Paran—Ed To Zanfan pou Ena enn Lafwa For dan Zeova ek dan Labib

1-2. Kouma bann paran bizin reazir kan zot zanfan poz bann kestion lor Bondie ek lor Labib?

KITFWA boukou paran pou dakor ki se enn gran travay pou elve bann zanfan! Si to enn paran, sirman to fer boukou zefor pou ogmant lafwa to zanfan dan Zeova, ek nou felisit twa pou sa. (Det. 6:6, 7) Me amezir ki to zanfan grandi, kitfwa li pou koumans poz bann kestion lor nou bann krwayans, kouma par exanp, ‘Kifer Zeova pa anvi nou fer sertin kitsoz?’

² O-koumansman, kitfwa to kapav trakase. Kifer? Parski kitfwa to panse ki li pe poz sa bann kestion-la parski li pena ase lafwa dan Bondie ek dan Labib. Me avredir, amezir ki to zanfan grandi, li normal ki li poz bann kestion, parski sa pou ed li pou ogmant so lafwa. (1 Kor. 13:11) Alor, pa bizin tro trakase. Kan to zanfan poz bann kestion lor nou krwayans, sezi sa lokazion-la pou montre li kouma li kapav reflesi an profonder lor sa bann kitsoz-la. Koumsa, sa pou ogmant so lafwa dan Bondie.

3. Ki nou pou examine dan sa lartik-la?

³ Dan sa lartik-la, nou pou trouve kouma bann paran kapav ed zot zanfan pou (1) devlop enn lafwa for dan Bondie ek dan Labib, (2) fer li konpran ki li pou gagn bann bienfe si li swiv bann prinsip Labib konsernan seki bon ek seki pa bon, ek (3) montre li kouma pou defann so bann krwayans. Nou pou trouve osi kifer li inportan ki bann zanfan poz bann kestion, ek nou pou get sertin aktivite ki to kapav fer ar to bann zanfan. Nou pou trouve osi kouma sa kapav ed li kan li koz lor so bann krwayans.

ED TO ZANFAN POU DEVLOP ENN LAFWA FOR DAN BONDIE EK DAN LABIB

4. Ki kestion to zanfan kapav poze, ek kifer?

⁴ Si to ena lafwa dan Bondie, sa pa vedir ki to zanfan osi pou ena lafwa dan Bondie. Personn pa ne ar lafwa. Akoz sa, li kapav arive ki to zanfan poz bann kestion kouma: ‘Eski Bondie vremem existe?’ ouswa ‘Eski mo kapav vremem krwar seki Labib dir?’ Avredir, Labib ankouraz nou pou servi nou “kapasite pou reflesi” ek pou “verifie tou kitsoz.” (Rom. 12:1; 1 Tes. 5:21) Alor, kouma to kapav ed to zanfan pou ogmant so lafwa?

5. Ki bann paran kapav fer pou ed zot zanfan pou ena konfians dan Labib? (Romin 12:2)

⁵ Ankouraz to zanfan pou rod bann prev ki montre ki Labib ansegn laverite. (Lir Romin 12:2.) Kan to zanfan poz bann kestion, montre li kouma pou rod bann repons dan bann zouti kouma Index des publications des Témoins de Jéhovah ek Liv Resers pou Bann Temwin Zeova. Dan Liv Resers, si li al dan “Labib,” ek apre dan “Inspire par Bondie,” li pou gagn bann prev ki Labib pa’nn zis ekrir par bann zom, me li “parol Bondie.” (1 Tes. 2:13) Par exanp, li kapav fer bann resers dan nou bann piblikasion pou aprann plis lor lavil Niniv. Dan lepase, sertin Biblis ti dir ki sa lavil-la pa ti existe. Me ver 1850, kan bann arkeolog inn fer bann lafouy, zot inn dekouver bann rwinn sa lavil-la. Sa montre ki Labib dir laverite lor lavil Niniv. (Sof. 2:13-15) Pou li konn plis lor kouma Labib ti predir destriksion Niniv, li kapav get lartik, “Eski To Ti Kone?” dan Latour Degard Novam 2021. Kan to ankouraz to zanfan pou konpar seki li pe aprann dan bann piblikasion ar bann lezot sours ki fiab, kouma par exanp bann ansiklopedi, sa pou ogmant so konfians dan Labib.

