LARTIK LETID 16
KANTIK 87 Vini! Zot Pou Gagn Rekonfor
Vinn Pli Pros ar Nou Bann Frer ek Ser, Sa Li Bon pou Nou!
“Gete! Li vremem bon ek li enn plezir pou bann frer res ansam dan linite!”—PS. 133:1.
PWIN PRINSIPAL
Dan sa lartik-la, nou pou gete kouma nou kapav vinn pli pros ar nou bann frer ek ser, ek nou pou get osi bann benediksion ki nou gagne kan nou fer sa.
1-2. Ki kitsoz bien inportan pou Zeova, ek ki Li anvi nou fer?
FASON ki nou tret bann dimounn bien inportan pou Zeova. Zezi inn ansegn nou ki nou bizin kontan nou prosin kouma nou-mem. (Mat. 22:37-39) Savedir ki nou bizin zanti mem anver bann ki pa servi Zeova. Kan nou fer sa, nou swiv lexanp nou Bondie Zeova ki “fer soley leve lor bann bon ek bann move toule-de ek li fer lapli tonbe lor bann ki drwat ek bann ki inzis toule-de.”—Mat. 5:45.
2 Me mem si Zeova kontan tou dimounn, Li kontan sirtou bann ki obeir Li. (Zan 14:21) Li anvi ki nou swiv so lexanp. Akoz sa, Li ankouraz nou pou ena enn “lamour profon” pou nou bann frer ek ser, ek pou montre “lafeksion ek tandres” anver zot. (1 Pier 4:8; Rom. 12:10) Sa kalite lamour ek lafeksion la, li parey kouma lamour ek lafeksion ki nou ena pou nou fami pros ek pou nou bann bon kamarad.
3. Ki nou bizin rapel konsernan lamour?
3 Nou kapav konpar nou lamour pou nou bann frer ek ser ar enn plant. Parey kouma nou bizin fer zefor pou okip enn plant ki dan nou zardin pou ki li grandi, nou bizin fer zefor pou grandi lamour ki nou ena pou nou bann frer ek ser. Lapot Pol ti donn bann Kretien sa konsey-la: “Ki zot kontign ena lamour fraternel.” (Ebre 13:1) Zeova anvi ki nou kontign fer zefor pou ogmant nou lamour pou nou bann frer ek ser. Dan sa lartik-la, nou pou gete kifer nou bizin vinn pli pros ar nou bann frer ek ser, ek nou pou gete osi kouma nou kapav kontign fer sa.
KIFER NOU BIZIN VINN PLI PROS AR NOU BANN FRER EK SER?
4. Dapre Psom 133:1, kouma nou kapav kontign montre ki linite ki ena ant bann serviter Zeova ena boukou valer pou nou? (Get zimaz osi.)
4 Lir Psom 133:1. Sirman nou pou dakor ar sa ekrivin psom ki ti dir ki li “bon” ek li “enn plezir” ki nou kamarad ar bann ki kontan Zeova. Selman, li kapav arive ki parfwa nou bliye sa zoli linite ki ena parmi bann serviter Zeova. Anou pran enn lexanp pou explik sa. Kan premie fwa nou pe pas lor enn sime ek ki nou trouv enn extra zoli pie devan nou, kitfwa nou pou inpresione par li. Me afors ki nou pas devan sa pie-la toulezour, nou kapav bliye ki kantite li zoli. Dan mem fason, afors ki nou trouv nou bann frer ek ser plizir fwa par semenn, nou kapav bliye sa zoli linite ki ena ant bann serviter Zeova la. Kouma nou kapav kontign montre ki sa linite-la ena boukou valer pou nou? Nou fer sa kan nou reflesi lor ki kantite sakenn parmi nou bann frer ek ser bien inportan pou lasanble ek pou nou. Lerla, sa pou ogmant nou lamour pou zot.
