Pa Tarde pou Ed Bann Dimounn Ki Interese ar Bon Nouvel

1. Kouma bann dimounn reazir kan nou pres bon nouvel? (Zistwar Bann Zapot 13:47, 48; 16:14, 15)

BOUKOU dimounn dan premie siek ti aksepte laverite deswit kan bann premie Kretien ti pres bon nouvel ar zot. (Lir Zistwar Bann Zapot 13:47, 48; 16:14, 15.) Azordi osi, bann dimounn bien kontan kan zot tann bon nouvel pou premie fwa. O-koumansman, kitfwa sertin pa interese ar bon nouvel. Me apre, kitfwa zot anvi konn plis lor Bondie ek ador Li. Alor, ki nou bizin fer kan nou zwenn bann dimounn ki anvi konn plis lor Bondie ek lor Labib?

2. Kifer nou predikasion li parey kouma travay ki enn planter fer?

² Nou kapav konpar nou travay predikasion ar travay enn planter. Kan bann frwi enn pie inn mir, planter-la pou kas zot. Selman, sa pa pou anpes li kontign prepar later ouswa plant bann lezot pie enn lot plas dan so zardin. Dan mem fason, kan nou zwenn enn dimounn ki anvi ekout nou mesaz, nou pa pou tarde pou ed sa dimounn-la vinn enn disip Zezi. Selman, nou bizin osi kontign ed bann ki pankor pare pou vinn bann disip Zezi, pou trouve kifer li bon ki zot aprann lor Bondie ek lor Labib. (Zan 4:35, 36) Bon zizman pou ed nou pou trouve ki pli bon fason nou kapav ed sa bann dimounn-la. Dan sa lartik-la, nou pou gete seki nou kapav fer pou ed bann dimounn ki interese ar bon nouvel kan nou pres ar zot pou premie fwa. Nou pou gete osi kouma nou kapav ed zot pou kontign vinn pli pros ar Zeova ek pou vinn enn parmi so bann serviter.

KOUMA NOU KAPAV ED BANN KI ANVI KONN PLIS LOR BONDIE EK LOR LABIB?

3. Ki nou bizin fer kan nou zwenn bann dimounn ki interese ar bon nouvel? (1 Korintien 9:26)

³ Kan nou zwenn bann dimounn ki interese ar bon nouvel, nou anvi ed zot pou aprann konn Zeova ek pou vinn pros ar Li. Alor, kan nou zwenn sa kalite dimounn-la, dan premie konversasion ki nou gagne avek zot, fode pa nou ezite pou propoz zot enn letid Labib ek invit zot pou vinn renion.—Lir 1 Korintien 9:26.

4. Explike kouma enn madam ti aksepte enn letid Labib deswit.

⁴ Propoz enn letid Labib. Kan nou prese, sertin dimounn kapav aksepte enn letid Labib deswit. Par exanp, anou gete seki ti arive dan Kanada. Enn Zedi, enn zenn madam ti vinn kot prezantwar ek li ti pran enn brosir Viv Ere pou Touletan! Ser ki ti kot prezantwar-la, ti dir li ki avek sa brosir-la, li ti kapav osi gagn enn letid Labib gratis. Madam-la ti interese. Li ti donn ser-la so nimero telefonn ek ser-la osi ti fer parey. Plitar sa zour-la, madam-la ti avoy ser-la enn mesaz pou demann li kan zot kapav koumans letid-la. Kan ser-la ti dir li ki li ti kapav vini sa wikenn-la, madam-la ti dir li: “Ou pa kapav vini demin? Mo lib demin.” Lerla, zot ti koumans etidie Labib so landemin. Madam-la ti asiste so premie renion sa wikenn-la ek li ti kontign fer bann progre.

5. Ki kitsoz kapav ed nou pou koumans enn letid Labib avek enn kikenn? (Get zimaz osi.)

⁵ Biensir, pa tou dimounn ki pou parey kouma sa madam-la ek ki pou aksepte enn letid Labib deswit. Pou sertin dimounn, kitfwa sa pou pran plis letan. Kitfwa nou pou bizin koumans enn konversasion avek zot, lor enn size ki interes zot. Ek si nou res pozitif ek ki nou montre zot ki nou vremem interese ar zot, kitfwa nou pou reisi koumans enn letid Labib bien vit avek zot. Kan nou propoz enn kikenn enn letid Labib, ki nou kapav dir li? Sertin frer ek ser ena bann metod bien efikas pou koumans bann letid Labib. Anou gete seki nou kapav aprann ar zot.

