Kouma Nou Kapav Gard Nou Lazwa Mem Si Nou Pe Vinn Vie?

1-2. Kouma Zeova konsider so bann fidel serviter ki vie? (Psom 92:12-14; get zimaz osi.)

DAN sertin pei, kan enn kikenn vie, bann dimounn donn li loner. Me dan lezot pei, bann dimounn fer tou seki zot kapav pou zot pa vinn vie. Par exanp, si zot trouv enn seve blan lor zot latet, zot tir li. Selman, ninport ki kitsoz ki zot fer pou zot pa vinn vie, sa pa anpes zot vinn vie.

² Me kouma nou Papa Zeova konsider so bann serviter ki pe vinn vie? (Prov. 16:31) Zeova dir ki zot kouma bann zoli pie. (Lir Psom 92:12-14.) Kifer Li dir sa? Parski bann pie ki bien vie, bien souvan zot bien zoli ek zot ena boukou fey ek boukou fler lor zot. Par exanp, ena enn pie dan Zapon ki viv bien-bien lontan. Se pie seriz zapone. Sertin pie seriz zapone ena plis ki 1,000 an ek zot extra zoli. Parey kouma sa bann pie-la, bann serviter Zeova ki vie ek ki fidel, zot extra zoli, sirtou devan lizie Zeova. Zeova trouv plis ki zot bann seve blan; Li trouv zot bann zoli kalite, kouma par exanp zot landirans ek zot fidelite. Zot pe servi Li depi plizir dizenn lane, ek tonbe-leve, zot inn kontign res fidel ar Li.

3. Sit bann lexanp ki montre kouma Zeova inn servi bann dimounn ki vie pou fer bann kitsoz extraordiner.

³ Lavieyes pa diminie valer ki nou ena pou Zeova.a Avredir, Zeova inn servi bann dimounn ki vie pou fer bann kitsoz extraordiner. Par exanp, Sara ti bien vie kan Zeova ti dir li ki li ti pou vinn mama enn pep bien for ek osi enn anset Lemesi. (Zen. 17:15-19) Moiz ti vie kan Zeova ti avoy li pou liber bann Izraelit depi Lezip. (Ex. 7:6, 7) Ek lapot Zan ti bien vie kan Zeova ti fer li ekrir sink liv Labib.

4. Dapre Proverb 15:15, ki kitsoz kapav ed bann frer ek ser aze pou andir bann difikilte ki zot gagne? (Get zimaz osi.)

⁴ Kan nou vinn vie, souvan nou gagn bann problem lasante, ek sa kapav rann nou lavi bien difisil. Enn ser dir ki bann vie dimounn bizin ena kouraz parski zot lavi pa fasil. Selman, malgre zot bann difikilte, Zeova kapav ed nou bann frer ek ser aze pou gard zot lazwab pou ki zot kapav kontign andire. (Lir Proverb 15:15.) Dan sa lartik-la, nou pou koz lor bann kitsoz ki nou bann frer ek ser aze kapav fer pou ki zot res zwaye. Nou pou trouve osi kouma lezot dan lasanble kapav ed bann frer ek ser ki aze. Me pou koumanse, anou gete kifer li difisil pou nou gard nou lazwa kan nou vinn vie.

KIFER LI DIFISIL POU NOU GARD NOU LAZWA KAN NOU VINN VIE?

5. Ki kitsoz kapav fer nou bann frer ek ser aze dekouraze?

⁵ Ki kitsoz kapav fer twa dekouraze? Kitfwa to dekouraze parski to nepli kapav fer bann kitsoz ki to ti pe fer avan. Kitfwa to mazinn lepok kot to ti zenn ek kot to ti ena enn bon lasante. (Ekle. 7:10) Enn ser ki apel Ruby, dir: “Mo gagn difikilte pou met mo linz lor mwa parski mo ena boukou douler ek mo nepli kapav fer bann mouvman parey kouma avan. Enn zafer bien sinp, kouma met enn soset dan mo lipie, bien difisil pou mwa. Akoz mo lartrit, mo de lame angourdi, ek fer bann ti kitsoz bien difisil pou mwa.” Harold, enn frer ki ti pe servi dan Betel, dir: “Parfwa, mo ankoler ar momem parski mo nepli kapav fer bann kitsoz ki mo ti pe fer avan. Kan mo ti zenn, mo ti bien for ek mo ti kontan zwe baseball. Kan mo ti pe zwe baseball, lezot ti abitie dir, ‘Donn boul-la Harold, parski zame li pa rate li.’ Me aster-la, mo mem pa kapav avoy enn boul.”