6. Kouma bann paran kapav ed zot zanfan pou trouve ki Labib li exakt? Donn enn lexanp. (Get zimaz osi.)

⁶ Ed to zanfan pou trouve ki seki Labib ansegne li exakt. Paran, rod bann lokazion pou koz ar to zanfan lor Labib ek lor zot lafwa dan Bondie. Par exanp, to kapav fer sa kan zot pe vizit enn mize, enn zardin, ouswa enn Betel. Kan zot pe vizit enn mize, to kapav atir so latansion lor bann obze, ouswa lor bann kitsoz ki’nn arive dan listwar. Sa kapav ed to zanfan pou trouve ki seki Labib dir, li exakt. Par exanp, eski to zanfan kone ki ena nom Bondie lor enn ros ki apel stèle de Mesha, ek ki trouv dan mize Louvre, dan Lafrans. Sa lobze-la ena plis ki 3,000 an, ek to kapav trouv so foto dan nou bann piblikasion ouswa lor Internet. Ena osi enn kopi sa ros-la ki expoze dan mize « La Bible et le nom divin » dan Biro Mondial Bann Temwin Zeova dan Warwick, New York. Lor sa ros-la, inn ekrir kouma Mesha, Lerwa Moab, ti rebel kont Izrael. Ek Labib finn montre ki sa finn vremem arive. (2 Ler. 3:4, 5) Kan to zanfan trouv bann prev ki montre ki Labib li exakt, sa kapav fer so lafwa vinn pli for.—Konpar ar 2 Kronik 9:6.

7-8. (a) Ki nou kapav aprann ar bann zoli kitsoz ek bann diferan form ki ena dan lanatir? Donn enn lexanp. (Get zimaz osi.) (b) Ki kestion kapav ed to zanfan pou ogmant so lafwa dan Bondie?

⁷ Ed to zanfan pou reflesi lor bann kitsoz extraordiner ki Zeova inn kree. Kan zot pe marse dan lanatir, ouswa kan to pe okip to zardin, atir latansion to zanfan lor bann diferan form ouswa bann desin ki ena dan lanatir, ek lor kouma nou kapav trouv sertin parmi sa bann form-la lor diferan kitsoz. Kifer? Parski sa bann form-la montre ki ena enn kikenn ki bien intelizan ki’nn kree sa bann kitsoz-la. Par exanp, ena boukou kitsoz dan lanatir, kouma bann galaxi, bann kokiyaz, sertin fey, ouswa leker enn fler soley, ki dan enn form spiral. Pandan plizir lane, boukou siantifik inn etidie sa form-la. Enn siantifik ki apel Nicola Fameli explike ki, kan to kont bann spiral ki ena dan sertin kitsoz ki trouv dan lanatir, to tom lor enn konbinezon sif ki bien presi. Bann siantifik apel sa konbinezon sif-la, suite de Fibonacci.a

⁸ Dan lekol, to zanfan kitfwa pou aprann bann lezot form ki ena dan lanatir. Par exanp, laplipar pie ena mem form: Zot ena enn tron, sa tron-la donn bann brans, ek sa bann brans-la donn bann pli tipti brans. Apel sa, form fractal. Dan lanatir, ena boukou lezot kitsoz ki ena form fractal. Me kisann-la ki’nn kree sa bann zoli form-la? Plis to zanfan reflesi lor bann kitsoz extraordiner ki ena dan lanatir, plis sa pou ogmant so lafwa ki se Bondie ki’nn kree tou kitsoz. (Ebre 3:4) Ek plis to zanfan grandi, plis to bizin ed li pou konpran kifer li bizin obeir Bondie. Par exanp, to kapav demann li, “Si Bondie inn kree nou, eski to pa panse ki Li konn pli bien ki nou, seki nou bizin fer pou ki nou ere?” Lerla, to kapav dir li ki Bondie inn donn nou Labib pou explik nou kouma nou kapav ere.

NASA, ESA, ek the Hubble Heritage (STScl/AURA)-ESA/Hubble Collaboration

FER TO ZANFAN KONPRAN KIFER LI BIZIN SWIV BANN PRINSIP LABIB KONSERNAN SEKI BON EK SEKI PA BON

9. Pou ki rezon to zanfan kapav poz twa bann kestion lor bann prinsip Labib?

⁹ Li kapav arive ki to zanfan ena bann kestion lor bann prinsip Labib konsernan seki bon ek seki pa bon. Alor, esey konpran kifer li poz sa bann kestion-la. To kapav demann tomem, ‘Eski li vremem pa dakor ar bann prinsip Labib, ouswa eski li zis pa kone kouma pou explik so krwayans ar lezot?’ Dan toule-de ka, to kapav ed to zanfan pou konpran kifer li bon ki nou obeir bann prinsip Labib. To kapav fer sa kan to etidie liv Viv Ere pou Touletan! avek li.b

