Kontign Kont lor “Direksion Bondie”

1. Sit sertin kitsoz ki bann dimounn bizin. (Matie 5:3)

ZEOVA kone ki nou bizin sertin kitsoz materyel pou nou viv. Par exanp, nou bizin manze, linz, ek enn plas pou reste. Si nou pa gagn sa bann kitsoz-la, nou lavi kapav vinn bien difisil, ouswa nou kapav mem mor. Selman, apart sa bann kitsoz materyel la, Zeova kone ki nou bizin osi bann kitsoz spiritiel. Nou bizin aprann konn Li ek kont lor Li pou Li gid nou. (Lir Matie 5:3.) Pou nou vremem ere, nou bizin rekonet ki nou bizin so direksion dan nou lavi, ek apre sa, nou bizin les Li gid nou.

2. Servi enn lexanp pou explik lexpresion ‘rekonet ki nou bizin direksion Bondie.’

² Ki savedir ‘rekonet ki nou bizin direksion Bondie’? Dan lang Grek, sa lexpresion-la fer pans enn kikenn ki pe sipliye pou gagn led. Sa fer nou mazinn enn mandian ki bien mizer, so linz desire lor li, ek li pe asize dan kwin sime. Li feb-feb parski li pa pe manz kouma bizin. Lizour li asiz dan soley ek aswar li gagn bien fre. Bann dimounn evit li parski li sal-sal. Akoz so sitiasion, li malere ek li santi li abat net. Sa mandian-la kone ki li bizin led pou ki li kapav repran lafors ek res an-vi. Li parey pou bann ki rekonet ki zot bizin direksion Bondie. Zot kone ki zot bizin led Bondie dan zot lavi. Ek akoz sa, zot profit tou bann dispozision ki Zeova pran pou gid bann dimounn ki kontan Li.

3. Ki nou pou examine dan sa lartik-la?

³ Dan sa lartik-la, nou pou gete seki nou kapav aprann ar lexanp enn madam ki ti res Fenisi ek ki ti sipliy Zezi pou ed li. So lexanp pou montre nou trwa kalite ki nou bizin ena si nou anvi ki Zeova gid nou. Apre sa, nou pou get lexanp trwa zom ki ti kont lor Zeova: lapot Pier, lapot Pol, ek Lerwa David.

ENN LEXANP LIMILITE, PERSEVERANS, EK LAFWA

4. Ki kitsoz enn madam Fenisienn ti anvi ki Zezi fer pou li?

⁴ Enn zour, enn madam Fenisienn ti vinn get Zezi. So tifi ti pe “extra soufer parski li [ti] posede par enn demon.” (Mat. 15:21-28) Madam-la ti azenou devan Zezi ek ti sipliy li pou ed so tifi. Sa madam-la ti ena trwa zoli kalite. Anou gete kouma nou kapav imit sa madam-la.

5. Ki Zezi ti fer pou sa madam Fenisienn la, ek kifer? (Get zimaz osi.)

⁵ Sa madam-la ti ena enn vre limilite. Kifer nou dir sa? Parski li pa ti ankoler kan Zezi ti konpar li ar enn ti lisien, enn zanimo domestik ki kitfwa ti ena dan lakaz bann non-Zwif. Kouma to ti pou reazir si Zezi ti dir twa sa? Eski to ti pou ankoler ek to ti pou ale? Madam Fenisienn la pa ti fer sa. Ek sa ti montre ki li ena limilite, me osi perseverans. Li pa ti bes lebra ek li ti kontign sipliy Zezi pou ki li ed li. Ki kitsoz ti motiv sa madam-la pou fer sa? Se so lafwa dan Zezi. Avredir, lafwa ki sa madam-la ti ena, ti telman for ki sa ti pous Zezi pou fer enn kitsoz extraordiner. Mem si Zezi ti dir li ki Zeova ti avoy li pou ed “bann mouton perdi dan nasion Izrael,” Zezi ti ed sa madam-la ek li ti expilse sa demon ki ti lor so tifi la.