Fode zame nou bliye zoli linite ki ena parmi bann serviter Zeova (Get paragraf 4)
5. Kan bann dimounn trouv lamour ki ena parmi bann serviter Zeova, ki lefe sa kapav ena lor zot?
5 Kan sertin vinn Lasal pou premie fwa, zot bien inpresione kan zot trouv lamour ki ena ant bann serviter Zeova, ek kitfwa samem ase pou konvink zot ki zot inn trouv laverite. Zezi ti dir: “Tou dimounn pou kone ki zot mo bann disip si zot ena lamour ant zot.” (Zan 13:35) Anou get lexanp Chaithra, enn etidian Labib ki ti pe swiv bann kour dan liniversite. Chaithra ti aksepte enn linvitasion pou asiste enn lasanble rezional. Apre so premie zour lasanble, li ti dir sa ser ki fer so letid la: “Mo bann paran zame inn pran mwa dan zot lebra. Me dan sa premie zour lasanble la, 52 fwa bann dimounn inn pran mwa dan zot lebra ek inn may mwa avek boukou lamour! Gras-a bann frer ek ser, mo’nn santi ki Zeova vremem kontan mwa. Mo vremem anvi form parti dan so fami.” Chaithra inn kontign etidie, li’nn fer bann sanzman dan so lavi, ek li’nn pran batem an 2024. Kan bann nouvo trouv nou bann bon aksion, kouma par exanp lamour ki nou ena ant nou, bien souvan sa ankouraz zot pou servi Zeova.—Mat. 5:16.
6. Kan nou vinn pli pros ar nou bann frer ek ser, kouma sa li enn proteksion pou nou?
6 Kan nou vinn pli pros ar nou bann frer ek ser, sa li enn proteksion pou nou. Pol ti dir bann Kretien: “Kontign ankouraz sakenn zot kamarad sak zour . . . pou ki personn parmi zot pa les so leker vinn dir par pouvwar ki pese ena pou anbet dimounn.” (Ebre 3:13) Parfwa, li kapav arive ki nou telman dekouraze ki nou trouv sa difisil pou fer seki bon. Dan sa ler-la, Zeova kapav servi enn frer ouswa enn ser ki’nn remarke ki nou dekouraze, pou donn nou led ki nou bizin. (Ps. 73:2, 17, 23) Sa kalite led-la, li vremem bon pou nou, pa vre!
7. Ki lien ena ant lamour ek linite? (Kolosien 3:13, 14)
7 Nou form parti enn group dimounn ki fer boukou zefor pou montre lamour anver zot kamarad, ek gras-a sa, nou gagn boukou benediksion. (1 Zan 4:11) Par exanp, lamour ed nou pou “kontign siport sakenn [nou] kamarad,” ek sa ede pou ki ena linite parmi nou. (Lir Kolosien 3:13, 14; Efe. 4:2-6) Se akoz sa ki dan nou bann renion ena enn bon lanbians pou ador Bondie, ek se enn kitsoz ki nou pa trouve dan okenn lezot plas.
“ONOR SAKENN ZOT KAMARAD”
8. Kouma Zeova ede pou ki ena linite parmi so bann serviter?
8 Sa linite ki ena parmi bann serviter Zeova la, se vremem enn mirak. Kifer? Parski akoz nou inparfe, se zis gras-a Zeova ki nou kapav ena sa linite-la parmi nou. (1 Kor. 12:25) Labib dir ki nou “finn aprann ar Bondie pou kontan sakenn [nou] kamarad.” (1 Tes. 4:9) Kouma Zeova fer sa? Gras-a Labib, Li dir nou seki nou bizin fer pou ki nou kapav vinn pli pros ar nou bann frer ek ser. Alor, pou ki nou “aprann ar Bondie,” nou bizin etidie bien bann lansegnman ki ena dan Labib ek met zot an pratik. (Ebre 4:12; Zak 1:25) Ek se samem ki bann Temwin Zeova fer zefor pou fer.