10. Kouma to kapav ed to zanfan pou ena enn bon lamitie avek Zeova?

¹⁰ Ed to zanfan pou trouv so lamitie avek Zeova kouma enn kitsoz ki ena boukou valer. Kan to etidie Labib avek to zanfan, servi bann kestion ek bann lexanp ki ena dan liv Viv Ere pou Touletan!, pou esey konpran seki li panse ek seki li resanti. (Prov. 20:5) Par exanp, leson 8 dan sa liv-la dekrir Zeova kouma enn bon kamarad ki gagn nou traka, ek ki donn nou bann konsey ki protez nou ek ki fer nou gagn bann bienfe. Lerla, apre ki zot fini koz lor 1 Zan 5:3, to kapav demann li, “Kan to kone ki Zeova Li sa kalite Kamarad la, ki to panse lor bann kitsoz ki Li demann twa pou fer?” Sa kestion-la kapav paret sinp, me sa pou ed to zanfan pou konpran ki Zeova donn bann lalwa parski Li kontan nou.—Iza. 48:17, 18.

11. Kouma to kapav ed to zanfan pou obeir seki Labib ansegne? (Proverb 2:10, 11)

¹¹ Koz lor bann bienfe ki nou gagne kan nou met bann prinsip Labib an pratik. Kan zot lir Labib ouswa kan zot fer text ansam, explik li kouma bann prinsip Labib inn ed zot fami. Par exanp, to kapav ed li pou konpran kifer li bon kan travay dir ek kan touletan dir laverite. (Ebre 13:18) To kapav osi explik li ki, kan nou met an pratik bann prinsip ki ena dan Labib, sa ed nou pou ena enn bon lasante ek nou plis zwaye. (Prov. 14:29, 30) Si to zanfan konpran ki li kapav gagn bann bienfe kan li obeir seki Labib ansegne, li pou anvi fer sa toutlong so lavi.—Lir Proverb 2:10, 11.

12. Kouma enn papa ed so garson pou konpran ki, kan li obeir bann prinsip Labib, li gagn bann bienfe?

¹² Steve, ki res Lafrans, explike kouma li ek so madam ed zot garson Ethan pou konpran ki Zeova donn bann lalwa parski Li kontan nou. Steve dir: “Par exanp, kan nou koz lor enn lalwa, nou poz li bann kestion kouma, ‘Kifer Zeova anvi ki nou obeir sa lalwa-la? Kouma sa montre ki Zeova kontan nou? Ki kapav arive si to pa obeir sa lalwa-la?’” Sa bann konversasion-la ti ed Ethan pou devlop enn lafwa for dan bann prinsip Zeova konsernan seki bon ek seki pa bon. Steve dir: “Nou lobzektif se pou ed Ethan pou trouve ki sazes ki ena dan Labib, li pli siperyer ki sazes bann dimounn.”

13. Kouma to kapav form to zanfan pou met bann prinsip Labib an pratik? Donn enn lexanp.

¹³ Form to zanfan pou met bann prinsip Labib an pratik. Anou pran enn lexanp pou gete kouma to kapav fer sa. Si to zanfan pe lir ouswa pe etidie enn liv dan lekol, to kapav atir so latansion lor bann personaz ki ena dan sa liv-la. Bann personaz sa liv-la kitfwa pe fer bann kitsoz ki Zeova pa kontan. Par exanp, kitfwa zot komet limoralite ouswa zot violan. Ek par fason ki’nn ekrir sa liv-la, to zanfan kapav panse ki sa bann kitsoz-la zot normal. Alor, to kapav demann to zanfan, ‘Ki Zeova resanti kan Li trouv bann dimounn azir koumsa?’ (Prov. 22:24, 25; 1 Kor. 15:33; Fil. 4:8) Bann kestion koumsa kapav ed to zanfan pou trouve kifer li bon ki nou obeir Zeova. Anplis, si so profeser ouswa bann lezot zelev demann li seki li panse lor sa liv-la, li pou plis kapav koz lor so bann krwayans ar zot.

MONTRE TO ZANFAN KOUMA POU DEFANN SO KRWAYANS

14. Lor ki size enn zenn kapav gagn difikilte pou defann so bann krwayans, ek kifer?

¹⁴ Parfwa, enn zenn kapav gagn difikilte pou defann so bann krwayans. Par exanp, li kapav per ouswa gagn onte pou explike kifer li pa krwar dan teori levolision. Kifer? Parski so profeser kitfwa dir ki levolision, li pa enn teori, me se enn kitsoz ki’nn vremem arive. Alor, si to enn paran, kouma to kapav ed to zanfan pou krwar ki seki Labib dir li exakt?