6. Pou ki enn kikenn aksepte ki nou revinn get li, ki nou kapav dir li?

⁶ Sa bann frer ek ser la dir ki, dan sertin teritwar kan nou propoz enn kikenn enn letid Labib, li pli bon ki nou pa servi bann lexpresion kouma “letid,” ouswa “enn kour lor Labib.” Zot dir ki li pli bon kan nou servi bann lexpresion kouma “konversasion,” ek “aprann konn plis lor Labib.” Pou ki enn kikenn aksepte ki to revinn get li, par exanp, to kapav dir li, “Ou pou etone kan ou pou aprann seki Labib dir lor bann kestion inportan ki nou kapav poz nou-mem,” ouswa “Labib li pa zis enn liv relizie; li kapav osi ed nou dan enn fason pratik.” Apre sa, to kapav dir li: “Sa pa pou pran boukou letan; dan 10 a 15 minit, ou kapav aprann enn kitsoz interesan ki kapav ed ou.” Li bon osi ki to pa servi bann lexpresion kouma “randevou” ouswa “sak semenn,” parski sa kapav donn dimounn-la linpresion ki li pe pran enn langazman.

7. Kan eski sertin finn aksepte laverite? (1 Korintien 14:23-25)

⁷ Invit dimounn-la renion. Dan lepok lapot Pol, sertin ti aksepte laverite premie fwa ki zot ti asiste enn renion. (Lir 1 Korintien 14:23-25.) Li parey azordi osi. Kan bann dimounn koumans asiste nou bann renion, zot progrese pli vit. Me kan eski nou bizin invit enn kikenn pou asiste renion? Dan liv Viv Ere pou Touletan!, dan leson 10, li ankouraz dimounn-la pou fixe lobzektif pou asiste enn renion. Selman, nou pa oblize atann ki nou ariv dan sa leson-la pou invit dimounn-la pou vinn renion. Depi nou premie konversasion mem, nou kapav invit li pou nou renion wikenn, ek kitfwa nou kapav mem dir li tit diskour piblik ouswa enn lide ki nou pou examine dan letid Latour Degard.

8. Kan nou invit enn dimounn pou asiste renion, ki nou kapav dir li? (Izai 54:13)

⁸ Kan to invit enn dimounn ki interese ar laverite pou vinn renion, explik li kouma nou bann renion zot bien diferan ar bann seremoni relizie ki li kone. Kan enn etidian Labib ti asiste enn Letid Latour Degard pou premie fwa, li ti dir so ansegnan, “Eski sa misie ki lor lestrad la, li konn tou dimounn zot nom?” Ser-la ti explik li ki nou fer zefor pou konn nom tou dimounn dan lasanble, parski lasanble li koumadir enn fami. Lerla, etidian-la ti dir ki dan so legliz, laplipar dimounn pa konn nom zot kamarad. Kan enn kikenn vinn renion pou premie fwa, nou kapav explik li osi kouma dan plizir fason, nou bann renion zot diferan ar bann seremoni relizie. (Lir Izai 54:13.) Kan nou vinn renion, nou zwenn ansam pou ador Zeova, nou les Li ansegn nou, ek nou ankouraz sakenn nou kamarad. (Ebre 2:12; 10:24, 25) Se pou sa rezon-la ki nou bann renion zot bien organize pou ki nou gagn bann konsey bien pratik. Nou pa nek fer bann mem kitsoz toule semenn. (1 Kor. 14:40) Nou bann lasal renion zot bien sinp. Ek parski nou bann lasal zot bien eklere, sa permet nou etidie ek res konsantre lor seki nou pe aprann. Anplis, parski nou pa pran par dan bann zafer politik, nou pa koz lor politik dan nou bann renion. Nou pa fer bann deba osi lor bann problem ouswa lor bann lopinion personel. Pou ki to etidian konpran kouma enn renion deroule, alavans to kapav montre li video Ki Pase dan Lasal Bann Temwin Zeova?

