Toutlong Nou Lavi, Nou’nn Aprann ar Nou Gran Ansegnan

LEXANP MO BANN PARAN

Ver lafin bann lane 1950, mo bann paran ti kit Litali pou al res Kindersley, dan Saskatchewan, dan Kanada. Inpe apre, zot ti konn laverite ek sa ti vinn kitsoz pli inportan dan nou lavi. Mo rapel ki kan mo ti enn zanfan, mo ti pas bann long zourne dan predikasion avek mo fami. Akoz sa, pou badine, parfwa mo dir lezot ki mo’nn koumans fer “pionie tanporer” laz wit an!

Mo bann paran ti pov, me zot ti bann zoli lexanp parski zot ti fer bann sakrifis pou Zeova. Par exanp, an 1963, zot ti vann boukou kitsoz ki zot ti ena, pou gagn ase larzan pou ki zot kapav asiste lasanble internasional ki ti fer dan Pasadena, Californie, dan Letazini. An 1972, nou ti demenaze pou al res apepre 1,000 kilomet pli lwin, dan Trail, ki trouv dan Colombie-Britannique, dan Kanada. Nou ti al laba pou al ede dan enn teritwar kot bann dimounn ti koz Italien. Mo papa ti travay kouma pion, ek li ti refiz bann promosion ki li ti gagne pou ki li kapav konsantre li plis lor so servis pou Zeova.

Mo rekonesan pou lexanp ki mo bann paran inn donn mwa ek mo trwa frer ek ser. Zot lexanp ti premie formasion ki mo’nn gagne dan servis Zeova. Zot finn ansegn mwa enn kitsoz ki mo finn rapel toutlong mo lavi, setadir ki si mo met Rwayom an premie dan mo lavi, Zeova pou pran mwa swin.—Mat. 6:33.

MO RANT DAN SERVIS APLINTAN

An 1980, mo’nn marye ar Debbie, enn zoli ser ki ti ena bann bon lobzektif spiritiel. Nou ti anvi rant dan servis aplintan, alor Debbie ti koumans fer pionie trwa mwa apre nou maryaz. Apre enn an maryaz, nou ti al servi dan enn ti lasanble kot ti bizin plis proklamater, ek mwa osi, mo’nn koumans fer pionie.

Inpe letan apre, nou ti koumans dekouraze ek nou ti anvi sanz lasanble. Selman, avan nou fer sa, nou ti koz ar responsab sirkonskripsion. Li ti fran ar nou, ek avek boukou lamour, li ti dir nou: “Se zotmem ki pe fer zot sitiasion vinn pli difisil parski zot pe zis konsantre lor bann kitsoz negatif. Me si zot fer zefor pou rod bann kitsoz pozitif, zot pou reisi trouv li.” Se sa konsey-la mem ki nou ti bizin! (Ps. 141:5) Nou ti met li an pratik deswit ek bien vit, nou ti realize ki ti ena boukou kitsoz pozitif dan nou servis. Par exanp, boukou dan lasanble ti anvi fer plis pou Zeova, ek parmi zot, ti ena bann zanfan ek bann frer ek ser ki zot konzwin pa ti dan laverite. Gras-a sa sitiasion-la, nou ti aprann enn leson bien inportan. Nou ti aprann pou rod bann kitsoz pozitif ek pou ena konfians ki Zeova pou rezoud nou bann problem. (Mish. 7:7) Sa ti ed nou pou regagn nou lazwa ek nou sitiasion ti ameliore.

Bann formater ki nou ti gagne dan nou premie lekol pionie ti deza servi dan bann lezot pei. Kan zot ti montre nou bann foto ek kan zot ti koz lor bann difikilte ek bann benediksion ki zot ti gagne kan zot ti pe servi dan sa bann pei-la, sa ti donn nou lanvi pou servi kouma misioner. Alor, nou ti fixe lobzektif pou vinn misioner.

Pou reisi realiz nou lobzektif, an 1984, nou ti al servi dan Quebec, dan enn teritwar kot bann dimounn koz Franse. Sa teritwar-la ti trouv plis ki 4,000 kilomet ar Colombie-Britannique. Laba, nou ti bizin adapte ar enn nouvo kiltir ek aprann enn nouvo langaz. Enn lot difikilte ki nou ti gagne osi, se ki bien souvan nou pa ti ena ase kas. Pandan inpe letan, nou ti manz zis bann pomdeter ki enn planter ti les nou ramas dan so karo. Debbie ti vinn enn profesionel dan kwi pomdeter parski li ti aprann kwi li dan diferan fason! Mem si nou ti gagn bann difikilte, nou ti fer nou maximum pou kontign andire avek lazwa, ek nou ti trouve kouma Zeova ti pran nou swin.—Ps. 64:10.

