Servi Labib Kouma enn Laglas

Disip Zak ti konpar Labib ar enn laglas ki kapav ed nou pou trouve ki kalite dimounn nou ete vremem. (Zak 1:22-25) Kouma nou kapav servi bien nou laglas?

Konpran seki to pe lir. Si to zis get twa vit-vit dan enn laglas, kitfwa to pa pou trouv enn tas ki ena lor to linz. Dan mem fason, si to zis lir to Labib vit-vit, to pa pou trouve ki bann sanzman ki to bizin fer. Alor, to bizin pran letan pou konpran seki to pe lir dan Parol Bondie.

Konsantre twa lor bann sanzman ki to bizin fer, pa lor seki lezot bizin fer. Parfwa, kan to get dan enn laglas, to kapav trouv lezot osi ladan, ek lerla li kapav arive ki to konsantre twa lor bann defo ki lezot ena. Dan mem fason, to kapav lir Labib ek reflesi lor bann sanzman ki lezot bizin fer. Selman, sa pa pou ed twa pou fer bann sanzman ki bizin pou to amelior to personalite.

To bizin rezonab. Si to get twa dan laglas ek ki to trouv zis bann kitsoz ki to pa kontan, sa kapav dekouraz twa. Akoz sa, kan to lir Parol Bondie, to bizin rezonab parski li pa korek ki to pli strik ki Zeova kan to examinn tomem.—Zak 3:17.