9-10. Kan to invit enn kikenn pou vinn renion, ki to kapav dir li pou rasir li? (Get zimaz osi.)

⁹ Sertin dimounn ezite pou vinn renion parski zot per tansion nou demann zot pou konverti ek vinn enn Temwin Zeova. Kan nou invit enn kikenn pou vinn lasal, nou kapav dir li ki nou kontan kan bann dimounn asiste renion avek nou. Nou kapav rasir li ek dir li ki li kapav vini zis pou ekoute ek ki li pa oblize partisipe. Nou kontan kan bann fami vini ansam avek zot zanfan. Dan nou bann renion, pena enn lansegnman apar zis pou bann zanfan. Bann paran ek bann zanfan, zot asiz ansam ek zot aprann mem kitsoz. Koumsa, bann paran kone avek kisann-la zot zanfan ete ek ki kitsoz pe ansegn zot. (Det. 31:12) Dan nou bann renion, nou pa demann kas ek nou pa pas laket. Olie sa, nou swiv lord ki Zezi inn done, setadir: “Zot inn gagne gratis, donn gratis.” (Mat. 10:8) Nou kapav osi dir dimounn-la ki li pa bizin met bann linz ki ser pou vinn renion, parski Bondie pa get laparans bann dimounn; Li get “seki ena dan leker.”—1 Sam. 16:7.

¹⁰ Kan enn dimounn vinn renion, fer tou seki to kapav pou akeyir li bien. Prezant li bann ansien ek osi bann lezot frer ek ser. Si li santi ki bann frer ek ser zot amikal ek ki zot gagn so traka, li pou plis anvi revini. Si li pena Labib, fer li swiv ansam ar twa. Montre li kouma pou swiv enn diskour ek kouma pou swiv dan enn piblikasion.

KAN ENN KIKENN KOUMANS ETIDIE LABIB

11. Kouma nou kapav respekte kantite letan ki dimounn-la inn donn nou?

¹¹ Ki kitsoz nou bizin rapel kan nou etidie Labib avek enn kikenn? Si zot inn tom dakor pou etidie Labib enn sertenn ler, vinn aler, mem si dan to pei li normal ki bann dimounn an-retar. Respekte osi kantite letan ki li’nn donn twa pou fer so letid. Premie fwa ki to fer letid enn kikenn, li pli bon ki to pa pran tro boukou letan. Sertin proklamater ki ena lexperyans dir ki li pli bon ki premie letid-la li kourt, mem si dimounn-la anvi konn plis. Fode pa ki to koz tro boukou osi. Olie sa, les etidian-la dir seki li panse ek seki li resanti.—Prov. 10:19.

12. Ki nou lobzektif kan nou koumans etidie Labib avek enn kikenn?

¹² Kan nou koumans etidie avek enn kikenn, nou lobzektif se pou ed li aprann konn Zeova ek Zezi, ek pou ena lamour pou zot. Pou nou fer sa, nou bizin touletan montre li seki Labib dir, olie ki nou dir li seki nou nou panse ek seki nou nou kone. (Zist. 10:25, 26) Lapot Pol inn donn nou enn zoli lexanp dan sa domenn-la. Kan li ti ansegn bann dimounn, li ti atir latansion lor Zezi, sa kikenn ki Zeova ti avoy lor later la, pou ki nou aprann konn Li ek kontan Li. (1 Kor. 2:1, 2) Pol ti explike osi ki li inportan ki nou ed bann etidian Labib pou devlop bann zoli kalite. Li ti konpar sa bann zoli kalite-la ar lor, larzan, ek bann pier presie. (1 Kor. 3:11-15) Parmi sa bann zoli kalite-la, ena lafwa, lasazes, disernman, ek enn gran respe pou Zeova. (Ps. 19:9, 10; Prov. 3:13-15; 1 Pier 1:7) Alor, anou imit fason ki lapot Pol ti ansegn lezot. To kapav fer sa kan to ed to etidian pou devlop enn lafwa for ek enn bon lamitie avek so Papa Zeova.—2 Kor. 1:24.

13. Kan to fer letid enn kikenn, kouma to kapav ena pasians ek montre twa rezonab anver li? (2 Korintien 10:4, 5) (Get zimaz osi.)