6. Kouma nou kapav swiv lexanp sa madam Fenisienn la?

⁶ Si nou anvi profit tou bann dispozision ki Zeova inn pran pou gid nou, nou bizin swiv lexanp sa madam Fenisienn la. Nou bizin ena limilite, perseverans, ek enn lafwa for. Avredir, enn kikenn ki ena limilite, li pou kontign sipliy Bondie pou ki Li ed li. Nou bizin osi ena enn lafwa for dan Zezi ek ena konfians dan bann dimounn ki li pe servi pou diriz so bann disip. (Mat. 24:45-47) Zeova ek Zezi bien kontan kan nou ena limilite, perseverans, ek lafwa, ek zot pou ed nou ek gid nou si nou ena sa bann kalite-la. (Konpar ar Zak 1:5-7.) Aster-la, anou gete kouma Zeova gid nou ek donn nou seki nou bizin pou ki nou ere. Nou pou gete osi kouma nou kapav swiv lexanp lapot Pier, lapot Pol, ek Lerwa David.

SWIV LEXANP LAPOT PIER—KONTIGN ETIDIE LABIB

7. Ki kitsoz Zezi ti dir Pier, ek ki kitsoz inportan Pier ti bizin fer? (Ebre 5:14–6:1)

⁷ Anou get lexanp lapot Pier. Li ti enn parmi bann premie Zwif ki ti konpran ki Zezi ti Lemesi. Li ti konpran osi ki Zeova ti pe servi Zezi pou ansegn bann dimounn “bann parol lavi eternel.” (Zan 6:66-68) Avan ki Zezi ti mont dan lesiel, li ti dir Pier: “Nouri mo bann ti mouton.” (Zan 21:17) Pier ti obeir Zezi, ek Zeova ti mem servi li pou ekrir de let ki form parti dan Labib. Selman, Pier ti bizin osi fer enn kitsoz inportan: Li ti bizin etidie Labib par limem. Par exanp, li ti etidie bann let ki lapot Pol ti ekrir ek ki ti deza form parti dan Labib. Pier ti rekonet ki sertin kitsoz ki Pol ti ekrir ti “difisil pou konpran.” (2 Pier 3:15, 16) Selman, li ti kontign persevere pou etidie sa bann kitsoz-la. Li ti ena konfians ki Zeova ti pou ed li pou dizer “manze solid,” setadir ed li pou konpran ek pou obeir bann kitsoz ki li ti pe aprann.—Lir Ebre 5:14–6:1.

8. Ki Pier ti fer kan Zeova ti donn li enn nouvo instriksion?

⁸ Pier ti ena lafwa dan Zeova, ek li ti montre sa kan li ti obeir bann instriksion ki Zeova ti donn li. Par exanp, enn zour, Pier ti gagn enn vizion, ek dan sa vizion-la, enn anz ti donn li lord pou manz bann zanimo ki ti inpir dapre Lalwa Moiz. Pier, ki ti enn Zwif, ti panse ki sa ti enn move kitsoz. Akoz sa, o-koumansman, li ti dir: “Non, zame Segner, parski zame mo pa’nn manz nanye ki pa gagn drwa manze ek ki inpir.” Lerla, anz-la ti dir li: “Aret apel inpir bann kitsoz ki Bondie inn pirifie.” (Zist. 10:9-15) Alor, Pier ti obeir instriksion ki sa anz-la ti donn li ek li ti sanz so fason panse. Kouma nou konn sa? Zis apre ki li ti gagn sa vizion-la, trwa zom ti vinn get li. Zot ti dir li ki zot met, Korney, ki ti enn non-Zwif, ti anvi ki li vinn get li kot li. Si li pa ti gagn sa vizion-la, Pier zame pa ti pou al kot Korney. Kifer? Parski bann Zwif ti konsider bann non-Zwif kouma bann dimounn ki “inpir.” (Zist. 10:28, 29) Selman, apre ki Zeova ti montre Pier ki Li ti anvi ki tou dimounn tann bon nouvel, Pier deswit ti sanz so fason panse ek li ti obeir Zeova. (Prov. 4:18) Li ti pres ar Korney ek tou so bann fami ek so bann kamarad ki ti dan so lakaz. Zot tou ti aksepte laverite, zot ti gagn lespri sin, ek zot ti pran batem.—Zist. 10:44-48.