Enn zour, nou ti gagn enn call telefonn ek nou ti gagn enn nouvel ki nou pa ti atann. Nou ti gagn enn linvitasion pou al servi dan Betel Kanada. Mem si nou ti bien kontan ki Betel ti invit nou, nou ti inpe sagrin osi parski inpe avan, nou ti ranpli enn form pou al Lekol Galaad. Selman, nou ti aksepte linvitasion pou al servi dan Betel. Kan nou ti ariv laba, nou ti zwenn Frer Kenneth Little, ki enn manb dan Komite Biro Nasional, ek nou ti demann li, “Ki pou arive pou bann form Galaad ki nou’nn ranpli?” Li ti reponn, “Nou get sa apre si zot invite pou al Lekol Galaad.”

Enn semenn apre, Debbie ek mwa, nou ti gagn linvitasion pou asiste Lekol Galaad. Alor, nou ti ena enn desizion pou pran. Frer Little ti dir nou: “Ninport ki desizion ki zot pran, pou ena bann zour kot zot ti pou swete ki zot ti pran lot desizion-la. Pena enn desizion ki pli bon ki lot; Zeova pou beni ninport ki desizion ki zot pran.” Alor, nou ti aksepte linvitasion pou al Galaad, ek plis letan pase, plis nou rann nou kont ki seki Frer Little ti dir ti vre. Akoz sa, kan lezot bizin swazir ant de lafektasion, bien souvan nou dir zot bann parol ki Frer Little ti dir nou.

NOU LAVI KAN NOU TI MISIONER

Nou ti bien kontan pou form parti sa 24 zelev ki ti dan 83^em klas Lekol Galaad la. Ti fer sa lekol-la an Avril 1987 dan Brooklyn, New York. Se Frer Ulysses Glass ek Jack Redford ki ti nou bann formater prinsipal. Sa sink mwa lekol la ti pas bien vit ek nou ti gagn nou diplom le 6 Septam 1987. Nou lafektasion ti Ayiti, ek nou ti al laba ansam avek John ek Marie Goode.

An 1962, ti expilse bann dernie misioner ki ti ena dan Ayiti. Depi sa lane-la, pa ti avoy okenn misioner Galaad laba. Me trwa semenn apre ki nou ti gagn nou diplom, nou ti pe servi dan Ayiti dan enn ti lasanble kot ti ena 35 proklamater ek ki ti trouv bien-bien lwin dan bann montagn. Nou ti zenn ek nou pa ti ena lexperyans. Anplis, nou ti pe res tousel dan enn lakaz misioner. Bann dimounn ki ti res dan Ayiti ti pov ek boukou parmi zot pa ti konn lir. Kan nou ti dan Ayiti, nou’nn konn bann violans akoz bann problem politik, bann koudeta, bann manifestasion, ek bann gro siklonn.

Nou’nn aprann boukou ar nou bann frer ek ser Ayisien parski zot ti zwaye ek zot ti ena boukou kouraz. Boukou parmi zot, zot lavi ti bien dir. Selman, zot ti kontan Zeova ek zot ti kontan predikasion. Ti ena enn ser aze ki pa ti konn lir, me pourtan li ti konn apepre 150 verse Labib par-ker. Akoz bann problem ki bann dimounn ti pe gagne, nou ti plis anvi partaz bon nouvel avek zot, parski samem ti sel solision pou tou zot bann problem. Sa ti bien tous nou kan nou ti trouve kouma sertin parmi nou bann etidian Labib ti vinn bann pionie permanan, bann pionie spesial, ek bann ansien.

Dan Ayiti, mo ti zwenn ar enn zenn misioner Mormon, ki apel Trevor, ek plizir fwa nou ti gagn lokazion pou koz lor Labib. Plizir lane apre, li ti ekrir mwa enn let, ek li ti dir: “Mo pe pran batem dan prosin lasanble! Mo anvi retourn Ayiti ek servi kouma pionie spesial dan mem landrwa kot mo ti pe servi kouma misioner pou bann Mormon.” Ek se samem ki li ti fer pandan plizir lane ansam avek so madam.