6. (a) Ki lezot kitsoz kapav dekouraz nou bann frer ek ser aze? (b) Ki kitsoz kapav ed enn kikenn ki vie pou deside si li bizin aret kondir? (Dan sa nimero-la, get lartik “Eski Mo Bizin Aret Kondir?”)

⁶ Kitfwa to dekouraze parski to nepli kapav fer sertin kitsoz ki to ti abitie fer tousel, ek akoz sa, to bizin led pou fer sa bann kitsoz-la. Lerla, enn kikenn bizin vinn kot twa pou ed twa, ouswa to’nn bizin al res kot enn to bann zanfan. Kitfwa to dekouraze osi parski to nepli kapav al sertin plas to tousel ouswa to nepli kapav roul to loto, parski to nepli trouv bien ouswa to nepli ena lafors. Bann sitiasion koumsa kapav rann twa bien tris! Li vre ki to nepli kapav fer sertin kitsoz ki to ti pe fer avan. Selman, pa bliye ki to ena boukou valer pou Zeova ek pou lezot; to valer pa depann lor si to pe kapav pran tomem swin, si to res tousel, ouswa si to kapav roul to loto. Anplis, to kapav sir ki Zeova konpran to santiman. Li kone ki kantite to kontan Li ek ki kantite to kontan to bann frer ek ser, ek se akoz sa ki to ena boukou valer pou Li.—1 Sam. 16:7.

7. Si to panse ki to pa pou viv ase lontan pou trouv Armagedon, ki kitsoz to bizin rapel?

⁷ Kitfwa to tris parski to panse ki to pa pou viv ase lontan pou trouv Armagedon. Si to ena sa santiman-la, ki kitsoz kapav ed twa? Rapel kifer Zeova pe atann avek pasians pou Li detrir sa move lemond-la. (Iza. 30:18) So pasians pe donn bann milyon dimounn letan pou zot aprann konn Li ek zot servi Li. (2 Pier 3:9) Alor, kan to santi twa dekouraze, reflesi ki kantite dimounn pe gagn lokazion pou aprann konn Zeova ek gagn lavi sov avan ki lafin vini. Ek sertin parmi sa bann dimounn-la, kitfwa zot bann manb to fami!

8. Kan nou bann frer ek ser aze malad ouswa zot pe soufer, ki lefe sa kapav ena lor zot?

⁸ Ki nou zenn ouswa vie, kan nou malad ouswa nou pe soufer, nou kapav dir bann kitsoz ki nou regrete apre. (Ekle. 7:7; Zak 3:2) Par exanp, kan Zob, enn zom ki ti fidel ar Zeova, ti pe soufer, li ti “dir bann koze san reflesi.” (Zob 6:1-3) Anplis, akoz enn maladi ki zot ena ouswa enn medsinn ki zot pe pran, nou bann frer ek ser aze kapav dir ouswa fer bann kitsoz ki normalman zot pa ti pou dir ek fer. Selman, mem si nou malad ouswa nou vie, fode pa nou servi sa kouma enn pretext pou nou fer move ouswa nou exizan anver lezot pou ki zot fer kitsoz pou nou. Ek si nou rann nou kont ki nou’nn bles enn kikenn, fode pa nou tarde pou demann li exkiz.—Mat. 5:23, 24.

KOUMA NOU KAPAV RES ZWAYE?

9. Kifer nou bizin aksepte ki lezot ed nou? (Get zimaz osi.)

⁹ Aksepte ki lezot ed twa. (Gal. 6:2) O-koumansman, kitfwa to kapav trouv sa difisil. Enn ser ki apel Gretl, dir: “Parfwa, mo trouv sa difisil pou demann lezot pou ed mwa parski mo per tansion sa agas zot. Sa finn pran mwa boukou letan pou mo sanz mo fason panse ek pou mo rekonet ki mo bizin led lezot.” Labib dir ki “ena plis lazwa kan done,” ek kan to aksepte ki lezot ed twa, to permet zot gagn sa lazwa-la. (Zist. 20:35) Lerla, twa osi to pou zwaye parski to pou trouve ki lezot kontan twa ek ki zot anvi pran twa swin.