9. Sit de bienfe ki nou gagne kan nou etidie bann verite ki kitfwa difisil pou konpran.

⁹ Parey kouma Pier, nou bizin bwar “dile,” setadir etidie regilierman bann verite inportan ki ena dan Labib. Selman, nou bizin osi fer zefor pou apresie bann “manze solid,” setadir bann verite ki kitfwa pli difisil pou konpran. Nou bizin pran letan pou etidie bien Labib, ek li inportan osi ki nou fer zefor pou konpran pli bien bann kitsoz ki nou pa ti pe konpran avan. Kifer? Parski sa pou fer nou gagn de bienfe. Premierman, kan nou aprann bann kitsoz lor Zeova, sa ogmant nou lamour ek nou respe pou Li. Ek deziemman, kan nou aprann enn nouvo kitsoz lor Zeova, nou anvi partaz sa avek lezot. (Rom. 11:33; Rev. 4:11) Ena enn lot leson ankor ki nou kapav aprann ar lexanp Pier: Kan nou gagn bann nouvo lexplikasion lor Parol Bondie, nou bizin obeir ek sanz nou fason panse deswit. Lerla, Zeova pou kontign gid nou ek nou pou kapav kontign servi Li avek fidelite.

SWIV LEXANP LAPOT POL—MET NOUVO PERSONALITE LOR TWA

10. Dapre Kolosien 3:8-10, ki nou bizin fer pou fer Zeova plezir?

¹⁰ Zeova gid nou osi kan Li montre nou kouma pou devlop enn personalite ki fer Li plezir. Par exanp, lapot Pol dir ki nou bizin “tir vie personalite” ek “abiy [nou-mem] ar nouvo personalite.” (Lir Kolosien 3:8-10.) Alor, pou nou reisi devlop enn personalite ki fer Zeova plezir, nou bizin kontign fer bann zefor. Anou get lexanp lapot Pol. Kan li ti zenn, li ti fer boukou zefor pou fer Bondie plezir. (Gal. 1:14; Fil. 3:4, 5) Selman, li pa ti vremem konpran kouma pou ador Bondie dan fason ki fer Li plezir. Pol pa ti konn laverite lor Zezi. Li ti enn zom orgeye ek li pa ti azir dan enn fason ki fer Bondie plezir. Labib dir ki Pol ti “enn zom insolan.”—1 Tim. 1:13.

11. Ki sanzman Pol ti bizin fer? Explike.

¹¹ Avan ki li vinn enn Kretien, Pol ti enn kikenn ki ti ankoler vit. Labib dir ki enn fwa, Pol ti telman ankoler ar bann disip Zezi ki li “ti menas pou touy zot.” (Zist. 9:1) Alor, apre ki li ti vinn enn Kretien, Pol sirman ti fer boukou zefor pou tir so vie personalite lor li. (Efe. 4:22, 31) Me kanmem sa, kan Barnabas ek li ti gagn enn dezakor, Labib dir ki “enn bel diskision ti eklate.” (Zist. 15:37-39) Dan sa ler-la, Pol pa ti azir dan enn fason ki fer Zeova plezir. Selman, Pol pa ti bes lebra. Li ti kontign ‘donn so lekor bann kou,’ setadir li ti kontign lit kont so linperfeksion pou ki li kapav gagn faver Zeova.—1 Kor. 9:27.

12. Ki kitsoz ti ed Pol pou tir so vie personalite lor li?

¹² Pol ti reisi tir so vie personalite ek abiy li ar nouvo personalite, parski li pa ti kont lor so prop lafors. (Fil. 4:13) Parey kouma Pier, Pol ti kont lor “lafors ki Bondie done.” (1 Pier 4:11) Selman, Pol parfwa ti fer bann erer ek li ti dekouraze akoz sa. Me kan li ti santi li dekouraze, li ti rapel tou seki Zeova ti fer pou li. Lerla, sa ti motiv li pou li montre so rekonesans anver Zeova ek pou li kontign fer bann sanzman pou fer Li plezir.—Rom. 7:21-25.

13. Kouma nou kapav swiv lexanp lapot Pol?

¹³ Mem si sa fer lontan ki nou pe servi Zeova, nou kapav swiv lexanp lapot Pol kan nou kontign fer zefor pou amelior nou personalite. Me kanmem sa, nou pou fer bann erer. Par exanp, kitfwa nou pou ankoler ar enn kikenn ek nou pou dir li bann move kitsoz. Selman, si enn kitsoz koumsa arive, fode zame nou panse ki nou pa kapav fer Zeova plezir. Okontrer, nou bizin kontign fer zefor pou fer bann sanzman dan nou fason panse ek azir. (Rom. 12:1, 2; Efe. 4:24) Nou bizin osi rapel enn kitsoz bien inportan: Si nou anvi amelior nou personalite, nou bizin kontign fer zefor pou konpran pli bien seki Zeova anvi nou fer.