NOU AL LEROP EK APRE SA LAFRIK

Nou ti al servi dan enn parti Lerop kot ti pe koumans vinn pli fasil pou prese. An 1992, nou ti al Ljubljana, dan Sloveni, ki trouv pre kot mo bann paran ti grandi avan ki zot al res Litali. Sa lepok-la, Yougoslavi ti nepli existe ek li ti divize an plizir pei ki ti gagn zot lindepandans. Ti ankor ena lager laba. Biro nasional ki trouv dan Vienne, dan Lotris, ek osi bann biro ki dan Zagreb, dan Kroasi ek dan Belgrade, dan Serbi, ti diriz nou laktivite predikasion dan sa bann pei ki ti form parti dan Yougoslavi la. Aster-la, sakenn parmi sa bann pei-la ti pou gagn so prop Betel.

Ankor enn fwa, nou ti bizin adapte ar enn nouvo kiltir ek aprann enn nouvo lang. Bann dimounn dan landrwa ti abitie dir, “Jezik je težek,” ki vedir “Lang-la bien difisil.” Ek vremem sa lang-la ti difisil! Nou ti bien inpresione par fidelite nou bann frer ek ser ki ti pre pou aksepte ninport ki sanzman ki lorganizasion ti fer, ek nou ti trouve kouma Zeova ti beni zot. Ankor enn fwa, nou ti trouve kouma Zeova rezoud bann problem dan bon moman ek avek boukou lamour. Bann leson ki nou ti aprann avan ki nou ti al Sloveni, ti ed nou pou andir bann difikilte ki nou ti gagne laba. Me dan Sloveni osi nou ti aprann boukou lezot leson.

Nou ti konn ankor bann lezot sanzman dan nou lavi. An lan 2000, nou ti gagn enn nouvo lafektasion. Nou ti bizin al Kotdivwar, ki trouv dan Lwes Lafrik. Me an Novam 2002, parski ti ena enn lager sivil dan Kotdivwar, nou ti bizin kit pei-la ek al Siera Leonn. Dan Siera Leonn, enn lager sivil ki ti dire pandan 11 an, ti fek fini. Li ti bien difisil pou nou kit Kotdivwar enn kout koumsa. Selman, bann leson ki nou ti aprann dan lepase ti ed nou pou gard nou lazwa.

Nou ti konsantre nou lor nou teritwar parski boukou dimounn laba ti anvi konn laverite. Nou ti donn osi boukou latansion nou bann frer ek ser ki ti bien kontan Zeova ek ki ti andire pandan plizir lane akoz sa lager sivil la. Mem si zot ti bien pov, zot ti anvi partaz seki zot ti ena. Par exanp, enn ser ti donn Debbie bann linz. Kan Debbie ti ezite pou pran sa bann linz-la, ser-la ti persiste ek ti dir: “Pandan lager, bann frer ek ser dan lezot pei inn bien soutenir nou. Aster-la, se nou tour.” Zot ti vremem bann zoli lexanp, ek nou ti fixe lobzektif pou imit zot.

Avek letan, nou ti retourn Kotdivwar, me akoz sitiasion politik laba, finn rekoumans ena bann problem dan pei-la. Ek akoz sa, an Novam 2004, nou ti bizin kit pei-la par elikopter. Avek nou, nou ti ena zis de sak ki ti pez 10 kilo sakenn. Sa lanwit-la, nou ti dormi lor sali enn baz militer franse, ek so landemin, nou ti al Laswis. Nou ti ariv biro nasional Laswis ver minwi. Kan nou ti ariv laba, bann frer Komite Biro Nasional ek bann formater pou Lekol Formasion Ministeryel, ansam avek zot madam, ti bien akeyir nou. Zot ti may nou, zot ti donn nou enn manze so ek zot ti donn nou boukou sokola swis. Sa ti bien tous nou.

Pandan enn tan, nou ti al servi Gana, ek apre nou ti retourn Kotdivwar kan bann problem ki ti ena laba ti diminie. Bonte nou bann frer ek ser ti ed nou pou andir tou sa bann sitiasion ki nou ti viv la. Mem si li normal ki bann frer ek ser ena boukou lamour pou sakenn zot kamarad, Debbie ek mwa, nou ti dakor ki nou ti bizin touletan montre nou rekonesan pou sa. Avredir, mem sa bann sitiasion bien difisil la ti aprann nou bann leson bien inportan.