10. Kifer fode pa to bliye montre lezot ki to rekonesan anver zot? (Get zimaz osi.)

¹⁰ Montre rekonesans. (Kol. 3:15; 1 Tes. 5:18) Nou bien rekonesan anver bann dimounn ki fer bann bon kitsoz pou nou. Selman, li kapav arive ki nou bliye dir zot mersi ek montre zot nou rekonesans. Parkont, kan nou fer enn sourir ek ki nou dir zot mersi, nou montre zot ki zot ena valer pou nou ek ki nou bien kontan zot. Leah, enn ser ki okip bann frer ek ser aze dan Betel, dir: “Enn parmi bann ser ki mo okipe touletan dir mwa mersi ek li ekrir mwa bann ti mesaz lor bann bout papie. Li ekrir zis de-trwa ti mo, me se bann mo bien zanti. Mo bien kontan lir so bann ti mo. Li rekonesan pou led ki mo pe donn li ek sa donn mwa boukou lazwa.”

11. Kouma to kapav ed lezot? (Get zimaz osi.)

¹¹ Fer zefor pou ed lezot. Kan to pans lezot ek ki to fer zefor pou ed zot, to pou mwins konsantre lor to bann problem. Enn proverb Afriken konpar bann vie dimounn ar enn bibliotek ki ranpli ar liv kot ena boukou sazes. Selman, si sa bann liv-la res dan bibliotek ek ki pa ouver zot ditou, pa pou aprann nanye ar zot. Alor, pou ki bann zenn kapav aprann ar to lexperyans, al koz ar zot ek partaz seki to kone ar zot. Poz zot bann kestion ek ekout zot. Dir zot kouma Zeova inn ed twa dan to lavi, ek explik zot kouma kan zot obeir Zeova, sa pou rann zot ere. Kan to ankouraz ek rekonfort bann ki pli zenn ki twa, sa pou rann twa zwaye.—Ps. 71:18.

12. Dapre Izai 46:4, ki kitsoz Zeova promet nou bann frer ek ser aze? (Get zimaz osi.)

¹² Priye Zeova pou gagn lafors. Parfwa, to kapav santi twa feb ek fatige, ek sa kapav bien dekouraz twa. Selman, fode pa to bliye ki Zeova Li bien pwisan. Labib dir ki Zeova “zame li pa fatige ni perdi lafors.” (Iza. 40:28) Alor, Li kapav donn twa lafors ki to bizin. (Iza. 40:29-31) Avredir, Zeova promet ki Li pou ed twa. (Lir Izai 46:4.) Ek Zeova touletan tini so bann promes. (Zozwe 23:14; Iza. 55:10, 11) Kan to priye Zeova, Li pou donn twa led ki to bizin. Lerla, to pou santi ki kantite Li kontan twa ek sa pou rann twa ere.

13. Dapre 2 Korintien 4:16-18, ki kitsoz fode pa nou bliye? (Get zimaz osi.)

¹³ Pa bliye ki to pou revinn zenn ek ki to pou regagn enn bon lasante. Li pli fasil pou andir enn sitiasion difisil kan nou kone ki li pou arete biento. Labib promet nou ki biento bann dimounn pou nepli vinn vie ek zot pou nepli malad. (Zob 33:25; Iza. 33:24) Alor, gard to lazwa, parski to kone ki biento to pou ena enn pli bon lasante, to pou pli for, ek to pou pli zoli. (Lir 2 Korintien 4:16-18.) Aster-la, anou gete kouma lezot kapav ed twa.

KOUMA LEZOT KAPAV ED TWA?

14. Kifer li inportan ki nou telefonn ek vizit nou bann frer ek ser aze?

¹⁴ Telefonn ek vizit bann frer ek ser aze regilierman. (Ebre 13:16) Nou bann frer ek ser aze kitfwa pas boukou letan tousel ek sa kapav rann zot bien tris. Enn frer ki apel Camille, dir: “Gramatin-tanto mo kot mwa. Parfwa mo plin. Mo koumadir enn vie lion ki’nn ferme dan enn lakaz. Parfwa, mo agase ek mo ankoler.” Kan nou al vizit nou bann frer ek ser aze, nou bizin fer zot konpran ki zot ena boukou valer pou nou ek ki nou bien kontan zot. Eski sa finn deza ariv twa ki to ti anvi telefonn ouswa vizit enn frer ouswa enn ser aze, me ki to pa’nn reisi fer li? Li vre ki toulezour nou tou nou bien okipe. Selman, nou bizin “verifie bien bann kitsoz ki pli inportan,” ek enn parmi sa bann kitsoz-la se vizit nou bann frer ek ser aze. (Fil. 1:10) Ki kitsoz kapav ed nou pou fer sa? Nou kapav ekrir nom bann frer ek ser aze nou lasanble ek fixe enn zour kot nou pou avoy zot enn mesaz ek telefonn zot. Nou kapav osi fixe enn zour kot nou pou al vizit zot, koumsa nou pa pou bliye pou fer li.