9. Dapre Romin 12:9-13, dan ki fason nou bizin montre ki nou onor sakenn nou kamarad?
9 Kouma Labib ansegn nou pou vinn pli pros ar nou bann frer ek ser? Anou gete seki Pol ti dir lor la dan Romin 12:9-13. (Lir.) Pol dir ki nou “bizin touzour premie pou onor sakenn [nou] kamarad.” Ki savedir? Nou bizin pran linisiativ pou montre “lafeksion ek tandres” anver lezot. Ena plizir fason ki nou kapav fer sa. Par exanp, nou fer sa kan nou pardonn lezot, ek kan nou montre lospitalite ek nou zenere anver lezot. (Efe. 4:32) Fode pa ki nou atann ki nou bann frer ek ser vinn pros avek nou; se nou ki bizin “premie” pou fer sa. Ek si nou fer sa, nou pou konn seki Zezi ti dir, kan li ti dir: “Ena plis lazwa kan done ki kan resevwar.”—Zist. 20:35.
10. Dan ki fason ankor nou kapav “onor sakenn [nou] kamarad”? (Get zimaz osi.)
10 Zis apre ki Pol dir ki nou bizin premie pou onor sakenn nou kamarad, li ankouraz nou pou “travay dir ek pa fer pares.” Kan to donn enn kikenn ki “travay dir” enn kitsoz pou fer, li fer zefor pou fer li bien. Proverb 3:27, 28 dir: “Pa refiz ed bann dimounn ki bizin led. Ed zot si to kapav fer li.” Alor, kan nou trouve ki enn kikenn bizin led, fode pa nou ezite pou ed li. Nou pa pou atann ki enn lot dimounn ed li. Okontrer, nou pou fer zefor pou ed li.—1 Zan 3:17, 18.
Kan nou trouve ki nou bann frer ek ser bizin led, nou bizin pran linisiativ pou ed zot (Get paragraf 10)
11. Ki kitsoz kapav ed nou pou vinn pli pros ar nou bann frer ek ser?
11 Enn lot fason ki nou kapav montre ki nou onor nou bann frer ek ser, se kan nou pa tarde pou pardonn zot kan zot ofans nou. Efezien 4:26 dir: “Pa res ankoler ziska ki soley kouse.” Kifer? Verse 27 dir pou ki nou “pa donn Lediab okenn lokazion.” Dan Labib, Zeova plizir fwa ankouraz nou pou pardonn lezot. Par exanp, Kolosien 3:13 dir ki nou bizin “kontign . . . pardonn sakenn [nou] kamarad avek tou [nou] leker.” Kan nou pardonn bann erer ki lezot fer, se enn bann meyer fason ki nou kapav vinn pros avek zot. Kan nou fer sa, nou ede “pou gard linite ki lespri sin prodir gras-a lape ki tini [nou] ansam.” (Efe. 4:3) Alor, li kler ki kan nou pardonn lezot, nou ede pou ki ena plis linite ek lape parmi bann serviter Zeova.
12. Kouma Zeova ed nou pou pardonn lezot?
12 Li vre ki sa kapav difisil pou pardonn bann ki’nn bles nou ek ofans nou. Me avek led lespri sin Zeova, nou pou reisi fer li. Apre ki Labib ankouraz nou pou ena “lafeksion ek tandres pou sakenn [nou] kamarad” ek pou “travay dir,” li dir: “Vinn bien devwe gras-a lespri sin.” Sa verse-la montre ki lespri sin Bondie kapav ed nou pou montre lafeksion ek tandres, ek pou pardonn lezot avek tou nou leker. Se akoz sa ki nou bizin sipliy Zeova pou Li donn nou so lespri sin.—Lik 11:13.
