Pa Bliye Priye pou Lezot

1. Kouma nou kone ki nou bann lapriyer bien inportan pou Zeova?

LAPRIYER se enn kado extraordiner! Reflesi lor la: Zeova inn donn bann anz sertin responsabilite. (Ps. 91:11) Li’nn osi donn so Garson bann responsabilite bien inportan. (Mat. 28:18) Me eski Li’nn donn enn lot kikenn responsabilite pou ekout nou bann lapriyer? Non, se enn kitsoz ki Li’nn gard pou Limem. Wi, se Zeova Limem ki ekout nou bann lapriyer.—Ps. 65:2.

2. Ki nou aprann ar lexanp lapot Pol?

² Mem si nou kapav priye Zeova pou bann kitsoz ki inportan pou nou, nou bizin osi priye pou lezot. Se seki lapot Pol ti fer. Par exanp, kan li ti ekrir lasanble Efez, li ti dir zot: “Mo kontign priye pou zot.” (Efe. 1:16) Pol pa ti zis priye pou bann group dimounn, me li ti osi priye pou sertin dimounn an partikilie. Par exanp, li ti dir Timote: “Mo ena rekonesans anver Bondie, . . . ek mo kontign mazinn twa dan mo bann siplikasion lanwit-lizour.” (2 Tim. 1:3) Mem si Pol ti ena so bann traka ek so bann difikilte, kanmem sa li ti pran letan pou priye pou lezot.—2 Kor. 11:23; 12:7, 8.

3. Kifer parfwa nou bliye priye pou lezot?

³ Parfwa, li kapav arive ki nou bliye priye pou lezot. Kifer? Enn ser ki apel Sabrinaa dir: “Toulezour nou bien okipe, ek li kapav arive ki nou konsantre zis lor nou bann problem ek ki nou priye zis pou bann kitsoz ki nou nou bizin.” Eski twa osi finn deza ariv twa sa? Si wi, sa lartik-la kapav ed twa. Dan sa lartik-la, (1) nou pou gete kifer li inportan ki nou priye pou lezot, ek (2) nou pou get de-trwa sizesion kouma nou kapav fer sa.

KIFER NOU BIZIN PRIYE POU LEZOT?

4-5. Kouma bann lapriyer ki nou fer pou lezot kapav “ena enn lefe pwisan”? (Zak 5:16)

⁴ Bann lapriyer ki nou fer pou lezot “ena enn lefe pwisan.” (Lir Zak 5:16.) Kan nou priye pou lezot, eski sa kapav vremem sanz zot sitiasion? Wi. Par exanp, Zezi ti kone ki Pier ti pou dir ki li pa ti konn li. Kanmem sa, li ti dir Pier: “Mo’nn sipliye Bondie pou twa pou ki to lafwa pa afebli.” (Lik 22:32) Lapot Pol osi ti kone ki kan nou priye pou lezot, sa kapav sanz zot sitiasion. Par exanp, kan li ti dan prizon dan Rom, li ti ekrir Filemon: “Mo espere ki gras-a zot bann lapriyer, pou retourn mwa kot zot.” (File. 22) Ek samem ti arive! Inpe letan apre, Pol ti sorti dan prizon ek li ti kapav rekoumans prese.

⁵ Biensir, kan nou priye pou lezot, sa pa vedir ki Zeova oblize fer seki nou demann Li. Kan nou ouver nou leker ar Zeova, Li trouve seki pe trakas nou, ek parfwa Li aksepte fer seki nou demann Li. Kan nou konn sa, sa ed nou pou ouver nou leker ar Zeova ek pou ena konfians ki Li pou okip sa sitiasion-la.—Ps. 37:5; 2 Kor. 1:11.

6. Kan nou priye pou lezot, ki lefe sa kapav ena lor nou? (1 Pier 3:8)

⁶ Kan nou priye pou lezot, sa ed nou pou ena enn “konpasion ki ranpli ar tandres.” (Lir 1 Pier 3:8.) Enn kikenn ki ena konpasion, li remarke kan lezot soufer ek li anvi fer kitsoz pou ed zot. (Mark 1:40, 41) Enn ansien ki apel Michael, dir: “Kan mo priye pou lezot konsernan bann kitsoz ki zot bizin, sa ed mwa pou konpran pli bien bann difikilte ki zot pe gagne ek sa ogmant mo lamour pou zot. Lerla, mo santi mwa pli pros ar zot, mem si zot zot pa remarke.” Enn ansien ki apel Richard koz lor enn lot bienfe ki nou gagne kan nou priye pou lezot. Li dir: “Kan nou priye pou enn kikenn, sa motiv nou pou fer kitsoz pou ed li. . . . Ek kan nou ed enn kikenn pou ki nou’nn priye, se koumadir nou pe ede pou reponn lapriyer ki nou’nn fer pou li.”

7. Kan nou priye pou lezot, kouma sa ed nou pou nou pa konsantre zis lor nou bann problem? (Filipien 2:3, 4) (Get zimaz osi.)