NOU AL DAN BANN PEI KI TROUV DAN LES

An 2006, nou ti gagn enn let ar biro mondial ek nou ti aprann ki nou ti pou al servi dan bann pei ki trouv dan Les. Savedir ki ankor enn fwa, nou ti pou bizin aprann enn nouvo lang, adapte ar enn nouvo kiltir, fer bann nouvo lexperyans, ek gagn bann nouvo difikilte. Nou ti ena boukou pou aprann dan sa teritwar-la, kot ti ena boukou problem akoz politik ek relizion. Nou ti bien kontan pou trouv sa kantite lang ki bann frer ek ser laba ti koze, ek nou ti trouve ki ti ena linite kan tou dimounn ti swiv bann instriksion ki sorti depi lorganizasion Zeova. Nou ti bien inpresione par kouraz sa bann frer ek ser la, parski laplipar parmi zot ti andir lopozision zot fami, bann kamarad lekol, bann koleg travay, ek zot bann vwazin.

An 2012, nou ti asiste lasanble spesial dan Tel Aviv, dan Izrael. Sa lasanble-la ti enn levennman extraordiner! Sa ti premie fwa, depi Lapantkot lane 33 Nou Lepok, ki sa kantite serviter Zeova ki res dan sa rezion-la ti zwenn ansam.

Pandan sa bann lane-la, bann frer ti avoy nou dan enn pei kot nou laktivite ti lor restriksion. Nou ti amenn inpe piblikasion avek nou, nou ti prese, ek nou ti asiste bann lasanble sirkonskripsion. Dan pei-la, ti ena bann solda arme ek bann baraz partou, me nou ti santi nou an sekirite parski nou ti pran bann prekosion kan nou ti vwayaze ansam avek bann frer ek ser.

NOU RETOURN DAN LAFRIK

An 2013, nou ti gagn enn lafektasion ki ti bien diferan. Nou ti al servi dan biro nasional Kinshasa, dan Kongo. Sa pei-la bien gran ek bien zoli. Me li ti osi bien pov ek li ti konn boukou lager. O-koumansman, nou ti dir, “Nou konn Lafrik; nou pare pou ale.” Me nou ti ena ankor boukou pou aprann, sirtou kan nou ti bizin al dan bann landrwa kot pa ti ena bann semin ek bann pon. Dan Kongo, nou ti konsantre nou lor bann kitsoz pozitif, kouma par exanp, perseverans ek lazwa nou bann frer ek ser, mem si zot ti bien pov. Nou ti konsantre nou osi lor lamour ki nou bann frer ek ser ena pou predikasion, ek bann zefor ki zot ti fer pou asiste renion ek bann lasanble. Nou ti trouve avek nou prop lizie, kouma deplizanpli boukou dimounn ti pe vinn dan laverite gras-a soutien ek benediksion Zeova. Bann lane ki nou’nn servi dan Kongo inn aprann nou bann leson bien inportan ek nou’nn osi gagn bann kamarad ki nou konsider kouma nou fami.

Ver lafin 2017, nou ti gagn enn lot lafektasion. Nou ti bizin al servi dan biro nasional Sid-Afrik. Sa ti pli gran biro nasional kot nou’nn servi, ek laba nou’nn fer bann travay ki zame nou pa ti fer avan. Ankor enn fwa, nou ti ena boukou kitsoz pou aprann, me bann leson ki nou ti aprann dan lepase ti bien ed nou. Nou bien kontan nou bann frer ek ser fidel ki pe andire depi plizir dizenn lane. Ek li extraordiner osi pou trouve kouma bann frer ek ser ki dan Betel, zot travay dan linite mem si zot sorti dan diferan kiltir. Li kler ki Zeova pe beni so pep ek ki Li pe donn zot lape parski zot inn met nouvo personalite lor zot ek ki zot pe met bann prinsip Labib an pratik.

Pandan tou sa bann lane-la, Debbie ek mwa nou’nn gagn bann zoli lafektasion. Nou’nn adapte ar diferan kiltir, ek nou’nn aprann bann nouvo lang. Li pa ti touletan fasil, me nou’nn touletan trouve kouma Zeova servi so lorganizasion ek bann frer ek ser pou montre so lamour fidel anver nou. (Ps. 144:2) Bann leson ki nou’nn aprann kan nou’nn servi Zeova aplintan inn ed nou pou vinn bann meyer serviter Zeova.

Mo bien rekonesan pou seki mo bann paran inn ansegn mwa, pou soutien mo madam, Debbie, ek pou bon lexanp nou bann frer ek ser ki dan lemond antie. Kan mwa ek mo madam nou pans lavenir, nou bien deside pou kontign aprann ar nou Gran Ansegnan.