15. Ki kitsoz kapav ed enn zenn pou ena plis konfians an limem, pou ki li kapav defann so krwayans?

¹⁵ Ed to zanfan pou ena plis konfians an limem pou ki li kapav defann so krwayans. Fode pa ki to zanfan onte parski li krwar dan enn Kreater. (2 Tim. 1:8) Boukou siantis panse ki lavi pa’nn aparet par azar, ouswa enn kout koumsa. Zot dir ki bizin ena enn Kikenn ki intelizan ki’nn kree tou seki ena dan lanatir. Akoz sa, zot pa krwar dan teori levolision, mem si ansegn sa dan boukou lekol inpe partou dan lemond. Enn kitsoz ki kapav ed to zanfan pou ogmant so lafwa ek pou ena plis konfians an limem, se kan li demann bann frer ek ser ki kitsoz inn konvink zot pou krwar dan enn Kreater.c

16. Kouma to kapav ed to zanfan pou explik lezot kifer li krwar dan enn Kreater? (1 Pier 3:15) (Get zimaz osi.)

¹⁶ Ed to zanfan pou ki li kapav explik lezot kifer li krwar dan enn Kreater. (Lir 1 Pier 3:15.) Kitfwa to kapav get ansam avek li seri lartik « Les jeunes s’interrogent—Création ou évolution ? » ki ena lor jw.org. Lerla, to kapav ed li pou swazir enn explikasion ki li ti pou kontan servi pou explik lezot kifer li krwar dan enn Kreater. Rapel li ki fode pa li rant dan bann deba avek so bann kamarad lekol. Ek si enn kikenn anvi koz lor sa size-la, ankouraz li pou donn enn explikasion ki sinp, me ki lozik. Par exanp, enn so bann kamarad kapav dir li: “Mo krwar zis dan seki mo trouve, ek Bondie zame mo pa’nn trouv Li.” Si sa arive, li kapav dir so kamarad: “Fer koumadir to pe marse dan enn lafore ek to ariv kot enn pwi. Eski to pou dir ki sa pwi-la inn aparet enn kout koumsa? Non. Sirman to pou panse ki bizin ena enn kikenn ki’nn fouy sa pwi-la, pa vre! Dan mem fason, eski to pa panse ki bizin ena enn Kikenn ki’nn kree nou planet ek lavi ki ena lor la?”

17. Kouma bann paran kapav ankouraz zot zanfan pou rod bann lokazion pou partaz bann verite ki ena dan Labib? Donn enn lexanp.

¹⁷ Ankouraz to zanfan pou rod bann lokazion pou partaz bann verite ki ena dan Labib. (Rom. 10:10) To kapav konpar bann zefor ki li pe fer pou koz lor so lafwa, ar bann zefor ki enn kikenn fer pou aprann zwe enn linstriman lamizik. O-koumansman, li pou aprann zwe bann lamizik ki sinp. Me avek letan, li pou zwe pli bien. Dan mem fason, o-koumansman, enn zenn kapav servi enn prezantasion ki sinp pou koz lor so lafwa. Par exanp, enn zenn kapav dir so kamarad: “Eski to ti kone ki bann inzenier ek bann siantis bien souvan kopie lor bann kitsoz ki zot trouve dan lanatir? Les mo montre twa enn video bien interesan ki koz lor la.” Kan li fini montre enn video ki ena dan seri video Eski Inn Kree Sa Ouswa Non?, li kapav dir so kamarad: “Kisann-la ki merit plis loner? Eski se sa siantis ki’nn kopie lor lanatir la, ouswa sa Kikenn ki’nn kree sa bann kitsoz-la?” Gras-a sa prezantasion bien sinp la, kitfwa so kamarad pou anvi aprann konn plis lor Zeova.

KONTIGN ED TO ZANFAN POU OGMANT SO LAFWA

18. Kouma bann paran kapav kontign ed zot zanfan pou ogmant zot lafwa dan Zeova?

¹⁸ Nou pe viv dan enn lemond kot laplipar dimounn pena lafwa dan Zeova. (2 Pier 3:3) Alor, paran, amezir ki to etidie Labib avek to zanfan, ankouraz li pou etidie bann size ki pou ogmant so respe pou Parol Bondie ek pou bann prinsip ki ena ladan. Ed li pou reflesi plis an profonder ek pou ogmant so lafwa dan Zeova kan to koz lor kreasion. Ed li osi pou konpran bann profesi Labib ki’nn fini realize. Ek pli inportan, pa bliye pou priye avek to zanfan ek osi pou priye pou li. Kan to fer tousala, to kapav sir ki Zeova pou rekonpans bann zefor ki to pe fer pou ed to zanfan pou ogmant so lafwa.—2 Kro. 15:7.