⁷ Kan nou priye pou lezot, sa ed nou pou nou pa konsantre zis lor nou bann problem. (Lir Filipien 2:3, 4.) Parski nou pe viv dan enn lemond ki dirize par Satan, nou tou nou ena bann problem. (1 Zan 5:19; Rev. 12:12) Selman, kan nou pran labitid pou priye pou lezot, sa rapel nou ki “tou [nou] bann frer dan lemond pe pas par sa bann mem kalite soufrans la.” (1 Pier 5:9) Enn pionie ki apel Katherine, dir: “Kan mo priye pou lezot, sa ed mwa pou rapel ki zot osi zot ena zot bann problem. Kan mo rapel sa, sa ed mwa pou mo pa konsantre zis lor mo bann problem.”

ZOT BIZIN NOU BANN LAPRIYER

8. Pou kisann-la nou kapav priye?

⁸ Pou kisann-la nou kapav priye? Nou kapav priye pou bann group dimounn, kouma par exanp, bann ki malad, bann zenn ki pe gagn presion dan lekol, ouswa bann ki pe gagn bann difikilte akoz zot laz. Boukou parmi nou bann frer ek ser pe fer fas ar lopozision, ki li ar zot fami ouswa ar gouvernman. (Mat. 10:18, 36; Zist. 12:5) Boukou frer ek ser inn bizin kit zot lakaz akoz laviolans ouswa bann problem politik ki ena dan zot landrwa. Ek ena lezot ki pe soufer akoz bann katastrof natirel. Kitfwa nou pa konn sa bann frer ek ser la personelman, me kan nou priye pou zot, nou montre ki nou pe swiv lord Zezi pou “kontan sakenn [nou] kamarad.”—Zan 13:34.

9. Kifer nou bizin priye pou bann frer ki ena bann responsabilite ek pou zot madam osi?

⁹ Nou bizin osi priye pou bann frer ki ena bann responsabilite dan lorganizasion Zeova. Par exanp, ena bann frer Komite Santral ek zot bann asistan, bann frer ki form parti dan bann Komite Biro Nasional, bann frer ki ena bann responsabilite dan Betel, bann responsab sirkonskripsion, bann ansien, ek bann serviter lasanble. Boukou parmi sa bann frer-la ena zot bann problem, me kanmem sa zot travay dir pou ed nou. (2 Kor. 12:15) Enn responsab sirkonskripsion ki apel Mark, dir: “Li bien difisil pou mwa pou viv lwin ar mo bann paran ki bien vie. Anplis, toule-de ena enn move lasante. Mem si mo ser ek so mari pran zot bien swin, mo bien tris parski mo pa laba pou ed zot.” Mem si nou pa konn tou bann traka ki sa bann frer-la ena, fode pa nou bliye priye pou zot. (1 Tes. 5:12, 13) Nou kapav osi priye pou zot bann madam, ki pe soutenir zot avek fidelite, pou ki zot kapav kontign fer zot bon travay.

10-11. Kan nou priye Zeova pou bann kitsoz zeneral ki tou nou bann frer ek ser bizin, eski sa fer Li plezir? Explike.

¹⁰ Kouma nou’nn trouve, li bon ki nou priye souvan pou bann group frer ek ser. Par exanp, san ki nou pans enn kikenn an partikilie, nou kapav demann Zeova pou ed bann frer ek ser ki dan prizon, ouswa pou rekonfort bann ki enn manb zot fami inn mor. Enn ansien ki apel Donald, dir: “Ena telman boukou frer ek ser ki pe gagn bann difikilte azordi. Akoz sa, nou priye Zeova pou bann kitsoz zeneral ki tou sa bann frer ek ser la bizin.”

¹¹ Eski bann lapriyer koumsa fer Zeova plezir? Wi. Anplis, nou pa kone exakteman seki sakenn parmi nou bann frer ek ser bizin. Alor, kan nou priye Zeova, li normal ki nou priye Li pou bann kitsoz zeneral ki tou nou bann frer ek ser bizin. (Zan 17:20; Efe. 6:18) Sa bann lapriyer-la montre ki nou “kontan tou nou bann frer.”—1 Pier 2:17.

KAN NOU PRIYE POU ENN KIKENN AN PARTIKILIE

12. Kan nou pran kont sitiasion lezot, kouma sa kapav ed nou pou priye pou zot?

¹² Pran kont sitiasion lezot. Anplis ki nou priye pou bann group dimounn, li bon osi ki nou priye pou bann dimounn an partikilie ek ki nou sit zot nom dan nou bann lapriyer. Eski ena enn kikenn dan to lasanble ki pe soufer akoz enn maladi kronik? Eski ena enn zenn ki dekouraze parski li pe gagn bann presion dan lekol? Eski ena enn paran ki pe fer zefor pou elve so zanfan tousel dan laverite? (Efe. 6:4) Kan to pran kont sitiasion lezot, to lamour ek to konpasion pou zot pou grandi ek sa pou pous twa pou priye pou zot.b—Rom. 12:15.