SWIV LEXANP LERWA DAVID—LES ZEOVA PROTEZ TWA

14-15. Kouma Zeova protez so pep azordi? (Psom 27:5) (Get zimaz osi.)

¹⁴ Pou ki nou vremem ere, nou bizin osi ki Zeova protez nou. Dan ki fason Zeova protez nou? Ek ki nou bizin fer pou ki Li protez nou?

¹⁵ Lerwa David ti sir ki Zeova ti pou protez li dan bann moman difisil. (Lir Psom 27:5.) Kouma Zeova protez so pep azordi? Li protez nou kont ninport kisann-la ek kont ninport ki kitsoz ki kapav detrir nou lafwa dan Li. Mem si bann dimounn esey anpes nou pou ador Li, Li pou protez nou lamitie avek Li. (Ps. 34:7; Iza. 54:17) Satan, so bann demon, ek bann dimounn ki persekit nou, zot bien pwisan. Selman, Zeova pli for ki zot. Alor, mem si zot touy nou, nou sir ki Zeova pou resisit nou. (1 Kor. 15:55-57; Rev. 21:3, 4) Kan nou trakase osi, Zeova ed nou pou ki nou pa bes lebra ek ki nou kontign servi Li. (Prov. 12:25; Mat. 6:27-29) Nou Papa Zeova inn donn nou bann frer ek ser ki pou soutenir nou ek ankouraz nou dan bann moman difisil. Li’nn osi donn nou bann ansien ki ansegn nou ek ed nou pou gard nou lafwa for. (Iza. 32:1, 2) Ek kan nou asiste bann renion, nou aprann bann lezot fason kouma nou kapav les Zeova ed nou ek protez nou.—Ebre 10:24, 25.

16. Kouma Zeova ti protez David?

¹⁶ Kan David ti obeir Zeova, Zeova ti ed li pou pran bann bon desizion, ek lerla David ti ere. Se koumsa ki Zeova ti protez David. (Konpar ar Proverb 5:1, 2.) Parkont, kan David ti dezobeir Zeova, li ti soufer akoz bann move desizion ki li ti pran, ek Zeova pa ti protez li kont bann konsekans so bann move aksion. (2 Sam. 12:9, 10) Ena fwa, David ti soufer osi parski lezot ti tret li dan enn move fason. Ek kan sa ti arive, David ti ouver so leker ar Zeova, ek Zeova ti protez li. Kouma Li ti fer sa? Li ti rekonfort David, Li ti promet li ki Li ti pou pran li swin, ek Li ti montre li ki Li kontan li.—Ps. 23:1-6.

17. Kouma nou kapav swiv lexanp David?

¹⁷ Nou kapav swiv lexanp David kan nou priye Zeova ek nou rod so direksion pou ki nou kapav pran bann bon desizion. Nou bizin osi rapel ki, Zeova pa pou anpes nou gagn bann konsekans bann move desizion ki nou pran. (Gal. 6:7, 8) Ek mem si nou obeir Zeova, parfwa li pou arive ki nou pou gagn bann difikilte. Selman, pandan sa bann moman difisil la, nou kapav ouver nou leker ar Li ek priye Li pou gagn so led. Ek nou kapav sir ki Li pou rekonfort nou ek montre nou ki Li kontan nou.—Fil. 4:6, 7.

KONTIGN KONT LOR ZEOVA POU GAGN SO LED

18. Ki kitsoz boukou dimounn panse azordi, ek ki nou bizin fer si nou anvi ki Bondie kontign gid nou? (Get zimaz osi.)

¹⁸ Nou text pou lane 2026 se: “Bann ki rekonet ki zot bizin direksion Bondie zot ere.” Se sirtou dan nou lepok ki li inportan ki nou obeir seki Zezi ti dir ek ki nou kont lor direksion Zeova. Kifer? Parski azordi, boukou dimounn panse ki zot pa bizin Bondie ek ki zot pa bizin ki Li gid zot. Ena sertin ki krwar dan Bondie, selman zot prefer ador Li dan fason ki zot zot anvi. Ena lezot ki kont lor bann dimounn pou gid zot. Ek akoz tou sa bann kitsoz-la, boukou dimounn malere. Fode zame ki nou swiv zot lexanp. Okontrer, anou kontign montre ki nou kont lor Zeova. Ek pou nou fer sa, nou bizin kontign etidie Labib, kontign abiy nou ar nouvo personalite, ek kontign les Zeova protez nou.