15. Ki kitsoz bann zenn ek bann vie kapav fer ansam?

¹⁵ Si to enn zenn, kitfwa to demann tomem ki to kapav koze ouswa ki to kapav fer ansam ar enn kikenn ki vie. Me fode pa to trakase plis ki bizin. To bizin zis fer kamarad avek li. (Prov. 17:17) Pran letan pou koz ar bann frer ek ser aze avan ek apre renion. Par exanp, to kapav demann zot ki zot verse prefere, ouswa demann zot pou rakont twa enn kitsoz komik ki zot ti fer kan zot ti zenn. To kapav osi invit zot pou get enn program Televizion JW ansam ar twa. To kapav ed zot osi. Par exanp, to kapav ed zot pou fer enn kitsoz ki zot pa kapav fer par zotmem. To kapav veye ki zot laparey elektronik res touletan azour, ouswa download pou zot bann dernie piblikasion ki nou pou etidie dan lasanble. Enn ser ki apel Carol, dir: “To kapav propoz bann frer ek ser aze pou fer bann kitsoz ki twa to kontan fer. Mem si mo vie, mo ankor anvi profit mo lavi. Mo kontan fer shoping, al promne, ek manz enn ti manze ar mo bann kamarad.” Enn ser ki apel Maira, dir: “Mo ena enn kamarad ki ena 90 an. Li 57 an pli gran ki mwa. Me souvan mo bliye nou diferans laz, parski nou abitie get bann fim ansam ek riye ansam. Ek kan nou gagn bann difikilte, sakenn rod konsey ar so kamarad.”

16. Kifer li bon ki nou akonpagn nou bann frer ek ser aze kot dokter?

¹⁶ Akonpagn zot kot dokter. Kan to akonpagn enn frer ouswa enn ser aze kot dokter, to kapav res ar li kan li pas ar dokter pou fer sir ki dokter-la ouswa infirmie-la pe tret li bien ek pe donn li led ki li bizin. (Iza. 1:17) To kapav osi ekrir seki dokter-la pe dir, parski sa pou bien itil pou nou frer ouswa nou ser. Enn ser aze ki apel Ruth, dir: “Kan mo al tousel kot dokter, souvan dokter-la pa krwar seki mo dir li. Zot kapav mem dir mwa, ‘Problem-la dan ou latet sa madam!’ Me kan enn kikenn akonpagn mwa, bann dokter tret mwa pli bien. Mo bien rekonesan anver mo bann frer ek ser ki pran letan pou koz ar mo bann dokter.”

17. Kouma nou kapav pres ansam ar nou bann frer ek ser aze?

¹⁷ Pres ansam ar zot. Sertin frer ek ser aze kitfwa pa kapav marse pou al prese lakaz-lakaz. Eski to kapav invit enn ser aze pou fer prezantwar ar twa? To kapav mem amenn enn sez pou li, pou li asiz pre ar prezantwar-la. Ouswa to kapav invit enn frer aze pou al fer enn letid avek twa. To kapav mem propoz li pou vinn fer letid-la kot li. Bann ansien kapav organiz bann renion predikasion dan lakaz bann frer ek ser aze, koumsa li pou pli fasil pou ki bann-la sorti predikasion. Zeova bien kontan kan Li trouv nou fer tou seki nou kapav pou montre lamour ek respe anver nou bann frer ek ser aze.—Prov. 3:27; Rom. 12:10.

18. Ki nou pou examine dan prosin lartik?

¹⁸ Dan sa lartik-la, nou’nn trouve ki Zeova kontan nou bann frer ek ser aze ek ki zot ena boukou valer pou Li. Nou bann frer ek ser aze bizin osi ena boukou valer pou sakenn parmi nou dan lasanble. Frer ek ser aze, mem si to ena boukou problem, Zeova pou ed twa pou gard to lazwa. (Ps. 37:25) Ek biento, to kapav sir ki to pou gagn pli gran lazwa ki ena! Sertin frer ek ser bizin pran swin enn manb zot fami ki vie, enn zanfan, ouswa enn kamarad ki malad. Dan sa bann sitiasion-la, kouma zot kapav gard zot lazwa? Se seki nou pou examine dan prosin lartik.