¹³ To kapav imit osi fason ki Zezi ti ansegne kan to ena pasians ek to montre twa rezonab anver to etidian. Fode pa to poz li bann kestion ki pou met li malalez. Si li pe gagn difikilte pou konpran enn kitsoz, to pa oblize kontign koz lor la. Olie sa, to kapav kontign letid-la, ek plitar to kapav rekoz lor la. Si enn etidian pankor pare pou aksepte enn lansegnman, pa fors li. Donn li letan pou reflesi lor seki li pe aprann ek pou sanz so fason panse. (Zan 16:12; Kol. 2:6, 7) Labib konpar bann fos lansegnman ar “bann fortres” ki nou bizin detrir. (Lir 2 Korintien 10:4, 5.) Avredir, li pa fasil pou ki enn etidian aret krwar bann kitsoz dan ki touletan li’nn krwar. Akoz sa, nou bizin ed nou etidian pou aranz enn nouvo fortres, setadir nou bizin ed li pou fer Zeova konfians.—Ps. 91:9.

KAN BANN NOUVO VINN RENION

14. Kouma nou bizin tret bann nouvo ki vinn renion?

¹⁴ Zeova anvi ki nou tret tou dimounn avek zantiyes ek amour, mem si zot ena enn diferan kiltir ouswa pozision sosial. (Zak 2:1-4, 9) Alor, kouma nou kapav montre lamour anver bann nouvo ki vinn renion?

15-16. Kouma nou kapav ed bann nouvo pou ki zot santi zot alez dan renion?

¹⁵ Sertin dimounn vinn nou bann renion parski zot anvi kone kouma nou bann renion deroule. Ek sertin vini parski enn kikenn ki res dan enn lot landrwa inn ankouraz zot pou asiste nou bann renion. Alor, kan enn nouvo vinn renion, pa ezite pou al koz ar li. Akeyir li bien san ki to met li malalez. Invit li pou asiz akote twa. Fer li swiv dan to Labib ek bann piblikasion ki nou pe etidie, ouswa donn li enn Labib ek bann piblikasion. Reflesi osi lor bann lezot fason ki to kapav met li alez. Kan enn misie ti vinn renion, li ti dir sa frer ki ti akeyir li la ki li ti inpe trakase parski li pa ti abiye kouma bizin. Frer-la ti met li alez ek ti explik li ki bann Temwin Zeova zot parey kouma tou dimounn. Misie-la ti progrese ek plitar li ti pran batem. Ek zame li’nn bliye seki sa frer-la ti dir li. Parkont, ena enn kitsoz ki nou bizin fer bien atansion: Kan nou koz ar bann nouvo avan ouswa apre renion, fode pa nou poz zot bann kestion ki pou anbaras zot ouswa ki tro personel.—1 Pier 4:15.

¹⁶ Ena enn lot fason osi ki nou kapav ed bann nouvo pou ki zot santi zot alez dan renion. Par exanp, dan nou bann konversasion, nou bann komanter, ek bann size ki nou fer dan renion, nou pou montre respe anver zot kan nou pe koz lor zot ouswa lor zot bann krwayans. Nou pa pou servi bann lexpresion ouswa dir bann kitsoz ki kapav ofans zot, ouswa ki kapav fer zot nepli anvi vinn renion. (Tit 2:8; 3:2) Par exanp, zame nou pa pou kritik zot bann krwayans. (2 Kor. 6:3) Se sirtou bann frer ki fer bann diskour piblik ki bizin fer bien atansion dan sa domenn-la. Kan zot fer enn diskour, zot pou osi fer zefor pou explik bann mo ouswa bann lide ki bann nouvo pa pou konpran.

17. Ki lobzektif nou bizin ena kan nou zwenn enn dimounn ki anvi aprann konn plis lor Bondie ek lor Labib?

¹⁷ Plis lafin pe koste, plis nou travay predikasion pe vinn irzan, ek nou bizin kontign rod bann dimounn ki anvi aprann konn plis lor Bondie ek lor Labib. (Zist. 13:48) Kan nou zwenn sa kalite dimounn-la, fode pa nou ezite pou propoz zot enn letid Labib ouswa invit zot pou vinn renion. Si nou fer sa, nou pou ed zot pou fer zot bann premie pa lor ‘semin ki amenn ziska lavi.’—Mat. 7:14.