fini mor avan ki Zezi sakrifie so lavi ek donn bann dimounn posibilite pou al viv dan lesiel. Alor, Zozef pou resisite pou viv lor later. Lerla, boukou parmi nou pou gagn lokazion pou zwenn li ek pou kone kifer li ek Mari ti res Betleem apre nesans Zezi.