“FODE PA KI ENA DIVIZION PARMI ZOT”
13. Ki kitsoz kapav kree bann divizion?
13 Dan lasanble, ena “tou sort kalite dimounn” diferan laz, diferan kiltir, ek ki’nn grandi dan diferan fason. (1 Tim. 2:3, 4) Si nou pa fer atansion, sa bann diferans-la kapav kree bann divizion sirtou kan sa konsern bann swa personel, kouma par exanp nou labiyman, nou laparans, nou bann tretman medikal, ek nou bann divertisman. (Rom. 14:4; 1 Kor. 1:10) Alor, parski Bondie inn ansegn nou pou kontan sakenn nou kamarad, nou pa pou inpoz nou bann swa personel lor lezot ek nou pa pou panse ki nou bann swa personel pli bon ki pou lezot.—Fil. 2:3.
14. Ki zefor nou bizin touletan fer, ek kifer?
14 Kan nou touletan fer zefor pou ankouraz ek rekonfort lezot, nou ede pou ki pena divizion dan lasanble. (1 Tes. 5:11) Se dernie tan, boukou dimounn ki ti inaktif ouswa ki ti nepli form parti dan lasanble, inn retourn ar Zeova. Kan sa arive, nou akeyir zot avek boukou lamour! (2 Kor. 2:8) Enn ser ki ti inaktif depi 10 an ek ki ti rekoumans vinn renion ti dir: “Zot tou ti donn mwa lame ek ti akeyir mwa avek enn gran sourir.” (Zist. 3:19) Ki lefe sa finn ena lor li? Li dir: “Mo ti santi ki Zeova ti pe trap mo lame ek ki Li ti pe gid mwa pou ki mo ere.” Kan nou fer zefor pou ankouraz lezot, Zezi kapav servi nou pou rekonfort bann “ki pe rinte ek ki pe sarye enn pwa bien lour.”—Mat. 11:28, 29.
15. Sit enn lot fason ki nou kapav ede pou ki ena linite. (Get zimaz osi.)
15 Enn lot fason ki nou kapav ede pou ki ena linite, se par nou bann parol. Zob 12:11 dir: “Eski zorey pa examinn bann parol, parey kouma lalang gout manze?” Enn bon kwizinie pou touletan gout so manze pou fer sir ki li bon, avan ki li servi sa lezot. Dan mem fason, nou osi nou bizin reflesi bien lor seki nou pou dir avan ki nou koze. (Ps. 141:3) Nou anvi sir ki nou bann parol touletan ankouraz lezot, rekonfort zot, ek ‘fer dibien bann ki ekout’ nou.—Efe. 4:29.
Avan ki to koze, reflesi bien lor seki to pou dir (Get paragraf 15)
16. Kisann-la sirtou bizin ena bann parol ki ankourazan?
16 Se sirtou bann mari ek bann paran ki bizin vey bien lor seki zot dir. Zot bann parol bizin ankourazan. (Kol. 3:19, 21; Tit 2:4) Bann ansien osi bizin ankouraz ek rekonfort bann mouton Zeova. (Iza. 32:1, 2; Gal. 6:1) Enn proverb dir: “Enn bon parol ki tom dan ler ki bizin, ki kantite li bon!”—Prov. 15:23.
LAMOUR “PAR BANN AKSION EK LAVERITE”
17. Kouma nou kapav ena enn lamour sinser pou nou bann frer ek ser?
17 Lapot Zan ankouraz nou pou ena “lamour, pa zis an parol ouswa avek labous, me par bann aksion ek laverite.” (1 Zan 3:18) Nou lamour pou nou bann frer ek ser bizin sinser. Kouma nou kapav ena sa kalite lamour-la? Plis nou pas letan ar nou bann frer ek ser, plis nou pou vinn pros ar zot, ek plis nou lamour pou zot pou grandi. Alor, pran letan pou vizit zot ek rod bann lokazion pou pas letan avek zot, kouma par exanp dan renion ek dan predikasion. Kan nou fer sa, nou montre ki nou “finn aprann ar Bondie pou kontan sakenn [nou] kamarad.” (1 Tes. 4:9) Lerla, nou pou trouve ki “li vremem bon ek li enn plezir pou bann frer res ansam dan linite!”—Ps. 133:1.
KANTIK 90 Ankouraz Sakenn Parmi Nou