13. Ki kitsoz kapav ed nou pou priye pou bann dimounn ki zame nou’nn zwenn?

¹³ Sit bann nom dan to lapriyer. To kapav mem sit nom bann dimounn ki zame to’nn zwenn. Par exanp, to kapav pans nou bann frer ek ser ki dan prizon dan Krime, Leritre, Larisi, ek Singapour. Lor jw.org, to kapav trouv nom nou bann frer ek ser ki dan prizon.c Enn responsab sirkonskripsion ki apel Brian, dir: “Kan mo ekrir nom enn frer ouswa enn ser ki dan prizon ek ki mo lir so nom for, sa ed mwa pou rapel so nom ek pou mansionn so nom dan mo lapriyer.”

14-15. Ki kitsoz kapav ed nou pou nou demann Zeova bann kitsoz presi pou lezot?

¹⁴ Demann bann kitsoz ki presi. Michael, ki nou’nn mansione avan, dir: “Kan mo lir bann lartik lor jw.org ki koz lor bann frer ek ser ki dan prizon, mo esey mazine seki mo ti pou resanti si mo ti dan zot plas. Mo kone ki mo ti pou trakase pou mo madam, ek mo ti pou anvi ki li gagn tou seki li bizin. Kan mo reflesi koumsa, sa ed mwa pou demann Zeova bann kitsoz presi pou mo bann frer ki dan prizon ek ki marye.”—Ebre 13:3, not.

¹⁵ Kan nou reflesi kouma lavi nou bann frer ek ser ete dan prizon, sa kapav ed nou pou pans bann lezot kitsoz presi ki nou kapav demann Zeova pou zot. Par exanp, nou kapav priye pou ki bann gard prizon zanti avek zot, ek ki bann dimounn ki ena enn sertenn lotorite lor zot pa anpes zot ador Zeova. (1 Tim. 2:1, 2) Nou kapav priye osi pou ki zot bon lexanp ek zot fidelite ankouraz bann frer ek ser zot lasanble, ek ki zot bon kondwit ankouraz bann dimounn ki pa konn Zeova pou ekout nou mesaz. (1 Pier 2:12) Nou kapav fer parey pou nou bann frer ek ser ki pe pas par bann lezot difikilte osi. Kan nou pran kont sitiasion lezot, nou sit zot nom dan nou bann lapriyer, ek ki nou demann Zeova bann kitsoz presi pou zot, nou montre ki ‘nou lamour deborde pou sakenn nou kamarad.’—1 Tes. 3:12.

NOU BIZIN KONN NOU BANN LIMIT

16. Kan nou priye Zeova, kifer nou bizin konn nou bann limit? (Matie 6:8)

¹⁶ Kouma nou’nn trouve dan sa lartik-la, kan nou priye pou enn kikenn, kitfwa sa kapav ede pou sanz so sitiasion. Selman, kan nou priye Zeova, nou bizin konn nou bann limit. Par exanp, kan nou priye Li, fode pa nou bliye ki nou pe dir Li bann kitsoz ki Li deza kone. Fode pa nou bliye osi ki Zeova konn pli bien ki nou kouma pou okip enn sitiasion, alor fode pa nou dir Li seki Li bizin fer. Zeova kone seki so bann serviter bizin avan mem ki nou nou konn sa! (Lir Matie 6:8.) Si Zeova konn tousala, alor pou ki rezon nou bizin priye pou lezot? Apart bann rezon ki nou’nn gete dan sa lartik-la, kan nou priye pou lezot, se enn fason ki nou montre ki nou gagn zot traka. Lamour motiv nou pou priye pou nou kamarad, ek Zeova bien kontan kan Li trouv so bann serviter montre lamour parey kouma Li.

17-18. Servi enn lexanp pou explike kifer Zeova kontan kan nou priye pou lezot.

¹⁷ Mem si sitiasion nou bann frer ek ser pa sanze, kan nou priye pou zot, sa montre ki nou kontan zot, ek Zeova bien kontan kan Li trouv sa. Anou pran enn lexanp pou explik sa: Fer koumadir dan enn fami ena de zanfan; enn garson ek enn tifi. Garson-la tom bien malad. Lerla, tifi-la sipliy so papa ek dir li: “Silteple, fer kitsoz pou mo frer. Li bien malad!” Papa-la pe deza okip sa sitiasion-la. Li kontan so garson ek li pe pran li bien swin. Selman, papa-la bien kontan kan li tann so tifi dir li sa. Kifer? Parski sa montre ki so tifi gagn traka so frer. Li telman gagn traka so frer ki li sipliy so papa pou ed li.

¹⁸ Dan mem fason, Zeova bien kontan kan Li trouve ki nou gagn traka lezot ek ki nou priye pou zot. Kan nou priye pou lezot, nou montre ki nou pa zis gagn nou traka, me ki nou kontan nou bann frer ek ser, ek Zeova bien kontan kan Li trouv sa. (2 Tes. 1:3; Ebre 6:10) Ek kouma nou’nn trouve dan sa lartik-la, parfwa nou bann lapriyer kapav ede pou sanz enn sitiasion. Alor, anou touletan rapel pou priye pou lezot.